Kubʼ ttzʼibʼin apóstol Pablo jlu: «Wajbʼile tuʼn nbʼinchanteye aju bʼaʼn, pero aju mya bʼaʼn tkubʼ nwitze» (Romanos 7:21). ¿Ope kubʼ tnaʼn teya jun maj jlu? Qa ikju, kʼonil xnaq’tzb’il lu tiʼja tuʼntzun miʼn tkubʼ tbʼinchaʼna aju nya bʼaʼn.

•  Aju il tiʼj tuʼn tel tnikʼa tiʼj

•  Aju jaku bʼant tuʼna

•  Aju in tzaj kyqʼamaʼn junjuntl kuʼxun

 Nim maj jaku kubʼ qbʼinchan jun nya bʼaʼn noq tuʼnju in tzaj kyqʼamaʼn txqantl qe. Tuʼntzunju, in tzaj tqʼamaʼn Biblia jlu: «Qa ma txi kyukʼin kyibʼe kyukʼil xjal mya bʼaʼn, ok ktzakjel kynabʼle» (1 Corintios 15:33). Aju in tzaj kyqʼamaʼn txqantl teya moqa aju in nok tkeʼyina toj internet jaku chʼiy nya bʼaʼn toj tanmiya tuʼn ex jaku txi tbʼinchana aju kye in kubʼ kybʼinchaʼn (Éxodo 23:2).

 «Noq tuʼn ttena bʼaʼn kyukʼil txqantl ex tuʼn ttena kyukʼil, jakulo kubʼ tbʼinchana aju in bʼant kyuʼn tuʼntzun kytzalaj tiʼja» (Jeremy).

 Ximana tiʼj jlu: ¿Tiquʼn mas kwest jaku tzʼela teya tuʼn miʼn tkubʼ tbʼinchana jun nya bʼaʼn qa okx in ximana tiʼjju in tzaj kyqʼamaʼn txqantl? (Proverbios 29:25).

 Toj chʼin yol: Miʼn kyaj tkolina aju nimen tuʼna noq tuʼn tpaj aju jaku tzaj kyqʼamaʼn txqantl teya tuʼn tkubʼ tbʼinchana.

 Qeʼk tkʼuʼja tiʼjju nimen tuʼna. Qa nya segur taʼya tiʼjju nimen tuʼna, jaku tzʼoka te jun saqchbʼil toj kyqʼabʼ txqantl. Tbʼanel qa ma txi tbʼina aju consej lu tkux toj Biblia: «Kykeʼyin bʼaje tkyaqil, kytzyume aju bʼaʼn» (1 Tesalonicenses 5: 21). Qa in nel tnikʼa tiʼjju nimen tuʼna, mas fácil kʼelel teya tuʼn t-xi tbʼinchana aju bʼaʼn ex tuʼn miʼn tikʼa tibʼajju nimen tuʼna.

 Ximana tiʼj jlu: ¿Tiquʼn mas bʼaʼn tuʼn t-xi tnimana qe tkawbʼil Dios?

 «O tzʼel nnikʼe tiʼj, qa in xi nnimane qe tkawbʼil Dios ex qa mintiʼ in xi nbʼine aju in tzaj kyqʼamaʼn txqantl, mas in chin ok respetarine kyuʼn» (Kimberly).

 Jun tbʼanel techel tkux toj Biblia: Daniel. Tej tzmatoq kuʼxun Daniel, «kubʼ t-ximan» tuʼn tniman kyiʼj qe tley Dios (Daniel 1:8).

 Tzʼelx tnikʼa tiʼj alkyeqe tiʼchaq jaku kubʼ tzʼaqa toj. In yolin Biblia tiʼj «kyachbʼil kuʼxun», a t-xilen jlu, qa in kubʼ kynaʼn junjun achbʼil nim kyipun aj kyokx toj kykuʼxumal (2 Timoteo 2:22). Nya okx kyaj tuʼn kykubʼ tten tukʼil jun xjal, sino ax ikx kyajbʼil tuʼn tkubʼ kybʼinchaʼn aju in bʼant kyuʼn kyamiw ex tuʼn tbʼant qe tiʼchaq kyuʼn kyjunalx maske nya bʼantni kyten.

