KYXJEL KUʼXUN
¿Yajtzun qa il tiʼj tuʼn nxnaqʼtzane atz njaye?
Toj ambʼil jaʼlo, ateʼ nim kuʼxun atz in che xnaqʼtzan kyja. ¿Axpe jlu in bʼaj tiʼja? ¿Tiʼ jaku tzʼonin tiʼja tuʼn tok tqʼoʼn twiʼya tiʼj t-xnaqʼtzbʼila? Bʼaʼn tuʼn tok tqʼoʼn twiʼya kyiʼj junjun nabʼil lu. a
Bʼaʼn tuʼn t-xi tbʼiʼna jweʼ nabʼil lu
Ximinkuya tiʼ kxel tbʼinchaʼna. Bʼaʼn tuʼn tkubʼ t-ximana alkye or tuʼn t-xnaqʼtzana ik tzeʼn in bʼant tuʼna aj t-xiʼya toj escuela. Ax ikx, ximana tiʼj alkye or che kbʼel tbʼinchaʼna tdebera, qe aqʼuntl in che bʼant tuʼna tjaya moqa junjuntl tiʼchaq nim toklen. Ex qa il tiʼj tuʼn tbʼant junjun chʼixpubʼil tuʼna, bʼaʼn tuʼn t-xi tbʼinchaʼna.
Texto nim toklen: «Ex kybʼinchame tkyaqil tuj tumel ex tuj ttxolil» (1 Corintios 14:40).
«Bʼaʼn tuʼn tkubʼ t-ximana tiʼ kbʼantel tuʼna junjun qʼij ik tzeʼn aj t-xiʼya toj escuela. Toj escuela at jun horario tuʼn qxnaqʼtzan, ax jlu tuʼn tbʼant tuʼna tjaya» (Katie).
Ximana tiʼj jlu: ¿Tiquʼn bʼaʼn tuʼn tkubʼ tbʼinchaʼna jun horario ex tuʼn tkubʼ tqʼoʼna toj jun lugar jatumel tuʼn tok tqʼoʼn twitza tiʼj?
Bʼinchanxa qe tiʼchaq. Qa taja tuʼn tok tnabʼila, il tiʼj tuʼn t-xi tbʼinchaʼna qe tiʼchaq maske nya taja ex mintiʼ tuʼn tkyaj tqʼoʼna te yajxitl.
Texto nim toklen: «Tzʼok tililx kyuʼne ex miʼn che oke kyʼaj» (Romanos 12:11).
«Kwest tuʼn t-xi qbʼinchaʼn qe tiʼchaq. Mas fácil tuʼn tkubʼ qximen: ‹Kxel nbʼinchaʼne yajxitl›. Pero yajxitl, mintiʼ in kubʼ tbʼinchaʼna ex in tzaj bʼaj tkʼuʼja tuʼnju otoq tzikʼ ambʼil» (Alexandra).
Ximana tiʼj jlu: ¿Tiʼ jaku tzʼonin tiʼja qa ma kubʼ tbʼinchaʼna tdebera toj ax lugar ex toj ax or?
Jyonxa jun lugar jatumel tuʼn t-xnaqʼtzana. Bʼaʼn tuʼn txi tiʼna ttxlaja tkyaqilju kʼajbʼel teya. Bʼaʼn tuʼn tbʼaj tbʼinchaʼna lugar ik tzeʼn taja, pero xqʼuqin tibʼa tuʼn miʼn tikʼ jtana. Nim toklen tuʼn t-xnaqʼtzana ex nya tuʼn tjtana. Qa mintiʼ jun lugar jatumel tuʼn t-xnaqʼtzana, jaku kubʼ tbʼinchaʼna jun toj cocin moqa toj jun kwart.
Texto nim toklen: «Aju xjal nej in kubʼ ten ximal tiʼj alkye tuʼn tbʼant tuʼn, bʼaʼn nneʼl te te» (Proverbios 21:5).
