•  ¿Tiquʼn kwest tuʼn tok nqʼoʼn nwiʼye tiʼj jun tiʼ?

•  ¿Tzeʼn jaku tzʼok nqʼoʼne nwiʼye tiʼjju in bʼant wuʼne?

•  Aju in tzaj kyqʼamaʼn junjun kuʼxun

 «In jaw wuʼjine nim libro ojtxe, pero ya mintiʼ in bʼant jlu wuʼne. Ex aj t-xi nkeʼyine qa matij jun párrafo, ya mintiʼ in jaw wuʼjine» (Elaine).

 «Qa chebʼe in reproducirin jun video, jun rat naj in kubʼ nchʼexpuʼne tvelocidad» (Miranda).

 «Aj tkubʼ nbʼinchaʼne jun tiʼ nim toklen ex aj toktz jun mensaje, in kubʼ nximane jlu: ‹Alkye ma tzaj samante›» (Jane).

 ¿Kwestpe tuʼn tok qqʼoʼn qwiʼ tiʼj jun tiʼ tuʼn tecnología? Ateʼ junjun in tzaj kyqʼamaʼn qa ikju. In tzaj tqʼamaʼn Nicholas Carr jlu, jun aj tzʼibʼil at tojtzqibʼil tiʼj administración: «Qa mas ma tzʼajbʼen internet quʼn, mas in xi qxnaqʼtzaʼn qcerebro tuʼn miʼn tok qqʼoʼn qwiʼ tiʼj jun tiʼ ex mas jun rat naj in nel qnikʼ tiʼj jun tqanil, pero mintiʼ in kyaj toj qwiʼ» a

 Ximana tiʼj oxe ambʼil jatumel mintiʼ in nonin tecnología tiʼja.

•   Aj tyolina kyukʼil txqantl. In tzaj tqʼamaʼn jun txin María tbʼi jlu: «Ateʼ xjal in najbʼen teléfono kyuʼn akux in qo yolin kyukʼil ex mintiʼ in nok kyqʼoʼn kywiʼ tiʼj qyol. In bʼant jlu kyuʼn tuʼnju in che tzʼibʼin mensaje, in che saqchan moqa in najbʼen redes sociales kyuʼn».

•   Aj ttena toj escuela. In tzaj tqʼamaʼn libro Niños conectados qa ateʼ nim kʼwal in najbʼen dispositivos electrónicos kyuʼn toj clase. In najbʼen kyuʼn tuʼn t-xi kysamaʼn mensaje, tuʼn kyuʼjin moqa tuʼn tok kyqʼoʼn kywitz tiʼj jun tiʼ toj internet aju mintiʼ toklen tukʼilju in tzaj xnaqʼtzan kye toj escuela.

•   Aj t-xnaqʼtzana. In tzaj tqʼamaʼn Chris jlu, jun kuʼxun te 22 abʼqʼi: «Kwest in nela weye tuʼn miʼn tok nqʼoʼn nwitze tiʼj teléfono aj tjaw vibrarin». Qa ma tzʼok tkeʼyina qe dispositivo electrónico, jaku txi tiʼn mas te oxe or tuʼn tkubʼ tbʼinchaʼna qe tdebera aʼyeju jaku che bʼant tuʼna toj jun or.

 Toj chʼin yol: Mas kwest tuʼn tok tqʼoʼn twiʼya tiʼjju in bʼant tuʼna qa ma txi tqʼoʼna ambʼil te tecnología.

•   Aj tyolina kyukʼil txqantl. In tzaj tqʼamaʼn Biblia jlu: «Teyle junjun mya noq oʼkx tuʼn tok tqʼoʼn tkwent tiʼj aju at tajbʼen te, ax ikx tuʼn tok tqʼoʼn tkwent tiʼj aju at tajbʼen kye txqantl» (Filipenses 2:4). Bʼaʼn tuʼn tok tqʼoʼn twiʼya kyiʼj txqantl, iktzun tten kbʼel tyekʼina qa in ximana kyiʼj. Ax ikx, bʼaʼn tuʼn t-xi tkeʼyina toj kywitz ex toj ambʼil lu, miʼn tzʼok tkeʼyina tcelular moqa tablet.

   «Akux in yolina tukʼil jun xjal, tzʼok tilil tuʼna tuʼn miʼn tok tkeʼyina tcelulara. Qa ma tzʼok tqʼoʼn twiʼya tiʼj xjal in yolin tukʼila, kbʼel tyekʼina qa in nok tqʼoʼna toklen» (Thomas).

   JUN NABʼIL: Aj tyolina kyukʼil txqantl, bʼaʼn tuʼn tok tilil tuʼna tuʼn tkyaj tqʼoʼna tcelulara toj jun lugar jatumel mlay tzʼok tkeʼyina. In tzaj kyqʼamaʼn junjun xjal at kyojtzqibʼil qa jaku tzʼok qkeʼyin teléfono qa nqayin at qtxlaj. ¿Tiquʼn? Tuʼnju toj alkyexku ambʼil ok kyjawel qʼajt.

•   Aj ttena toj escuela. In tzaj tqʼamaʼn Tyol Dios jlu: «Kyqʼoʼnke kwent tiʼj ju in kybʼiʼne» (Lucas 8:18). Qa at internet toj escuela jatumel in xnaqʼtzana, jaku txi tbʼiʼna nabʼil lu qa mintiʼ ma txi tsamaʼna ex qa mintiʼ ma tzʼok tkeʼyina qe mensaje nix tuʼn tsaqchana akux ata toj clase.

   «Qʼonk twiʼya tiʼjju in tzaj tqʼamaʼn maestro. Jaku kubʼ ttzʼibʼina junjun tqanil ex qa jaku bʼant, jaku kubʼ qeya toj tnejel fila tuʼntzun tok tqʼoʼn twiʼya tiʼj clase» (Karen).

   JUN NABʼIL: ¿Yajtzun qa ma kux ttzʼibʼina junjun tqanil toj jun cuaderno ex nya toj tcelulara? O tzʼel nikʼbʼaj tiʼj qa kʼonil jlu tiʼja tuʼn tok tqʼoʼn twiʼya tiʼj xnaqʼtzbʼil ex nya tiʼ junjuntl tiʼ.

•   Aj t-xnaqʼtzana. In tzaj tqʼamaʼn Biblia jlu: «Jyoma aju nabʼl ex aju ojtzqibʼl» (Proverbios 4:5). A t-xilen jlu qa il tiʼj tuʼn tjyona mas tqanil ex nya oʼkx tuʼn tjaw tuʼjina jun xnaqʼtzbʼil tuʼntzun tetz tbʼanel tcalificaciona.

   «In kyaj nqʼoʼne tableta toj modo avión aj nxnaqʼtzane ex in nonin wiʼje tuʼn tok nqʼoʼn nwiʼye tiʼjju in bʼant wuʼne. Ax ikx, mintiʼ in nok nqʼoʼn nwiʼye kyiʼj mensaje. Ex qa waje tuʼn ttzaj nnane jun tiʼ, in kubʼ ntzʼibʼine» (Chris).

   JUN NABʼIL: Jyonxa jun lugar jaku tzʼonin tiʼja tuʼn t-xnaqʼtzana. Miʼn kubʼ tqʼoʼna junjun tiʼchaq toj ex bʼaʼn tuʼn tbʼaj tlimpiarina.