In nok kychmon kyibʼ testigos de Jehová kabʼe maj toj seman kyoj Ja te Chmabʼil. ¿Tiʼ in bʼant atz? ¿Jakupe che onin chmabʼil lu tiʼja?

•  ¿Tiʼ in bʼant toj jun Ja te Chmabʼil?

•  ¿Tiquʼn bʼaʼn tuʼn t-xiʼya kyoj chmabʼil?

•  Aju in tzaj kyqʼamaʼn junjuntl kuʼxun

 In najbʼen Ja te Chmabʼil tuʼn ttzaj qkʼamoʼne xnaqʼtzbʼil tiʼj Tyol Dios aju jaku tzʼonin qiʼje. Jaku che onin chmabʼil lu tiʼja:

•   Tuʼn tok tojtzqiʼna aju axix tok tiʼj Dios.

•   Tuʼn tel tnikʼa kyiʼj tiʼchaq in che ikʼ toj ambʼil jaʼlo.

•   Tuʼn toka te tbʼanel xjal.

•   Ex tuʼn kykanet axix tok tamiwa.

 Jaku tzʼonin xnaqʼtzbʼil tiʼja. Aʼyeju nabʼil toj Tyol Dios in kubʼ kyxnaqʼtzaʼn testigos de Jehová jaku che onin tiʼja tuʼn tten tnabʼila (Proverbios 4:5). Toj juntl yol, jaku tzʼonin Tyol Dios tiʼja tuʼn tjaw tjyoʼna aju mas bʼaʼn. Ax ikx in tzaj tqʼoʼn tzaqʼwebʼil kyiʼj junjun xjel ik tzeʼn jlu:

•   ¿Tiquʼn in qo anqʼin?

•   ¿Tuʼnpe Dios in che tzaj yajbʼil?

•   ¿Atzpe in kubʼaj tkyaqil aj tkyim jun xjal?

 Atzun kybʼi junjun chikʼbʼabʼil lu in netz kyoj chmabʼil aj tkubʼaj seman:

•   ¿Tiquʼn kjel qqʼoʼn ambʼil te Tyol Dios tuʼn ttzaj tyekʼin qbʼe?

•   ¿Jatumel qo jyol onbʼil aj ttzaj nya bʼaʼn qiʼj?

•   ¿Tiʼ in bʼant tuʼn Tkawbʼil Dios tuʼn tonin qiʼj?

 «Ul jun wukʼile toj tja xnaqʼtzbʼil toj jun chmabʼil. Kubʼ qeʼ kyukʼil toj njaye ex xi qqʼoʼne junjun uʼj te. Tzaj tqʼamaʼn weye qa jaw labʼin tiʼj tzaqʼwebʼil xi kyqʼoʼn xjal kyiʼj junjun xjel e tzaj qanin. Ax ikx tzaj tqʼamaʼn qa mintiʼ qe uʼj toj t-iglesia tuʼn kyxnaqʼtzan ik tzeʼn qe» (Brenda).

 ¿Ojtzqiʼn jlu tuʼna? Nya chjoʼn tuʼn qokx toj Ja te Chmabʼil ex mintiʼ in jaw chmet pwaq.

 Jaku che onin qeju in che pon toj chmabʼil tiʼja. In tzaj tqʼamaʼn Xjan Uʼj qa in nok kychmon kyibʼ okslal tuʼntzun tbʼaj kyqʼuqbʼaʼn kykʼuʼj kyxolx (Hebreos 10:24, 25). Maske at ikʼbʼil toj ambʼil jaʼlo, in qo tzalaj aj qten kyukʼil xjal kyaj tuʼn tel mas kynikʼ tiʼj Dios ex kyaj tuʼn kyonin kyiʼj txqantl.

 «At maj in chin bʼisune ex otoq chin sikte aj tkubʼaj qʼij, pero in chin tzalaje aj ntene kyukʼil xjal in che pon toj Ja te Chmabʼil. Aj in chin meltzʼaje njaye, in chin tzalaje ex in kubʼ nnaʼne qa at wipumale tuʼn tbʼant junjuntl tiʼ wuʼne toj juntl qʼij» (Elisa).

 ¿Ojtzqiʼn jlu tuʼna? Twitz tkyaqil Txʼotxʼ at mas te 120 mil kʼloj okslal kye testigos de Jehová, ex mas te 60 mil lugar jatumel in nok kychmon kyibʼ. Tuʼnju in chʼiy kybʼet xjal in che pon kyoj chmabʼil, in jaw bʼinchet junlo 1,500 Ja te Chmabʼil toj junjun abʼqʼi. a