KYXJEL KUʼXUN
¿Bʼaʼnpe aju kyaqʼun chman?
¿Tiʼ t-xima tiʼj?
¿Bʼaʼnpe tuʼn tjaw quʼjin horóscopo, tuʼn kyajbʼen tiʼchaq quʼn tuʼn tel qnikʼ tiʼjju kbʼajel toj ambʼil tzul moqa tuʼn qxiʼ tukʼil jun chman?
Aʼyeju txʼolbʼabʼil at kyoklen tukʼil kyaqʼun chman, ¿noqpe jun yol qe tiʼjju bʼaʼn ex tiʼjju nya bʼaʼn moqa ax tok qe?
Toj xnaqʼtzbʼil lu kʼelel qnikʼ tiʼj tiquʼn kygan kuʼxun kyaqʼun chman ex tiquʼn il tiʼj tuʼn tok t-xqʼuqin tibʼa tiʼj.
¿Tiquʼn kygan kuʼxun?
Nim kyaqʼun chman o tzʼetz kyoj qe tiʼchaq in che tzalaj kuʼxun tiʼj. Ik tzeʼn kyoj película, kyoj programa te televisión, kyoj videojuegos ex kyoj uʼj. Ex ateʼ nim kuʼxun jaʼlo kygan qe tiʼchaq ik tzeʼn tuʼn kyajbʼen cheʼw kyuʼn xjal tuʼn tel kynikʼ tiʼjju kbʼajel toj ambʼil tzul, qe juʼẍ, qe vampiro ex qe chman. ¿Tiquʼn kygan aju kyaqʼun chman?
Tuʼnju kyaj tuʼn tok kyojtzqiʼn ex tuʼn tel kynikʼ tiʼj qa ax tok ateʼqe juʼẍ.
Tuʼnju in tzaj bʼaj kykʼuʼj tiʼj ambʼil tzul ex kyaj tuʼn kyjyon tqanil tiʼjju kbʼajel.
Tuʼnju kyaj tuʼn kyyolin kyukʼil xjal o che kyim.
Mintiʼ in che ok ximbʼetz lu te nya bʼaʼn. Jun techel, qkyaqilx jaku kubʼ qxjelin tiʼ kbʼajel toj ambʼil tzul, tuʼn tkubʼ qnaʼn bʼis tiʼj jun toj qja moqa jun qamiw o kyim. Pero jaku tzaj nya bʼaʼn qiʼj tuʼn kyaqʼun chman.
¿Tiquʼn il tiʼj tuʼn tok t-xqʼuqin tibʼa?
Toj Tyol Dios in che kanet kawbʼil quʼn aju in tzaj tqʼamaʼn qa il tiʼj tuʼn tel qikʼun kyaqʼun chman. Jun techel, in tzaj tqʼamaʼn jlu:
«Mi jun kyeye [...] tuʼn tbʼant tqʼijin, mi jun tzʼok tqʼoʼn tibʼ qʼmalte alkye tzul te tibʼajxi, mi jun tuʼn tbʼant tkyʼaʼn, mi jun tuʼn tbʼant mañ tuʼn, mi jun tuʼn t-xi tqanin jun t-xjel kye aj qʼij ex mi kye qeju in tzaj kytxkoʼn kyanmi kyimni, ex mi jun tuʼn t-xi tqanin jun t-xjel kye kyimni. Porke ikʼun tuʼn Qman aju xjal in tbʼinchaʼn tkyaqil jlu» (Deuteronomio 18:10-12).
¿Tiquʼn in tzaj tqʼamaʼn Tyol Dios tuʼn tel qikʼun kyaqʼun chman?