«Bʼaʼn tuʼn tkyaj tqʼoʼna qe tiʼchaq jaku tzʼel kyiʼn ambʼil teya toj juntl lugar ik tzeʼn pelot, qe videojuego, jun instrumento ex junjuntl tiʼchaq. Ax ikx jaku kyaj tqʼoʼna tcelulara toj vibrador. Jaku tzʼonin jlu tiʼja» (Elizabeth).
Ximana tiʼj jlu: ¿Alkyeqe chʼixpubʼil jaku bʼant tuʼna toj lugar jatumel in xnaqʼtzana tuʼntzun tok tqʼoʼn twiʼya tiʼjju in bʼant tuʼna?
Miʼn tzʼok tqʼoʼn twiʼya kyiʼj junjun tiʼchaq: Bʼaʼn tuʼn tok tqʼoʼn twiʼya tiʼjju in xnaqʼtzana tiʼj ex miʼn txi tbʼinchaʼna junjuntl tiʼchaq. Qa ma bʼant jlu tuʼna, mlaylo tzʼel txalpaja ex mlay txi tiʼn ambʼil tuʼn tbʼant tdebera.
Texto nim toklen: «Tzʼajbʼenxwit tkyaqil qʼij kyuʼne tuʼn kybʼinchanteye bʼaʼn, porke mya bʼaʼn ju tqʼijlalil jaʼlo» (Efesios 5:16).
«Mintiʼtoq in nok nqʼoʼn nwiʼye kyiʼj junjuntl tiʼchaq tuʼn celular. Xi nnajsaʼne nim ambʼil kyiʼj tiʼchaq nya nim kyoklen» (Olivia).
Ximana tiʼj jlu: ¿Tiʼ jaku bʼant tuʼna tuʼn tok tqʼoʼn twiʼya chebʼe chebʼe tiʼj jun tiʼ in bʼant tuʼna?
Tzʼojlana jun rat. Bʼaʼn tuʼn texa bʼetil, tuʼn t-xiʼya tiʼj bisiklet moqa tuʼn tbʼinchana ejercicio. Bʼinchama jun tiʼ jaku tzʼonin tiʼja. «Pero tnejel bʼinchankuya tdebera», atzun jlu in tzaj tqʼamaʼn libro School Power. Ex in tzaj tqʼamaʼntl jlu: «Mas ktzalajela kyiʼj junjuntl tiʼchaq kxel tbʼinchaʼna qa tnejel ma kubʼ tbʼinchaʼna aju mas nim toklen».
Texto nim toklen: «Mas bʼaʼn tuʼn qojlan chʼin twitzju tuʼn qaqʼunan nimxix, tuʼnju ik tten jlu ik tzeʼn qaj tuʼn ttzyet kyqʼiqʼ quʼn tuʼn qqʼabʼ» (Eclesiastés 4:6, La Biblia. Traducción del Nuevo Mundo).
«Chʼixme tkyaqil maj, in tzaj xnaqʼtzan qe toj escuela tuʼn tbʼant qtocarin tiʼj jun instrumento moqa tuʼn qdibujarin. Mintiʼ el nnikʼe tiʼj qa ngantoqe tiʼchaq lu tzmaxi tej ya mintiʼ xi nbʼinchaʼne. Tuʼntzunju, tbʼanel qa ma txi qbʼinchaʼn jun tiʼ jaku qo tzalaj tuʼn» (Taylor).
Ximana tiʼj jlu: ¿Tiʼ jaku bʼant tuʼna aj tojlana jun rat ex jaku tzʼonin tiʼja tuʼn tok tqʼoʼna twiʼya tiʼj tdebera?
a Junxichaq tumel in tzaj qʼoʼn xnaqʼtzbʼil kye kuʼxun atz kyja. Bʼaʼn tuʼn tok tqʼoʼn twiʼya kyiʼj nabʼil tkuʼx toj xnaqʼtzbʼil lu aqeju jaku che onin tiʼja.