Kpol ambʼil jatumel che elel txalpaj qe tkʼwala ex tzul kybʼis tuʼn jlu. ¿Tiʼ jaku bʼant tuʼna tuʼn tonina kyiʼj?

•  Aju bʼaʼn tuʼn tel tnikʼa tiʼj

•  Aju jaku bʼant tuʼna

 Qkyaqilx in qo el txalpaj. In tzaj tqʼamaʼn Tyol Dios qa qkyaqilx «nimku maj in qo tzpet» (Santiago 3:2). Ax ikx in che el tzpet kʼwal. Noqtzun tuʼnj, in tzaj tqʼoʼn jlu ambʼil kye tuʼn t-xi kyxnaqʼtzan kyibʼ tuʼn kyex kywitz nya bʼaʼn. Nya bʼiʼx qʼiʼn mod lu kyuʼn aj kyul itzʼj, pero jaku ten kymod lu. In tzaj tqʼamaʼn jun txubʼaj jlu, aju Laura tbʼi: «O tzʼel nnikʼe tiʼj tukʼil nchmile qa mas bʼaʼn tuʼn t-xi qqʼoʼn ambʼil kye kʼwal tuʼn kyex kywitz nya bʼaʼn, twitzju tuʼn t-xi qqʼamaʼn kye qa mintiʼ jun tiʼ otoq bʼaj. In nonin jlu kyiʼj tuʼn kukx tok tilil kyuʼn tuʼn tbʼant jun tiʼ kwest in nela toj kywitz».

 Ateʼ nim kʼwal mintiʼ ojtzqiʼn kyuʼn tzeʼn tuʼn kyex twitz nya bʼaʼn. At maj, mintiʼ ojtzqiʼn kyuʼn kʼwal tzeʼn tuʼn kyex twitz jun nya bʼaʼn aj kyel txalpaj. In bʼaj jlu, tuʼnju kukx in che kolin kytat kyiʼj. Jun techel, qa nya bʼaʼn kycalificación in jatz toj examen, ateʼ mambʼaj jun rat in nok kyqʼoʼn te tpaj aj xnaqʼtzal. Ex qa ma tzaj nya bʼaʼn kyxol tukʼil juntl kʼwal, mintiʼ in nok kyqʼoʼn te tpaj kykʼwal.

 Pero qa in che kolin kyiʼj kykʼwal, ¿alkye tten jaku txi kyxnaqʼtzan kyibʼ tuʼn kyex kywitz junjun nya bʼaʼn?

•   Xnaqʼtzanxa te tkʼwala qa jaku tzaj nya bʼaʼn tiʼj tuʼn tbʼinchbʼen

   In tzaj tqʼamaʼn Tyol Dios jlu: «Porke alkyeju in kuʼx tawaʼn xjal, axtzunju kjawil tchmoʼn» (Gálatas 6:7).

   Qa ma kubʼ qbʼinchaʼn bʼaʼn, tzul tbʼanel qe, ex qa ma kubʼ qbʼinchaʼn nya bʼaʼn, tzul nya bʼaʼn qiʼj. Nim toklen tuʼn tel kynikʼ kʼwal tiʼj jlu ex tuʼn tel kynikʼ tiʼj qa at maj aʼyex at kypaj tiʼjju in tzaj kyiʼj. Qa ma tzaj jun nya bʼaʼn kyiʼj tuʼn kybʼinchbʼen, miʼn tzʼok tqʼoʼna te tpaj juntl xjal ex miʼn kolina kyiʼj tkʼwala, sino qʼonxa ambʼil kye tuʼn kyex twitz ik tzeʼnx kyabʼqʼi. Tzʼonina kyiʼj tkʼwala tuʼn tel kynikʼ tiʼj tiʼ jaku tzaj kyiʼj qa ma kubʼ kybʼinchaʼn jun nya bʼaʼn.

•   Tzʼonina kyiʼj tkʼwala tuʼn t-xi kybʼinchaʼn tiʼj nya bʼaʼn

   Taqikʼ Tyol Dios nim toklen: «Maske kubʼ tzʼaq wuq maj ju xjal tzʼaqlxix, pero in jaw weʼ juntl maj» (Proverbios 24:16).

