Qa in nok tilil tuʼna tuʼn tkubʼ tanqʼina aju in tzaj tqʼamaʼn Biblia ex tuʼn toka te tamiw Dios, in kubʼlo t-ximana tuʼn tbautisarina. ¿Pero mape bʼant ttena tuʼn tbʼant jlu tuʼna? ¿Tzeʼn jaku tzʼel tnikʼa tiʼj? a

Toj xnaqʼtzbʼil lu, kʼelel qnikʼ tiʼj jlu:

•  ¿Jniʼ tojtzqibʼila tuʼn tten?

•  ¿Tiʼ il tiʼj tuʼn tbʼant tuʼna jaʼlo?

•  Aju in tzaj kyqʼamaʼn junjuntl kuʼxun

 Aj tkubʼ t-ximana tuʼn tbautisarina, nya a t-xilen qa il tiʼj tuʼn tten nim tojtzqibʼila ik tzeʼn aj toka toj jun examen toj jun escuela. Pero aju il tiʼj tuʼn tbʼant tuʼna aju tuʼn tten tnabʼila ex tuʼn tok qeʼ tkʼuʼja tiʼj qa in tzaj t-xnaqʼtzaʼn Biblia axix tok (Romanos 12:1, La Biblia. Traducción del Nuevo Mundo). Jun techel:

•   ¿In nokpe qeʼ tkʼuʼja tiʼj qa at Dios ex qa a at toklen tuʼn tkʼulina te?

   In tzaj tqʼamaʼn Tyol Dios jlu: «Qa taj xjal tuʼn tpon laqʼeʼ ttxlaj Dios, ilxix tiʼj tuʼn tokslan qa at Dios, ex qa a Dios in tzaj qʼonte jun oyaj kye qeju in che jyon tiʼj» (Hebreos 11:6).

   Xjelinkuya jlu: «¿Tiquʼn qʼuqli nkʼuʼje tiʼj qa at Dios?» (Hebreos 3:4). «¿Tiquʼn il tiʼj tuʼn qkʼulin te?» (Apocalipsis 4:11).

   ¿Taja mas onbʼil? Uʼjinktza xnaqʼtzbʼil «¿Creación o evolución? Primera parte: ¿Por qué creer en Dios?».

•   ¿In nokpe qeʼ tkʼuʼja tiʼj qa tkyaqilju tkuʼx toj Biblia tzajni tukʼil Dios?

   In tzaj tqʼamaʼn Tyol Dios jlu: «Tkyaqil aju tzʼibʼan tuj Tuʼjil, a Dios o qʼmante ex at tajbʼen te xnaqʼtzbʼil qe, ex tuʼn qmayonjtz tuʼn miʼn qbʼinchante mya bʼaʼn, ex tuʼn tjiqumanjtz tiʼj qnabʼl, ex tuʼn qxnaqʼtzanjtz tuʼn qbʼet tuj tumelxix» (2 Timoteo 3:16).

   Xjelinkuya jlu: «¿Tiquʼn in nok qeʼ nkʼuʼje tiʼj qa nya kyximbʼetz xjal tkuʼx toj Biblia?» (Isaías 46:10; 1 Tesalonicenses 2:13).

   ¿Taja mas onbʼil? Uʼjinktza xnaqʼtzbʼil «¿Tzeʼn jaku tzʼonin Tyol Dios wiʼje? Tnejel plaj: Jyona kyiʼj qʼinumabʼil toj Tyol Dios».

•   ¿In nokpe qeʼ tkʼuʼja tiʼj qa in najbʼen congregación tuʼn Jehová tuʼn tbʼant tajbʼil?

   In tzaj tqʼamaʼn Tyol Dios jlu: «Nimanxwit tbʼi Dios kyuʼn kykyaqil okslal noq tuʼn Jesucrist tuj tkyaqil tabʼqʼiyil te jumajx» (Efesios 3:21).

   Xjelinkuya jlu: «¿In kubʼpe nximane qa tkyaqilju xnaqʼtzbʼil in tzaj qʼamaʼn kyoj chmabʼil in tzaj tukʼil Jehová moqa in kubʼ nximane qa kyukʼil xjal?» (Mateo 24:45). «Qa at maj mintiʼ in bʼant tuʼn kyxiʼ nmane kyoj chmabʼil, pero in tzaj kyqʼoʼn npermise, ¿tiʼ in bʼant wuʼne? ¿In chinxe moqa in chin kyaj tene ja?» (Hebreos 10:24, 25).

