¿In tzaj kyqʼoʼn tmana ambʼil tuʼn tajbʼen redes sociales tuʼna? Qa ikju, aju xnaqʼtzbʼil lu kʼonil tiʼj toj oxe tten.

Toj xnaqʼtzbʼil lu, kʼelel tnikʼa tiʼj jlu:

•  ¿Jakupe tzʼel kyiʼn redes sociales ambʼil wiʼje?

•  ¿Tiʼ jaku tzaj wiʼje kyuʼn redes sociales qa mintiʼ ma chin ktane?

•  ¿Tiʼ nya bʼaʼn jaku kubʼ nnane kyuʼn redes sociales?

•  Aju in tzaj kyqʼamaʼn junjuntl kuʼxun

 In nok redes sociales ik tzeʼn aj tjax jun xjal tibʼaj jun chej, qa mintiʼ xbʼant tuʼn, jaku tzaj jun nya bʼaʼn tiʼj. Ax ikx aj kyajbʼen qe redes sociales, jaku tzaj nya bʼaʼn tiʼja kyuʼn qa mintiʼ ẍe ajbʼen tuʼna toj tumel.

 «At maj in kubʼ nximane tuʼn tajbʼen redes sociales wuʼne toj chʼin ambʼil, pero aj tok nkeʼyine, otoq tzikʼ nim or. Jaku che ok redes sociales te jun vicio ex jaku tzʼel kyiʼn nim ambʼil qiʼj» (chi Joanna).

 ¿Ojtzqiʼn jlu tuʼna? O che kubʼ bʼinchaʼn qe redes sociales tuʼn kyok te jun vicio. Ojtzqiʼn kyuʼn qeju bʼinchal kye qa at jun página te internet mas in najbʼen kyuʼn xjal, in nok tilil kyuʼn empresa tuʼn ttzaj kychjoʼn mastl pwaq tuʼntzun tkubʼ kyqʼoʼn tqanil kykʼaʼẍ toj.

 Xjelinkuya jlu: «¿Junratpe in nex ambʼil qa in che ajbʼen redes sociales wuʼne? ¿Jakupe tzʼajbʼen ambʼil wuʼne toj tumel tuʼn kybʼant junjuntl tiʼchaq mas tbʼanel?».

 Aju jaku bʼant tuʼna. Aj kyajbʼen redes sociales tuʼna, ximinkuya jniʼ ambʼil kʼajbʼel ex miʼn tzikʼa tibʼaj ambʼil aju.

 «Kubʼ nqʼoʼne jun crónometro toj ntelefonoye tuʼn kykubʼ tyupin qe aplicación aj tikʼ ambʼil otoq kubʼ nximane. Ok tilil wuʼne tuʼn njukʼunte wibʼe kyiʼj redes sociales ex ya in che ajbʼen wuʼne toj tumel. Ax ikx ya mintiʼ in nex bʼaj nqʼije kyiʼj» (chi Tina).

 Texto nim toklen: «Tzʼajbʼenxwit tkyaqil qʼij kyuʼne» toj tumel (Efesios 5:16).

 Chʼixmi kykyaqil aj xnaqʼtzal in kyqʼamaʼn qa il tiʼj tuʼn kyktan kuʼxun 8 or, pero mintiʼ in bʼant jlu kyuʼn nimku kuʼxun. Ex mintiʼ in bʼant kyuʼn tuʼnju in najbʼen redes sociales kyuʼn te qonikʼen.

 «In nok nqʼoʼne nwitze tiʼj teléfono naʼmxtoq nxiʼye ktal tuʼn tok nkeʼyine qa otoq jax qʼoʼn jun tiʼ nim toklen kyuʼn txqantl. Kukx in nok tilil wuʼne tuʼn tkyaj ntzaqpiʼne vicio lu» (chi María).

 ¿Ojtzqiʼn jlu tuʼna? Qa mintiʼxix xqo ktan, jaku tzaj ansiedad ex depresión qiʼj. Tqʼama jun sicóloga Jean Twenge tbʼi, qa mintiʼ in che tzalaj xjal ex qa mintiʼ in kubʼ kynaʼn bʼaʼn qa mintiʼxix ẍe ktan. Ax ikx tqʼama qa «aj tikʼ ambʼil», jaku tzaj «nya bʼaʼn tiʼj qximbʼetz qa mintiʼxix in qo ktan». a

 Xjelinkuya jlu: «Jteʼ or in chin ktane te qonikʼen? ¿In che ajbʼenpe redes sociales wuʼne toj ambʼil aj nxiʼye ktal?».

 Aju jaku bʼant tuʼna. Miʼn kyaj tqʼoʼna célular moqa tablet nqayin ttxlaja te qonikʼen. Qa jaku bʼant, miʼn tzʼok tqʼoʼna twitza kyiʼj pantalla kabʼe or naʼmxtoq t-xiʼya ktal. Qa taja tuʼn tjaw kʼasuna tuʼn jun alarma, jaku tzʼajbʼen jun tuʼna, pero nya aju tkuʼx toj teléfono moqa toj tablet.

