KYXJEL KUʼXUN
¿Jun ilpe aj tkubʼ ten jun xinaq tukʼil juntl xinaq ex jun xuʼj tukʼil juntl xuʼj?
«Akux in chin chʼiye, jun tiʼ kwest ela toj nwitze aju tej ten ngane kyiʼj qʼa. Kubʼ nximane qa noq toj jun ambʼil ktel jlu, pero kukx in kubʼ nnaʼne jlu jaʼlo» (Chi David te 23 abʼqʼi)
Okslal David ex taj tuʼn tnimen te Dios. ¿Jakupe japun tuʼn jun xjal ik tzeʼn te David aju in tzaj tqʼamaʼn Dios? ¿Tiʼ in tzaj tqʼamaʼn Dios tiʼjju tuʼn tkubʼ ten jun xinaq tukʼil juntl xinaq ex jun xuʼj tukʼil juntl xuʼj?
¿Tiʼ in tzaj tqʼamaʼn Tyol Dios tiʼj jlu?
Aj tbʼet ambʼil, in chʼexpaj kyximbʼetz xjal ex kykostumbr tiʼjju tuʼn tkubʼ ten jun xinaq tukʼil juntl xinaq, moqa ichan, ex jun xuʼj tukʼil juntl xuʼj, moqa qya. Noqtzun tuʼnj, aqoʼye axix tok okslal mintiʼ in qo ok lepeʼye tiʼj kyximbʼetz ex kykostumbr xjal. Ex mintiʼ in qo jaw sutine «tuʼnju xnaqʼtzbʼil in kyqʼoʼn xjal ik tten ik tzaʼn kyqʼiqʼ» (Efesios 4:14). Sino atz in qo ok lepeʼye tiʼjju in tzaj tqʼamaʼn Biblia tiʼj bʼinchbʼen lu ex tiʼj alkyexku juntl bʼinchbʼen.
Aj tyolin Biblia tiʼjju tuʼn tkubʼ ten jun xinaq tukʼil juntl xinaq ex jun xuʼj tukʼil juntl xuʼj (moqa tiʼj homosexualidad), clarxix taʼ aju in tzaj tqʼamaʼn. Qqʼonk qwitz tiʼj:
«Miʼn kubʼ tana tukʼil jun xinaq ik tzaʼn in kubʼ tana tukʼil xuʼj» (Levítico 18:22).
«Ik tzaʼnx tajbʼil kyanmi; [...] e jeʼx ttzoqpiʼn Dios tuʼn kybʼinchante aju tajbʼil kychibʼjal elni tiʼj kwent; qe xuʼj kyaj kyqʼoʼn kymojbʼabʼl kyibʼ tukʼil kychmil, ex kybʼincha aju mya qʼoʼn kye xjal tuʼn kybʼinchante» (Romanos 1:24, 26).
«Miʼn che tzpete tiʼj; qeju in che yaẍin, qe kʼulul kywitz qe tilbʼilal, qe aj pajil, qeju nnoʼk kyqʼon kyibʼ te xuʼj, qe xinaq in pon kykʼuʼj tiʼj xinaq, qe eleqʼ, qeju in pon kykʼuʼj tiʼj nimku, qe kʼal qʼeʼn, qeju in che yasun ex qeju in che elqʼan tuʼn sbʼubʼl, kykyaqil jlu mintiʼ kyoklen tiʼj tkawbʼil Dios» (1 Corintios 6:9, 10).
O che bʼaj bʼinchaʼn tkawbʼil Dios tuʼn tajbʼen kye kykyaqil xjal. Noq tiʼxku nya bʼaʼn tajbʼil jun xjal at, il tiʼj tuʼn tok tilil tuʼn tuʼn tjakʼunte tibʼ tuʼntzun miʼn tkubʼ tbʼinchaʼn aju nya bʼaʼn toj twitz Dios (Colosenses 3:5).
¿Ape t-xilen jlu qa...?
¿Ape t-xilen jlu qa in tzaj tqʼamaʼn Biblia tuʼn tel qikʼun jun xinaq taj tuʼn tkubʼ ten tukʼil juntl xinaq?
Miʼn. Tuʼnju in tzaj t-xnaqʼtzaʼn Tyol Dios qa mintiʼ tuʼn tel qikʼun nijun xjal. Nya oʼkxju, ax ikx in tzaj tqʼamaʼn qe tuʼn tok tilil quʼn tuʼn tten mujbʼabʼil qxol kyukʼil kykyaqil xjal noq tzeʼnxku kyanqʼibʼil (Hebreos 12:14). Tuʼntzunju, nya bʼaʼn tuʼn qxmayin, tuʼn qok ten qʼojil nix tuʼn tok qbʼinchaʼn junjuntl nya bʼaʼn kyiʼj xjal lu.