In qo onin kyiʼj juʼẍ qa in bʼant kyaqʼun chman quʼn ex junjuntl tiʼ at toklen tukʼil jlu. In tzaj tqʼamaʼn Tyol Dios qa el kypan kyibʼ junjun anjel tiʼj Dios ex e ok te aj qʼoj tiʼj (Génesis 6:2; Judas 6). Tuʼn kysbʼun nya bʼaʼn anjel lu, in che ajbʼen xjal kyuʼn aʼyeju in tzaj kyqʼamaʼn qa in nel kynikʼ tiʼjju kbʼajel toj ambʼil tzul ex at maj in che ajbʼen qe cheʼw kyuʼn tuʼn tel kynikʼ tiʼjju kbʼajel, qe xjal in tzaj kyqʼamaʼn qa in che yolin kyukʼil kyimni moqa in tzaj kyqʼamaʼn tiʼ kbʼajel. Qa ma qo onin kyiʼj tiʼchaq lu, in qo ok te kyamiw qe aj qʼoj tiʼj Dios.
Tuʼn kyaqʼun chman jaku txi qnimen qa ateʼ junjun xjal in nel kynikʼ tiʼjju kbʼajel toj ambʼil tzul. Noqtzun tuʼnj, oʼkx Dios jaku tzaj qʼamante t-xe tnejel tiʼjju tzul te bʼajsbʼil; in tzaj tqʼoʼn tqanil atxix ojtxe tiʼjju kbʼajel toj tqʼijlalil tzul (Isaías 46:10; Santiago 4:13, 14).
Tuʼn kyaqʼun chman jaku txi qnimen qa jaku che yolin kyimni kyukʼil xjal itzʼ. Noqtzun tuʼnj, in tzaj tqʼamaʼn Tyol Dios qa aʼyeju «xjal kyimni qe, mintiʼ bʼaʼn kyuʼn, [...] ex ok tpona ma tuj kynajbʼil kyimni, mi jun tiʼxti kbʼantel tuʼna ex mintiʼ jun tuʼn t-ximana tiʼj, porke ma chixin mintiʼ nabʼl ex mintiʼ ojtzqibʼl at» (Eclesiastés 9:5, 10).
Tuʼntzunju, il nel kyikʼun testigos de Jehová tkyaqil bʼinchbʼen at toklen tukʼil kyaqʼun chman ex junjuntl at toklen tukʼil. Ax ikx in nel kyikʼun junjun saqchbʼil jatumel in che etz yekʼin zombi, qe vampiro ex junjuntl tiʼ. Tqʼama jun txin María tbʼi jlu: «Qa at chʼin kyaqʼun chman toj, mintiʼ tuʼn tok nqʼoʼn nwitze tiʼj». a
Ik tzeʼn jaku kubʼ sbʼuʼna tuʼn jun xjal aj tkubʼ tewin alkyexix, ax ikx kyaj juʼẍ tuʼn tkubʼ t-ximana qa ax tok in yolina tukʼil jun xjal o kyim.
Aju jaku bʼant tuʼna
Bʼaʼn tuʼn tel tikʼena tkyaqil saqchbʼil ex junjuntl tiʼ at toklen tukʼil kyaqʼun chman, iktzun tten ktel tnabʼila saq twitz Jehová (Hechos 24:16).
Bʼaʼn tuʼn tex t-xoʼna tkyaqil tiʼchaq at toklen tukʼil kyaqʼun chman. Uʼjinktza Hechos 19:19, 20 ex qʼonk twitza tiʼj tbʼanel techel kyaj kyqʼoʼn okslal toj tnejel syent abʼqʼi.
Naʼntza: Qa ma tzʼel tikʼuna saqchbʼil moqa junjuntl bʼinchbʼen at toklen tukʼil kyaqʼun chman, in bʼant tajbʼil Jehová tuʼna. Ex tuʼn jlu ktzalajel tanmi (Proverbios 27:11).
a Nya a t-xilen jlu qa kykyaqil txʼolbʼabʼil ex junjuntl xnaqʼtzbʼil at toklen tukʼil kyaqʼun chman. Noqtzun tuʼnj, in najbʼen kynabʼil okslal xnaqʼtzaʼn maj tuʼn Tyol Dios tuʼn tel kyikʼen tkyaqil saqchbʼil moqa junjuntl tiʼ at toklen tukʼil kyaqʼun chman (2 Corintios 6:17; Hebreos 5:14).