 «At maj, yaj in chinxe ktal tuʼnju in nok qʼoʼne nwitze kyiʼj junjun tiʼchaq toj teléfono. Pero waje tuʼn tkyaj ntzaqpiʼne jlu. Qa waje tuʼn tok nnabʼle, il tiʼj tuʼn tbʼant junjun tiʼchaq wuʼne toj tumel. Tuʼntzunju, kʼokel tilil wuʼne tuʼn nxiʼye jtal mas lwey tuʼntzun tten wipumale toj juntl qʼij» (chi Jeremy).

 Texto nim toklen: Bʼaʼn tuʼn tel tnikʼa tiʼj «alkyeju mas bʼaʼn» (Filipenses 1:10).

 Jaw jun encuesta ex tzaj kyqʼamaʼn junjun kuʼxun «qa in kubʼ kynan bʼis ex qa mintiʼ qʼuqbʼil kykʼuʼj». In bʼaj jlu tuʼnju in najbʼen redes sociales kyuʼn. In tzaj tqʼamaʼn aj qʼanil ex sicólogo Leonard Sax jlu: «Qa ma tzʼajbʼen redes sociales tuʼna toj nim ambʼil ex qa ma tzʼok tmojbʼan tibʼa kyukʼil txqantl ok ktzajel nim tbʼisa». b

 «Nimku maj in nok qmojbʼaʼne aju in bʼant quʼne tukʼilju in bʼant kyuʼn txqantl kuʼxun ex mas in bʼaj jlu kyoj redes sociales. Jaku txi tnajsaʼna nim or qa ma tzʼok tena keʼyilte kyfoto txqantl ex jaku tzʼok tmojbʼan tanqʼibʼila tukʼil kyanqʼibʼil txqantl moqa in nok tqʼoʼn twitza kyiʼj tamiwa in che tzalaj atzun teya mintiʼ» (chi Phoebe).

 ¿Ojtzqiʼn jlu tuʼna? Maske in che onin qe redes sociales qiʼj tuʼn qyolin kyukʼil qamiw, pero aju mas tbʼanel qa ma qo ten junx kyukʼil tuʼn qyolin. At jun aj xnaqʼtzal tiʼj vicio tiʼj tecnología Nicholas Kardaras tbʼi, tqʼama jlu: «Mintiʼ in che onin qe tecnología qiʼj tuʼn tok qqʼoʼn qwitz tiʼxix in kubʼ kynan qe qamiw». Ax ikx in tzaj tqʼamaʼn qa «mintiʼxix in nonin qiʼj tuʼn t-xi qqʼamaʼn tiʼxix tkux toj qanmi». c

 Xjelinkuya jlu: «¿In kubʼpe nnane qa njunalxe atine aj tok nqʼoʼn nwitze tiʼjju in bʼant kyuʼn wamiwe? At maj in nok nqʼoʼn nwitze tiʼj toj redes sociales qa in che tzalajxix wamiwe, aj tok nmojbʼaʼne aju in bʼant kyuʼn tukʼilju in bʼant wuʼne, ¿in kubʼpe nximane qa aburrid taʼ wanqʼibʼile? Ex qa ma jax nqʼoʼne jun tiʼ kyoj redes sociales, ¿in tzajpe nbʼise qa mintiʼ jun ma txi qʼonte ‹me gusta› tiʼj?».

 Aju jaku bʼant tuʼna. Qʼonka tilil tuʼn tkyaj ttzaqpiʼna qe redes sociales toj jun ambʼil, ik tzeʼn toj junjun qiʼj, toj jun seman moqa toj jun xjaw. Bʼaʼn tuʼn tel tpaʼna ambʼil tuʼn ttena mas kyukʼil tamiwa ex tuʼn tyolina kyukʼil. Maslo ok ktzalajela ex mlay tzaj bʼaj tkʼuʼja qa ma kyaj ttzaqpiʼna qe redes sociales toj jun ambʼil.

 «Tej in najbʼentoq redes sociales wuʼne el nnikʼe tiʼj qa mastoq in nok nqʼoʼn nwiʼye tiʼjju in bʼant kyuʼn txqantl. Pero tej kykubʼ nborrarine qe cuentas te redes sociales, kubʼ nnane qa el qʼiʼn jun iqtz wibʼaje. Ex in nel nnikʼe tiʼj qa attoq mas ambʼil weye tuʼn tbʼant junjun tiʼchaq wuʼne» (Chi, Briana).

 Texto nim toklen: «Teyle junjun tuʼn tikʼ twitz tiʼj tex taqʼunbʼen; kyjaʼtzun bʼaʼn tuʼn ttzalaj tiʼj taqʼunbʼen ex mya tiʼj taqʼunbʼen juntl» (Gálatas 6:4).