¿Ape t-xilen jlu qa in nel kyikʼun axix tok okslal qe ley in tzaj kyqʼoʼn ambʼil tuʼn kykubʼ mojeʼ qe homosexual?
Ik tzeʼn in tzaj tqʼamaʼn Biblia, oʼkx in tzaj tqʼoʼn Dios ambʼil tuʼn tkubʼ mojeʼ jun xinaq tukʼil jun xuʼj (Mateo 19:4-6). Noqtzun tuʼnj, mintiʼ in che onin ex mintiʼ in nel kyikʼun axix tok okslal qe ley in kubʼ qʼoʼn kyiʼj mejebʼleʼn homosexual. Aj tetz qʼoʼn jun ley tuʼn tonin kyiʼj homosexual at toklen jlu tukʼil política. Ex in tzaj tqʼamaʼn Tyol Dios tuʼn miʼn qonin kyiʼj tiʼchaq at toklen tukʼil política (Juan 18:36).
¿Yajtzun qa...?
Pero, ¿yajtzun qa ya in pon tkʼuʼj jun xinaq tiʼj jun xinaq ex jun xuʼj tiʼj jun xuʼj? ¿Jakupe chʼexpaj xjal lu?
Jaku chʼexpaj. In tzaj tqʼamaʼn Tyol Dios qa atzun jlu bʼant kyuʼn junjun xjal toj tnejel syent abʼqʼi. Toj uʼj xi ttzʼibʼin Pablo kye aj Corinto, tqʼama qa mlay che ten xinaq in pon kykʼuʼj kyiʼj xinaq tjaqʼ Tkawbʼil Dios. Ax ikx tqʼamatl jlu: «Iktzun kyten junjun kyeye ojtxi» (1 Corintios 6:11).
Tej tkyaj kytzaqpiʼn xjal lu nya bʼaʼn kybʼinchbʼen, ¿ape t-xilen jlu qa ya mintiʼ pon tkʼuʼj jun xinaq tiʼj juntl xinaq ex jun xuʼj tiʼj juntl xuʼj? Miʼn. In tzaj tqʼamaʼn Tyol Dios jlu: «Ma tzʼok kyqʼoʼne ju akʼaj kytene kukx tuʼn kyoke te akʼaj» (Colosenses 3:10). Tuʼn tchʼexpaj kymod xjal lu, iltoq tiʼj tuʼn kukx tbʼant chʼixpubʼil kyuʼn.
Pero, ¿yajtzun qa in nok tilil tuʼn jun xinaq tuʼn t-xi tbʼiʼn qe tley Dios pero kukx in pon tkʼuʼj tiʼj juntl xinaq?
Ik tzeʼn in bʼaj tukʼil alkyexku nya bʼaʼn qajbʼil, ax xjal kbʼel ximente qa kxel tqʼoʼn ambʼil te nya bʼaʼn tajbʼil moqa miʼn. ¿Tiʼtzun jaku bʼant tuʼn jun xjal tuʼn tjakʼunte tibʼ? In tzaj tqʼamaʼn Biblia jlu: «Che bʼete ik tzaʼn tajbʼil Xewbʼaj Xjan tuʼntzun miʼn t-xi kynimane aju tajbʼil kychibʼjale» (Gálatas 5:16).
Mintiʼ in tzaj tqʼamaʼn versículo lu qa ya mlay ten nya bʼaʼn tajbʼil jun xjal. Sino in tzaj tqʼamaʼn qa jaku ten tipumal jun xjal tuʼn tkubʼ kyiʼj nya bʼaʼn tajbʼil ex tuʼn miʼn tkubʼ tbʼinchaʼn, qa ma txi t-xnaqʼtzaʼn tibʼ tuʼn t-xnaqʼtzan tiʼj Biblia ex qa kukx ma naʼn Dios.
Tqʼama David, aju ma qo yolin tiʼj tej saj tzyet xnaqʼtzbʼil, qa ten tipumal tuʼn tkubʼ kyiʼj nya bʼaʼn tajbʼil tej tyolin tiʼj jlu kyukʼil ttat. In tzaj tqʼamaʼntl jlu: «El jun matij iqtz wibʼaje, maswitlo in tzalaje tiʼj nkuxumale noqwit in yolin naje tiʼj jlu kyukʼil ntate».
Mas in qo tzalaj aj t-xi qbʼiʼn qe tkawbʼil Jehová. Qʼuqli qkʼuʼj tiʼj qa «tzʼaqlxix qe ex in kytzalajsaʼn qanmi», ex qa ma che japun quʼn, ok ktzajel qkʼamoʼn nimxix kʼiwlabʼil (Salmo 19:8, 11).
