Chʼixme tkyaqil qe tukʼila in che ajb’en qe redes sociales kyuʼn ex oʼkx tiʼj in che yolin, bʼalo at maj in che ok ten xmayil tiʼja tuʼnju mintiʼ jun teya tkwenta. ¿Tiʼ il tiʼj tuʼn tel tnikʼa tiʼj jlu? ¿Ex tiʼ jaku bʼant tuʼna?

 Nya oʼkx tiʼja in bʼaj jlu. Nim mambʼaj mintiʼ in xi kyqʼon ambʼil kye kykʼwal tuʼn kyajbʼen redes sociales kyuʼn. Bʼalo o tzʼel kynikʼ tiʼj qa ma tzʼajbʼen nim celular kyuʼn kykʼwal jaku che ok we kywitz nya bʼaʼn ik tzeʼn qe jlu:

•   depresión ex junjuntl yabʼil tiʼj kyximbʼetz

•   jaku tzʼok kyqʼoʼn kywitz tiʼj pornografía, jaku kubʼ kybʼinchaʼn sexting ex ciberacoso

•   qe nya bʼaʼn jaku tzaj kyxolx kyukʼil kyamiw

 Nim qe kuʼxun o kubʼ kyximen tuʼn tkyaj kykolin qe redes sociales. Kyuʼnx el kynikʼ tiʼj qa mas nya bʼaʼn tzaj kyiʼj kyuʼn jlu. Ximana kyiʼj junjun techel o bʼaj kyiʼj junjuntl kuʼxun:

•   El tnikʼ Priscilla tiʼj qa in xi naj nim ambʼil tuʼn kyiʼj redes sociales aju jaku tzʼajbʼen tuʼn kyiʼj junjuntl tiʼchaq mas tbʼanel.

•   Nya bʼaʼn el te Jeremy qe tilbʼilal nya bʼaʼn in che japun kyuj tredes sociales.

•   Te Bethany el tnikʼ tiʼj qa in nok tqʼoʼn nim toklen aju in bʼant kyuʼn txqantl  xjal.

 «Kubʼ nximane tuʼn tjatz nborrarine n-aplicacion te redes sociales, ex in chin tzalaja tuʼnju o bʼant jlu wuʼne, mintiʼ in chin bʼisune tiʼj ex mas in chin tzalaje tuʼnju at mas  ambʼil weye tuʼn tkubʼ nbʼinchaʼne aju mas nim toklen te weye» chi Sierra.

 «Nyatoq bʼaʼn te weye aju qa jaku qo naqʼet kyiʼj redes sociales ex qa in tzaj bʼaj nkʼuʼje tiʼj tiʼ jaku kyqʼama xjal kyiʼj npublicacione. Kwest ela te weye tuʼn tjatz nbʼorrarine ncuentaye pero jurat naj kubʼ nnaʼne bʼaʼn tej tbʼant jlu wuʼne. Mas in chin tzalaje jaʼlo» chi Kate.

 Bʼinchama aju in tzaj kyqʼamaʼn tmane. Yekʼinxa qa at tnabʼila tuʼnju mintiʼ in tzaj tqʼoja aj tkubʼ tbʼinchaʼna aju in tzaj kyqʼamaʼn teya.

 Nabʼil toj Tyol Dios: «Aju xjal mintiʼ tnabʼl in xi ttzoqpin tibʼ tuʼn tqʼojin, atzunju xjal at tnabʼl in tjakʼunte tibʼ tuʼn miʼn tqʼojin» (Proverbios 29:11).

 Jakulo tzaj kyqʼamaʼn junjun tuʼn kyajbʼen redes sociales tuʼna toj ewaj. ¡Nya toj tumel jlu! Qa ma bʼant jlu tuʼna kbʼel tnana nya bʼaʼn. Tzul nya bʼaʼn tiʼja qa ma tzʼel kaneta kyuʼn qe tmane ex ya mlay tzʼok qe kykʼuʼj tiʼja.

 Nabʼil toj Tyol Dios: «Qajbʼile tuʼn qbʼinchanteye aju bʼaʼn tuj tkyaqil» (Hebreos 13:18).

 Ximana tiʼ kbʼantel tu’na. Ik tze’n qe ku’xun ma qo yolin kyiʼj, bʼalo jaku kanet nim tiquʼn tu’na tuʼn tkyaj ttzaqpiʼna qe redes sociales. Qa ma tzʼel tnikʼa tiʼj qa nya bʼa’n tuʼn kyajbʼen redes sociales tu’na, bʼa’n tuʼn miʼn kyajbʼen tu’na, nya oʼkx tuʼnju in tzaj kyqʼamaʼn tmane sino tu’nju aya ma kubʼ ximen te. Qa ma bʼant tu’na ikju aj tzaj kyqanin qe tukʼila tiquʼn mintiʼ in che ajbʼen redes sociales tu’na melay tzaj tchʼixwi ex melaylo che ok ten xmayil tiʼja.

 Toj chʼin yol: Bʼinchankuya aju in tzaj kyqʼamaʼn tmane ex tzʼok tilix tuʼna tuʼn tel tnikʼa tiʼj tiquʼn in tzaj kyqʼamaʼn tmane tuʼn miʼn kyajbʼen redes sociale tu’na. Toj ambʼil jaʼlo jaku tzʼanqʼina qa mintiʼ ma che ajbʼen redes sociales tu’na.