   Ax tok, jaku tzaj nim qbʼis aj qel txalpaj, pero mlay qo kyim tuʼn. Tzʼonina kyiʼj tkʼwala tiʼ jaku bʼant kyuʼn tuʼn miʼn kyel txalpaj juntl maj tiʼjju ma bʼant kyuʼn ex nya tuʼn kukx kyximen tiʼjju ma tzaj kyiʼj. Jun techel, qa mintiʼ ma kambʼan tkʼwala tiʼj jun examen, yekʼinxa te qa oʼkx jaku kambʼan qa mas ma xnaqʼtzan ex qa ma tzʼok tilil tuʼn toj juntl maj (Proverbios 20:4). Qa ma tzaj tqʼoj kyxol tukʼil jun tamiw, tzʼonina tiʼj tzeʼn jaku kyaj nya bʼaʼn toj ttxolil, maske nya a at tpaj (Romanos 12:18; 2 Timoteo 2:24).

•   Yekʼinxa kye tkʼwala qa mlay bʼant tkyaqil kyuʼn

   Taqikʼ Tyol Dios nim toklen: «Kyjaʼtzun kxel nmaʼne kyeye kykyaqile, mi jun tuʼn t-ximan tiʼjx qa at mas toklen ex bʼalo mintiʼ» (Romanos 12:3).

   Qa ma txi tqʼamaʼna te tkʼwala qa mas tbʼanel in bʼant jun tiʼ tuʼn kywitz txqantl, nya toj tumel jlu ex nya ax tok. Tuʼnju ax ikx qe kʼwal list, at maj mintiʼ in tzaqʼwet jun examen kyuʼn, atzun qeju tbʼanel che pelotin, nya tkyaqil maj in che kambʼan. Aʼyeju kʼwal in nel kynikʼ tiʼjju mlay bʼant kyuʼn, mas jun rat in che ex kywitz nya bʼaʼn in che tzaj kyiʼj.

   In tzaj tqʼamaʼn Tyol Dios qa aj qok weʼ twitz jun nya bʼaʼn, in tzaj tqʼoʼn ambʼil qe tuʼn tikʼx quʼn ex tuʼn tten mas qipumal (Santiago 1:2-4). Tuʼntzunju, maske jaku tzaj kybʼis kʼwal aj kyel txalpaj, tzʼonina kyiʼj tuʼn tten kyximbʼetz toj tumel tiʼj jlu.

   Il tiʼj tuʼn tok tilil tuʼna ex tuʼn tel tpaʼna ambʼil tuʼn t-xi t-xnaqʼtzaʼna kye tkʼwala tzeʼn jaku che ex twitz nya bʼaʼn. Noqtzun tuʼnj, ktzalajela qa kʼonil jlu kyiʼj aj kyokx toj kykuʼxumal. In tzaj tqʼamaʼn uʼj Letting Go With Love and Confidence (Tzaqpiʼn qexa tukʼil kʼujlabʼil ex qeʼk tkʼuʼja kyiʼj) jlu: «Aqeju kuʼxun ojtzqiʼn kyuʼn tzeʼn tuʼn kyex kywitz nya bʼaʼn, mintiʼ in che el oq kywitz aj ttzaj bʼaj kykʼuʼj. Aj kyok weʼ twitz junjun tiʼchaq, in nonin kyiʼj tuʼn t-xi kyxnaqʼtzan kyibʼ tzeʼn tuʼn kyex kywitz nya bʼaʼn». Ax ikx, bʼaʼn tuʼn ttzaj qnaʼn qa ma che naqʼet tzeʼn tuʼn kyex kywitz nya bʼaʼn, kʼonil kyiʼj aj kychʼiy.

 Nabʼil: Qʼonkuya jun tbʼanel techel kywitz tkʼwala. Bʼaʼn tuʼn ttzaj tnaʼna qa o naqʼeta tzeʼn tuʼn texa kywitz nya bʼaʼn, ax ikx te tkʼwala jaku bʼant tuʼn.