¿In kubʼ tnaʼna qa mlay bʼant mas tuʼna? Qa ikju, ma bʼaj bʼinchaʼn xnaqʼtzbʼil lu te teya.

•  ¿Alkyeqe tiʼchaq jaku tzaj siktleʼn tiʼja kyuʼn?

•  ¿Tiquʼn il tiʼj tuʼn tok t-xqʼuqin tibʼa?

•  Aju jaku bʼant tuʼna

•  Aju in tzaj kyqʼamaʼn junjuntl kuʼxun

•   Aj kybʼant nimku tiʼchaq quʼn. Jun txin Julie tbʼiʼ in tzaj tqʼamaʼn jlu: «Tiʼj tkyaqilju in bʼant quʼn, kukx in tzaj qʼamaʼn qe qa il tiʼj tuʼn kukx qaqʼunan tuʼn qok te tbʼanel, tuʼn tkubʼ kyiʼj junjun tiʼchaq quʼn, tuʼn qximen tiʼ mas jaku bʼant quʼn ex tuʼn kyel te tbʼanel aju in bʼant quʼn. ¡Kwest-xix tuʼn qanqʼin tuʼnju in tzaj qʼamaʼn jlu qe!».

•   Aju tecnología. Jaku tzʼok qqʼoʼn ambʼil kyiʼj yolbʼil ex junjuntl kʼuxbʼil toj jun qʼij ex jaku tzʼel qpaʼn ambʼil kyiʼj kyoj qeju 7 qʼij jun seman. Tuʼn jlu jaku tzaj nimxix siktleʼn qiʼj ex mlay tentl qipun.

•   Aju tuʼn qjtan noq chʼin. Jun txin Miranda tbʼi in tzaj tqʼamaʼn jlu: «Tuʼnju ateʼ kuʼxun toj tja xnaqʼtzbʼil, toj aqʼuntl ex tuʼnju at ambʼil kye nim xjal tzma kʼwaʼlqex in che naqʼet tuʼn kyjaw weʼ naj prim ex tuʼn kyxiʼ yajxi jtal». Tuʼn jlu jaku tzaj nimxix siktleʼn qiʼj.

 In tzaj tqʼamaʼn Tyol Dios tuʼn qok te tbʼanel aqʼunal (Proverbios 6:6-8; Romanos 12:11). Noqtzun tuʼnj, mintiʼ in tzaj tqʼamaʼn tuʼn qaqʼunan nim ex tuʼn t-xi qqʼoʼn nim ambʼil kyiʼj txqantl tiʼchaq tuʼnju jaku tzaj yabʼil qiʼj.

 «Jun maj, el nnikʼe tiʼj qa mintiʼ otoq chin waʼne enter qʼij tuʼnju mintiʼ ten ambʼil wiʼje tuʼn nimku aqʼuntl otoq tzaj nkʼamoʼne. El nnikʼe tiʼj qa nya bʼaʼn tuʼn t-xi nqʼamaʼne qa jaku bʼant tkyaqilju in tzaj kyqanin weye, ex mas qa jaku tzaj tiʼn yabʼil wiʼje» (Ashley).

 Tuʼntzun jlu, in tzaj tqʼamaʼn Tyol Dios: «Mas bʼaʼn jun txʼyan itzʼ, twitz jun bʼalun kyimni» (Eclesiastés 9:4). Qa taja tuʼn tbʼant nimku tiʼchaq tuʼna jaku tnaʼya qa at nim tipumala ik tzeʼn jun bʼalun, pero noq toj chʼin ambʼil. Noqtzun tuʼnj, qa ma tzaj nimxix siktleʼn tiʼja, jaku tzaj nim yabʼil tiʼja.

•   Xnaqʼtzanx tibʼa tuʼn t-xi tqʼamaʼna miʼn. In tzaj tqʼamaʼn Tyol Dios jlu: «Kyukʼil qe xjal mans, atzun taʼ nabʼl» (Proverbios 11:2). Aj tel tnikʼ jun xjal tiʼj qa mlay bʼant tkyaqil tuʼn, mintiʼ in tzaj tkʼamoʼn junjuntl aqʼuntl aju mlay bʼant tuʼn.

   «Aʼyeqe xjal mintiʼ in xi kyqʼamaʼn qa miʼn ex in nok tilil kyuʼn tuʼn tbʼant tkyaqilju in tzaj qanin kye, aʼyetzun xjal lu in tzaj nimxix siktleʼn kyiʼj. Mintiʼ in nel kynikʼ tiʼj qa mlay bʼant tkyaqil kyuʼn. Ex kpol ambʼil jatumel kbʼajel kyipumal» (Jordan).

•   Jtana nim ambʼil. In tzaj tqʼamaʼn Tyol Dios jlu: «Mas bʼaʼn qa noq chʼin at qe ex in qo anqʼin tuj txubʼtxaj, twitzju tuʼn tten nim at qe ex mintiʼ in qo anqʼin tuj txubʼtxaj; ik tten jlu ik tzaʼn jun xjal taj tzaj ttzyuʼn kyqʼiqʼ tuʼn tqʼabʼ» (Eclesiastés 4:6). In tzaj qʼamaʼn qa aj qjtan, «in nok tipun qwiʼ» tuʼn. Il tiʼj tuʼn kyjtan kuʼxun wajxaq moqa lajaj or tkyaqil qonikʼen, noqtzun tuʼnj, chʼixme kykyaqil mintiʼ in bʼant kyuʼn.

   «Tnejel, tej attoq nim tiʼchaq ximen wuʼne tuʼn tbʼant, mintiʼtoq in chin jtane nim ambʼil. Noqtzun tuʼnj, at maj oʼkx tuʼn njtane juntl or tuʼntzun tten wipumale tuʼn tbʼant mas tiʼchaq wuʼne ex tuʼn ntzalaje toj juntl qʼij» (Brooklyn).

•   Nukʼuma aju kbʼantel tuʼna. In tzaj tqʼamaʼn Tyol Dios qa tuʼn tel bʼaʼn aju in bʼant quʼn, il tiʼj tuʼn tbʼaj qximen tiʼ kbʼantel (Proverbios 21:5). Qa ma txi t-xnaqʼtzan tibʼa tuʼn tajbʼen ambʼil tuʼna toj tumel ex qa ma bʼaj t-ximana jniʼ tiʼchaq jaku bʼant tuʼna,kʼonil jlu tiʼja toj tkyaqil tanqʼibʼila.

   «Chʼixme tkyaqil siktleʼn jaku tzʼel qa ma kux qtzʼibʼen aju kbʼantel quʼn. Aj tok tqʼoʼn twitza tiʼjju kbʼantel tuʼna, nya kwest kʼelel tnikʼa tiʼj junjun tiʼ jaku kubʼ tchʼexpuʼna tuʼntzun miʼn t-siktiya» (Vanessa).