«Tej ntene toj escuela, qa in xi tqʼamaʼn jun kuʼxun qa otoq kubʼ ten tukʼil jun txin, kykyaqil kyajtoq tuʼn t-xi kybʼinchaʼn aju otoq bʼant tuʼn. Ex ni jun tajtoq tuʼn tok te junxitl» (Elaine, te 21 abʼqʼi).

 ¿Ope kubʼ tnana qa il tiʼj tuʼn tkubʼ tena tukʼil jun qʼa moqa tukʼil jun txin tuʼnju atzun jlu in bʼant kyuʼn txqantl?

 ¿Ope tzaj tqʼamaʼn jun xjal kʼujlaʼn tuʼna tuʼn tkubʼ tena tukʼil?

 Qa in kubʼ tnaʼna qa taja tuʼn tkubʼ tena tukʼil jun qʼa moqa tukʼil jun txin ex qa in xi qʼamaʼn teya kyuʼn txqantl, kʼonil xnaqʼtzbʼil lu tiʼja tuʼn tjaw tjyona aju mas bʼaʼn.

•  Aju in tzaj kyqʼamaʼn txqantl ex aju axix tok

•  Miʼn txi tqʼoʼna ambʼil tiʼjju in tzaj kyqʼamaʼn txqantl tiʼjju tuʼn tkubʼ tena tukʼil jun qʼa moqa tukʼil jun txin

•  Aju in tzaj kyqʼamaʼn junjuntl kuʼxun

 AJU IN TZAJ KYQʼAMAʼN TXQANTL: Kykyaqilx kuʼxun in che kubʼ ten tukʼil jun qʼa moqa tukʼil jun txin menos aqine.

 AJU AXIX TOK: Xi qanin junjun xjel kye junjun qʼa ex txin te 18 abʼqʼi ex kyxol oxe kuʼxun lu, kabʼe tzaj kyqʼamaʼn qa o che kubʼ ten tukʼil jun qʼa moqa tukʼil jun txin. A jlu in tzaj tyekʼin qa mas te 30% kuʼxun naʼmx kykubʼ ten tukʼil jun qʼa moqa tukʼil jun txin. Tuʼntzunju, jaku txi qqʼamaʼn qa nya «kykyaqilx kuʼxun» o che kubʼ ten tukʼil jun qʼa moqa tukʼil jun txin.

 AJU IN TZAJ KYQʼAMAʼN TXQANTL: Mas in chʼiy kʼujlabʼil kyxol kabʼe xjal qa ma che kubʼ ten junx.

 AJU AXIX TOK: Atzun jlu in xi kyqʼamaʼn junjun kuʼxun te kynovia tuʼntzun kykubʼ ten kyukʼil. Pero chʼixme tkyaqil maj in kubʼ kypan kyibʼ kabʼe xjal aj kykubʼ ten junx. Ex in tzaj tbʼis txin ex in tzaj tqʼoj tuʼnju kubʼ t-ximen qa kʼujlaʼntoq tuʼn qʼa moqa tuʼnju kubʼ t-ximen qa jakutoq che kubʼ mojeʼ. a

 AJU IN TZAJ KYQʼAMAʼN TXQANTL: In tzaj tqʼamaʼn Biblia qa nya bʼaʼn tuʼn tkubʼ ten jun xinaq moqa ichan tukʼil jun xuʼj.

 AJU AXIX TOK: In yolin Biblia bʼaʼn tiʼj tuʼn tkubʼ ten jun xinaq tukʼil jun xuʼj, pero oʼkx qa o che casarin (Génesis 1:28; 1 Corintios 7:3).

 AJU IN TZAJ KYQʼAMAʼN TXQANTL: Qa ma txi nbʼiʼne aju in tzaj tqʼamaʼn Biblia, mlayx chin tzalaje.

 AJU AXIX TOK: Mas ok ktzalajela qa ma kubʼ kyayoʼne tuʼn kykubʼ tene junx tzmaxi aj kycasarine. Tuʼnju mlay tzaj kybʼise ex mlay che ul qe ximbʼetz nya bʼaʼn toj kywiʼye, aju in tzaj kyiʼj qeju mintiʼ in kubʼ kyayoʼn tuʼn kycasarin.