 Ximana tiʼj jlu: In tzaj tqʼamaʼn Biblia qa «teyle junjun nnoʼk tuj joybʼil tiʼj, ax tnabʼl in xmoxin te tuʼn tpon tkʼuʼj tiʼj ju mya bʼaʼn, ax tnabʼl in sbʼunte te» (Santiago 1:14). ¿Alkye achbʼil mas in pon tkʼuʼja tiʼj?

 «Tzʼelxix tnikʼa tiʼjju nya bʼaʼn mas in pon tkʼuʼja tiʼj. Jyonxa tqanil tiʼj alkye tten tuʼn miʼn tkubʼ tbʼinchaʼna nya bʼaʼn ex tzʼibʼinkuxa aju jaku tzʼonin tiʼja. Iktzun tten, aj tok weʼya twitz juntl nya bʼaʼn, ya ojtzqiʼn tuʼna alkye tten jaku tzʼexa twitz» (Sylvia).

 Jun tbʼanel techel tkux toj Biblia: David. Kyoj junjun maj xiʼ tqʼoʼn David ambʼil tuʼn tkubʼ tbʼinchan aju kyajbʼil txqantl ex aju tex tajbʼil. Pero el tnikʼ David tiʼjju nya bʼaʼn otoq bʼant tuʼn, el tiʼn xnaq’tzb’il kyiʼj ex ok tilil tuʼn, tuʼn miʼn tkubʼ tbʼinchan juntl maj. Xi tqʼamaʼn jlu te Jehová toj tnaj Dios: « Nman Dios, bʼinchama wanmiye tuʼn tok saqxix, bʼinchama wanmiye tuʼn tok akʼaj ex tuʼn tok tzʼaqlxix» (Salmos 51:10).

 Aya kbʼel ximente tiʼ kbʼantel tuʼna. In tzaj tqʼamaʼn Biblia jlu: «Miʼnwt kubʼ tiʼja tuʼnju mya bʼaʼn» (Romanos 12:21). A t-xilen jlu qa jaku tzʼok tilil tuʼna tuʼn miʼn tkubʼ tiʼja tuʼn nya bʼaʼn. Aya kbʼel ximente tuʼn tkubʼ tbʼinchaʼna aju bʼaʼn.

 Ximana tiʼj jlu: ¿Tiʼ kbʼantel tuʼna aj tok weʼya twitz jun tentación ex tuʼn tkubʼ tbʼinchan aju bʼaʼn?

 «In kubʼ nximane tiʼ kbʼel nnaʼne qa ma txi nqʼoʼne ambʼil tuʼn tkubʼ nbʼinchane jun nya bʼaʼn. ¿Kbʼelpe nnaʼne bʼaʼn? Jakulo, pero noq toj chʼin ambʼil. ¿Kbʼel nnaʼne bʼaʼn yajxitl? Miʼn, tuʼnju jaku tzaj nim nya bʼaʼn wiʼje. Tuʼntzunju, ¿tbʼanelpe tuʼn tbʼant wuʼne? Nya il tiʼj» (Sophia).

 Jun tbʼanel techel tkux toj Biblia: Pablo. El tnikʼ Pablo tiʼj qa pon tkʼuʼj tiʼj nya bʼaʼn pero ok tkwentin tibʼ. Ax qʼamante qa ok tkwentin t-ximlal ex qa ok tq’o’n te tmajen (1 Corintios 9:27).

 Toj chin yol: Noq alkyexku ambʼil jaku tzʼok weʼya twitz jun nya bʼaʼn, aya kbʼel ximente tiʼ tuʼn tbʼant tuʼna.

 Bʼaʼn tuʼn tzaj tnana qa nya te jumajx qe achbʼil. In tzaj tqʼamaʼn Melissa te 20 abʼqʼi jlu: «Akux txin qine ok nimku achbʼil te matij toj nwitze, atzun jaʼlo mintiʼx kyoklen te weye». Ex in tzaj tqʼamaʼntl: «Aj nximane tiʼj jlu, in nel nnikʼe tiʼj qa aqeju tentación in chin ok weye kywitz toj ambʼil jaʼlo che ikʼel. Kpol jun qiʼj jatumel ok chin tzalajele tuʼnju otoq tzʼel wikʼune qe nya bʼaʼn».