KYXJEL KUʼXUN
¿Tiʼ jaku tzʼonin wiʼje tuʼn miʼn nqʼojine kyukʼil nmane?
Qe xjel ex qe tzaqʼwebʼil
¿Alkye mas in netz qʼoj kyxole tukʼil?
¿Tukʼil tmana?
¿Moqa tukʼil ttxuʼya?
¿Jteʼ maj in netz qʼoj kyxole?
Junjunx maj.
At maj.
Tkyaqil maj.
¿Nimxix qʼoj in netz kyxole?
Nya nim, ex jun rat in kyaj toj ttxolil.
At maj nim, ex yaj in qo yoline tiʼj.
Ikju, kukx in qo qʼojine ex mintiʼx in kyaj toj ttxolil.
At maj in tzaj nya bʼaʼn kyxol mambʼaj kyukʼil kʼwalbʼaj tuʼnju in kubʼ kyximen kʼwalbʼaj qa aqe mambʼaj il tiʼj tuʼn tok tilil kyuʼn tuʼn miʼn ttzaj kyqʼoj. Noqtzun tuʼnj, bʼaʼn tuʼn tok tqʼoʼn twiʼya kyiʼj qeju nabʼil in tzaj tqʼoʼn xnaqʼtzbʼil lu aj tyolin tiʼj tiʼ jaku bʼant tuʼna tuʼn miʼn tetz nim qʼoj kyxole. Ximana tiʼjju tzul qʼamaʼn.
¿Tiquʼn in tzaj qʼoj kyxole?
Tzma in chʼiya. Maslo in xi tqanina junjun t-xjela jaʼlo. Ma tzʼok tena ximel tuʼnx tibʼa ex junxitl nela qeju kyximbʼetz tmana teya. Noqtzun tuʼnj, in tzaj tqʼoʼn Tyol Dios nabʼil lu: «Kynimanxe kymane ex kytxuʼye» (Éxodo 20:12).
Aju in bʼaj: Il tiʼj tuʼn tok tnabʼila ex tuʼn tikʼ twitza kyiʼj junjun tiʼchaq tuʼntzun t-xi tqʼamaʼna toj tumel aju in kubʼ t-ximana.
Aju tzaqpibʼil. Mientras in chʼiya, maslo ktzajel qʼoʼn tzaqpibʼil teya kyuʼn tmana. Noqtzun tuʼnj, nyalo nim ik tzeʼn teya taj, ex nyalo jun rat ik tzeʼn otoq kubʼ t-ximana. Tuʼntzunju, at maj in netz qʼoj kyxole kyukʼil tmana. Pero in tzaj tqʼamaʼn Biblia jlu: «Kynimanxe kymane» (Efesios 6:1).
Aju in bʼaj. Mas jaku tzaj qʼoʼn tzaqpibʼil teya kyuʼn tmana qa ma tzʼajbʼen tuʼna toj tumel aju chʼin tzaqpibʼil o tzaj qʼoʼn teya kyuʼn.
Aju jaku bʼant tuʼna
Bʼinchama aju il tiʼj tuʼn tbʼant tuʼna. Mas bʼaʼn qa ma ximana tiʼj tiʼ jaku bʼant tuʼna tuʼn miʼn tqʼojina kyukʼil tmana twitzju tuʼn kukx t-ximana tiʼj qa aqe tmaʼna at kypaj tiʼjju in bʼaj. Tqʼama jun kuʼxun aju Jeffrey tbʼi: «Aj kyyolin mambʼaj qukʼile, at maj mas in tzaj qʼoj tuʼnju qmode in kubʼ qyekʼine twitzju in tzaj kyqʼamaʼn. Mas jaku tzʼonin aju qa mintiʼ saj qqʼoj ex qa chebʼe xqo yolin».
In tzaj tqʼamaʼn Biblia jlu: «Qa jaku bʼant kyuʼne, tzʼok tililx kyuʼne tuʼn kytene bʼaʼn kyukʼil kykyaqil xjal» (Romanos 12:18).