 Toj chʼin yol: Mintiʼ jun nya bʼaʼn o tzaj tiʼj jun xjal tuʼnju in kubʼ tayoʼn tuʼn tkubʼ ten tukʼil tukʼil tzmaxi aj tcasarin. Atzun qeju mintiʼ in kubʼ kyayoʼn in tzaj nya bʼaʼn kyiʼj.

•   Tzʼelx tnikʼa tiʼj alkye bʼaʼn ex alkye nya bʼaʼn. In tzaj tqʼamaʼn Biblia qa aʼyeju xjal at kynabʼl «nneʼl kynikʼ tiʼj alkyeju bʼaʼn ex alkyeju mya bʼaʼn» (Hebreos 5:14). Tuʼnju in nelxix kynikʼ tiʼjju alkye bʼaʼn ex alkye nya bʼaʼn, nya jun rat jaku kubʼ kyiʼj kyuʼn txqantl.

   «In nok tilil wuʼne tuʼn t-xi nbʼinchaʼne bʼaʼn ex tuʼn kyyolin txqantl bʼaʼn wiʼje. Tuʼntzunju, nya waje tuʼn tkubʼ nbʼinchaʼne jun nya bʼaʼn tuʼntzun miʼn kyyolin nya bʼaʼn wiʼje» (Alicia, te 16 abʼqʼi).

   Ximana tiʼj jlu: ¿Tiʼ kyyol xjal taja tuʼn tten tiʼja? ¿Taja tuʼn kyyolin xjal nya bʼaʼn tiʼja noq tuʼn ttzalaj jun?

•   Ximana tiʼj tiʼ nya bʼaʼn jaku tzaj tiʼja qa ma kubʼ tbʼinchaʼna jun nya bʼaʼn. In tzaj tqʼamaʼn Biblia jlu: «Alkyeju in kuʼx tawaʼn xjal, axtzunju kjawil tchmoʼn» (Gálatas 6:7). Ximana tiʼjju nya bʼaʼn jaku tzaj kyiʼje toj ambʼil tzul qa ma che kubʼ tene naʼmxtoq kycasarine. b

   «Qa ma kubʼ ten jun xjal tukʼil juntl, naʼmxtoq kykubʼ mojeʼ, jaku tzaj nim kybʼis ex jaku kubʼ kynaʼn qa nya kʼujlaʼn qeʼ. Nya oʼkx jlu, ax ikx jaku tzʼok ten tal jun txin aju nya tajbʼil ex jaku tzaj jun yabʼil kyiʼj qeju in che kubʼ ten tukʼil jun qʼa moqa tukʼil jun txin» (Sienna, te 16 abʼqʼi).

   Ximana tiʼj jlu: In tzaj tqʼamaʼn libro Sex Smart jlu: «Qa ma che ok ten tamiwoya obligaril teya tuʼn tkubʼ tbʼinchaʼna jun tiʼ aju jaku tzaj tiʼn nya bʼaʼn tiʼja tuʼn, ¿bʼaʼnpe qe amiw lu moqa nya? ¿Bʼaʼnpe tuʼn t-xi tbʼiʼna qe consej in tzaj kyqʼoʼn teya?»

•   Ten t-ximbʼetza toj tumel tiʼjju aj kykubʼ ten kabʼe xjal. Nya jun il aju aj kykubʼ ten kabʼe xjal. Axpe ikx, in tzaj tqʼamaʼn Biblia qa il tiʼj tuʼn tbʼant jlu tuʼn jun chmilbʼaj tukʼil t-xuʼjil (Proverbios 5:18, 19).

   «Tej tkubʼ tbʼinchaʼn Dios qe xjal, tzaj tqʼoʼn oyaj kye tuʼn kykubʼ ten junx. Tuʼntzunju, jaku qo tzalaj tiʼj oyaj lu, pero oʼkx qa o qo casarin. Tuʼntzunju, kubʼ tbʼinchaʼn mejebʼleʼn» (Jeremy, te 17 abʼqʼi).

   Ximana tiʼj jlu: Qa ma pon jun qʼij tuʼn tcasarina, jaku kubʼ tena tukʼil t-xuʼjila moqa tukʼil tchmila. Toj ambʼil aju, ok ktzalajela ex mlay tzaj jun nya bʼaʼn tiʼja ik tzeʼn ma qo yolin tiʼj toj xnaqʼtzbʼil lu.