   ¿Taja mas onbʼil? Uʼjinktza xnaqʼtzbʼil «¿Tiquʼn tbʼanel tuʼn qxiʼ kyoj chmabʼil?».

 Nya il tiʼj tuʼn toka te tzʼaqli tuʼn tbautisarina. Noqtzun tuʼnj, il tiʼj tuʼn tkubʼ tyekʼina qa taja tuʼn tkubʼ tbʼinchaʼna aju tqʼama jun salmista: «Kypaʼmil kyibʼe tiʼj mya bʼaʼn ex kybʼinchame bʼaʼn» (Salmo 34:14). Ximana tiʼj jlu:

•   ¿In kubʼpe tanqʼina qe tkawbʼil Jehová?

   In tzaj tqʼamaʼn Tyol Dios jlu: «Kybʼinchame aju bʼaʼn ik tzaʼnx in tmaʼn kyanmiye» (1 Pedro 3:16).

   Xjelinkuya jlu: «¿Tzeʼn o kubʼ nyekʼine qa in najbʼen nnabʼile wuʼne tuʼn tel nnikʼe tiʼj alkyeju bʼaʼn ex alkyeju mya bʼaʼn?» (Hebreos 5:14). «¿In tzajpe nnaʼne jun ambʼil jatumel mintiʼ kubʼ nbʼinchaʼne jun nya bʼaʼn ik tzeʼn tzaj kyqʼamaʼn txqantl kuʼxun weye? ¿In che oninpe wamiwe wiʼje tuʼn tkubʼ nbʼinchaʼne aju bʼaʼn?» (Proverbios 13:20).

   ¿Taja mas onbʼil? Uʼjinktza xnaqʼtzbʼil «¿Tzeʼn jaku bʼaj nxnaqʼtzane nximbʼetze?».

•   ¿In nelpe tnikʼa tiʼj qa il tiʼj tuʼn t-xi tqʼoʼna tajlal te Jehová?

   In tzaj tqʼamaʼn Tyol Dios jlu: «Teyle junjun qe ok tqʼaʼ tajlal twitz Dios tiʼj tbʼinchbʼen» (Romanos 14:12).

   Xjelinkuya jlu: «¿Mintiʼpe in kubʼ nsbʼun wibʼe ex mintiʼpe in che kubʼ nsbʼuʼne txqantl?» (Hebreos 13:18). «¿Tiʼ in bʼant wuʼne aj wel txalpaje? ¿In jatzpe nqʼamaʼne wile? ¿In kubʼ wewine? ¿Moqa in nok nqʼoʼne kypaj txqantl?» (Proverbios 28:13).

   ¿Taja mas onbʼil? Uʼjinktza «¿Qué debería hacer cuando cometo un error?».

•   ¿In nokpe t-xqʼuqina tamiwbʼila tukʼil Jehová?

   In tzaj tqʼamaʼn Tyol Dios jlu: «Che laqʼexe ttxlaj Dios, ax ikx te ktzajel laqʼeʼ kyukʼile» (Santiago 4:8).

   Xjelinkuya jlu: «¿Tiʼ in bʼant wuʼne tuʼn wok laqʼeʼye ttxlaj Jehová? ¿Kukxpe in jaw wuʼjine Biblia?» (Salmo 1:1, 2). «¿Tkyaqilpe qʼij in chin naʼne Dios?» (1 Tesalonicenses 5:17). «¿In xipe nqʼamaʼne te tiʼ in kubʼ nximane? ¿Kʼujlaʼnpe Jehová kyuʼn wamiwe?» (Salmo 15:1, 4).

   ¿Taja mas onbʼil? Uʼjinktza xnaqʼtzbʼil «¿Tzeʼn jaku tzʼonin Tyol Dios wiʼje? Tkabʼ plaj: Xnaqʼtzanx tibʼa tuʼn ttzalaja tiʼjju in kubʼ tuʼjina toj Tyol Dios» ex «¿Tiquʼn nim toklen tuʼn qnaʼn Dios?».

 NABʼIL: Qa ma jaw tuʼjina capítulo 37 te libro Lo que los jóvenes preguntan. Respuestas prácticas (volumen 2), jaku tzʼonin tiʼja tuʼn tbʼaj tbʼinchaʼn ttena tuʼn tbautisarina. Bʼaʼn tuʼn t-ximana kyiʼj xjel tkuʼx toj t-xaq 308 ex 309.