In tzaj kyyekʼin junjun xnaqʼtzbʼil qa aj t-xi kyqʼoʼn xjal chjonte, mas in che tzalaj, mintiʼxix in tzaj yabʼil kyiʼj, jun rat in che ex kywitz nya bʼaʼn ex in che ten tbʼanel kyamiw. In tzaj tqʼamaʼn investigador Robert Emmons qa bʼaʼn qo qʼoʼn chjonte, mintiʼ in ten ikʼbʼil toj qanmi, mintiʼ in xi qkʼuʼn qʼoj, mintiʼ in pon qkʼuʼj tiʼj nim tiʼchaq ex mintiʼ in tzaj naj qqʼoj. a

 ¿Tzeʼn in nonin kyiʼj kʼwal qa bʼaʼn che qʼoʼn chjonte? Toj kyaje abʼqʼi, e ok 700 kuʼxun toj prueba ex el nikʼbʼaj tiʼj qa aʼyeju kuʼxun in xi kyqʼoʼn chjonte, mintiʼxix in che copiarin kyoj examen, mintiʼ in najbʼen droga kyuʼn moqa mintiʼ in xi kykʼaʼn qʼeʼn ex mintiʼ in kubʼ kyyekʼin nya bʼaʼn kymod.

•   Mintiʼ in xi kyqʼoʼn chjonte tuʼnju in kubʼ kyximen qa at kyoklen tiʼj tkyaqil. Ateʼ nim kʼwal mintiʼ in xi kyqʼoʼn chjonte tiʼj jun tiʼ tuʼnju in kubʼ kyximen qa at kyoklen tuʼn ttzaj qʼoʼn tkyaqil kye ex mintiʼ in kubʼ kyximen qa jun oyaj.

   Toj ambʼil jaʼlo, chʼixme kykyaqil xjal in kubʼ kyyekʼin mod lu. In tzaj tqʼamaʼn jun txubʼaj Katherine tbʼi jlu: «Kyaj xjal tuʼn tkubʼ qximen qa at qoklen tiʼj tkyaqil. In netz kyyekʼin xjal kyoj anuncio qa ‹at qoklen› tiʼj tkyaqilju in che kʼayin tiʼj ex qa aqoʼ tuʼn ttzaj laqʼonte tnejel».

•   Akux tal chʼin qe kʼwal jaku txi qxnaqʼtzaʼn kye tuʼn t-xi kyqʼoʼn chjonte. In tzaj tqʼamaʼn jun txubʼaj Kaye tbʼi jlu: «Mas jun rat in nel kykanoʼn kʼwal aju in bʼant kyuʼn txqantl. Tuʼntzunju, bʼaʼn tuʼn t-xi qxnaqʼtzaʼn tbʼanel mod kye. Jaku tzʼok jlu ik tzeʼn qa ma tzʼok qqʼoʼn jun tzeʼ tiʼj jun awal tuʼntzun t-xi tjikumaʼn tiʼj akux in chʼiy».

•   Qʼamanxa kye tiʼ jaku txi kyqʼamaʼn. Jaku txi kyqʼamaʼn tal kʼwal «chjonte» aj ttzaj qʼoʼn jun oyaj kye moqa aj tkubʼ kyyekʼin txqantl tbʼanel kymod kyukʼil. Ex akux in che chʼiy, kʼokel kyqʼoʼn mas toklen xtalbʼil in bʼant kyuʼn txqantl kyiʼj.

   Texto nim toklen: «Kyqʼonxe chjonte» (Colosenses 3:15).

   «Kukx in xi tqʼamaʼn tal nchmane te oxe abʼqʼi ‹najsama› ex ‹chjonte›, tuʼnju o tzʼel tkanoʼn jlu kyiʼj tman. Ex tukʼil techel in kubʼ kyqʼoʼn, in xi kyyekʼin te tuʼn t-xi tqʼoʼn chjonte tiʼj tkyaqil» (Jeffrey).

•   Yekʼinxa kye tiʼ jaku bʼant kyuʼn. Aj ttzaj qʼoʼn jun oyaj te tkʼwala, tbʼanel qa ma tzʼonina tiʼj tuʼn tkubʼ tbʼinchaʼn jun tarjeta tuʼn t-xi tqʼoʼn chjonte. Ax ikx, jaku txi tqʼamaʼna te tkʼwala tuʼn tkubʼ tbʼinchaʼn junjun aqʼuntl toj ja. Qa ma bʼant jlu tuʼna, kʼonil tiʼj tuʼn tel tnikʼ tiʼj tkyaqil aqʼuntl in bʼant toj ja.

   Texto nim toklen: «Mas at tzalajbʼil kyeye qa at chʼin ma txi kyqʼoʼne te juntl, ex mya aqeye tuʼn kykʼmonteye chʼin ktzajel qʼoʼn kyeye tuʼn juntl» (Hechos 20:35).

   «At kabʼe qkʼwale ma che ok te kuʼxun. Ex in che onin qiʼje tuʼn tbʼaj ximet tiʼ tuʼn t-xi qwaʼne, tuʼn tbʼaj bʼinchet qwaye ex tuʼn kybʼant junjuntl aqʼuntl toj ja. Iktzun tten in nok kyqʼoʼn toklen tkyaqilju in bʼant quʼne kyiʼj ex nya jun rat jaku tzikʼ tnaʼl jlu kyuʼn» (Beverly).

•   Xnaqʼtzanxa kye alkye kymod tuʼn tkubʼ kyyekʼin. Tuʼn tchʼiy jun awal, il tiʼj tuʼn tkux qʼet toj tbʼanel txʼotxʼ. Atzun qe, il tiʼj tuʼn tkubʼ qin qibʼ tuʼn t-xi qqʼoʼn chjonte kye txqantl. Aju xjal in kubʼ tin tibʼ, in nel tnikʼ tiʼj qa mlay bʼant tkyaqil tuʼn tjunalx, sino in xi tqʼoʼn chjonte aj kyonin txqantl tiʼj.

   Texto nim toklen: «Noq oʼkx tuʼn tkubʼ kymansin kyibʼe, teyle junjun bʼaʼn tuʼn t-ximan kyiʼj txqantl okslal qa at mas kyoklen twitz. Teyle junjun mya noq oʼkx tuʼn tok tqʼoʼn tkwent tiʼj aju at tajbʼen te, ax ikx tuʼn tok tqʼoʼn tkwent tiʼj aju at tajbʼen kye txqantl» (Filipenses 2:3, 4).

   «Aj qwane te qale, at maj in qo saqchane tuʼn t-xi qqʼoʼne chjonte. Teyele te junjun in tzaj tqʼamaʼn alqiʼj in xi tqʼoʼn chjonte. In nonin jlu qiʼje tuʼn tkubʼ qyekʼine tbʼanel qmode ex tuʼn qqʼoʼne chjonte tiʼj tkyaqil. Aj tbʼant jlu quʼne, mintiʼ in ten qximbʼetze nya toj tumel ex nya oʼkx qiʼje in qo ximane» (Tamara).

 Nabʼil: Qʼonkuya jun tbʼanel techel. Qa kukx in xi tqʼoʼna chjonte kye tkʼwala ex kye txqantl, mas fácil jaku tzʼela kye tuʼn t-xi kyqʼoʼn chjonte.