Bʼinxa. «Kwest in nela jlu toj nwitze», chi Samantha, te 17 abʼqʼi. «Pero o tzʼel nnikʼe tiʼj mas in tzaj kyqʼoʼn nmane ambʼil weye tuʼn nyoline qa ma tzʼok tilil wuʼne tuʼn tkubʼ nbʼiʼne aju in tzaj kyqʼamaʼn».
In tzaj tqʼamaʼn Biblia jlu: «Bʼaʼn tuʼn t-xi kybʼiʼn naje ju yol, pero mya jurat naj tuʼn kyyoline» (Santiago 1:19).
In nok qʼoj ik tzeʼn qʼaqʼ, qa mintiʼ sok qxqʼuqin jaku tzaj tiʼn nim nya bʼaʼn
Naʼntza qa kyuk’il kyibʼe toj jun equipo. Ximana tiʼj qa junx tokxa toj jun equipo kyukʼil tmana tuʼn kysaqchane tiʼj pelot ex il tiʼj tuʼn tonina kyiʼj tmana tuʼntzun kykambʼane. At jun kuʼxun Adam tbʼi tqʼama jlu: «Aj tetz jun qʼoj, atz in che ximen mambʼaj tiʼj alkye mas bʼaʼn te kykʼwal, ax ikx te kʼwalbʼaj atz in ximen tiʼjju mas bʼaʼn te. Tuʼntzunju, parece que junx kyximbʼetz at».
In tzaj tqʼamaʼn Biblia jlu: «Qo lpeʼk tiʼj ju in tzaj qʼinte qmojbʼabʼl qibʼ qxolx» (Romanos 14:19).
Ximana tiʼjju in kubʼ kynaʼn. In tzaj tqʼamaʼn jun txin Sarah tbʼi: «In nonin nim wiʼje tuʼn ttzaj nnaʼne qa ax ikx kye mambʼaj ex t-xubʼaj in tzaj nim nya bʼaʼn kyiʼj. Ex at maj mas kwest twitzju in tzaj qiʼje». Tqʼama juntl txin lu: «In nok tilil wuʼne tuʼn tkubʼ nximane qa aqine mambʼaj moqa txubʼaj. ¿Tiʼ jaku kubʼ nnaʼne qa aqine in chin chʼiysante jun kʼwal toj ambʼil kwest? ¿Alkyetzulo mas bʼaʼn te kʼwal?»
In tzaj tqʼamaʼn Biblia jlu: «Teyle junjun mya noq oʼkx tuʼn tok tqʼoʼn tkwent tiʼj aju at tajbʼen te, ax ikx tuʼn tok tqʼoʼn tkwent tiʼj aju at tajbʼen kye txqantl» (Filipenses 2:4).
Tzʼok tilil tuʼna tuʼn tbʼiʼna kye. In tzaj tqʼamaʼn Biblia teya tuʼn tnimana kye tmana (Colosenses 3:20). Mas bʼaʼn che elel qe tiʼchaq qa ma bʼina. «Mintiʼxix in tzaj bʼaj nkʼuʼje qa ma txi nbʼiʼne tkyaqil aju in tzaj kyqʼamaʼn nmane», chi Karen. «At nim tiʼchaq o bʼant kyuʼn wiʼje. Tuʼntzunju, mas tbʼanel qa ma chex nbʼiʼne». Ikju, qa ma chex tbʼiʼna tmana, mlayxix tzaj qʼoj kyxole.
In tzaj tqʼamaʼn Biblia jlu: «Qa mintiʼ siʼ in kuʼx yupj qʼaqʼ» (Proverbios 26:20).
Jun nabʼil. Qa otoq tzaj tqʼoja ex kwest tuʼn t-xi tqʼamaʼna aju in kubʼ t-ximana, maslo bʼaʼn qa ma kubʼ ttzʼibʼina twitz jun uʼj moqa tuʼn t-xi ttzʼibʼina toj jun mensaje. At jun txin Alyssa tbʼi, in tzaj tqʼamaʼn jlu: «In xi nbʼinchaʼne jlu qa otoq tzaj nqʼoje ex nya waje tuʼn nyoline. In nonin wiʼje tuʼn t-xi nqʼamaʼne aju nxime, pero nya tukʼil qʼoj ex tuʼn miʼn txi nqʼamaʼne jun tiʼ aju jaku tzaj nbʼise tuʼn yajxitl».