Atxix ojtxe, at maj ateʼ junjun tmajen Dios o kubʼ kyxjelin qa kukx at kyajbʼen qe kawbʼil tkuʼx toj Biblia (Salmo 73:2,3). Axpe ikx, ateʼ junjun in che ok ten bʼinchalte junjun nya bʼaʼn in nela toj kywitz Jehová ex mintiʼ in japun tley kyuʼn. In nok tilil kyuʼn tuʼn tkubʼ kyewin nya bʼaʼn kybʼinchbʼen twitz tmajen Jehová.

 O bʼaj bʼinchaʼn xnaqʼtzbʼil lu tuʼn tonin kyiʼj qeju at kabʼe tten kyanqʼibʼil, pero kyaj tuʼn tkyaj kytzaqpin aju nya bʼaʼn kybʼinchbʼen.

Toj xnaqʼtzbʼil lu, kʼelel tnikʼa tiʼj jlu:

•  ¿Tiʼ t-xilen qa at kabʼe tten tanqʼibʼil jun kuʼxun?

•  ¿In chin oke te nya bʼaʼn xjal qa ma ten tten kabʼe wanqʼibʼile?

•  ¿Alkye tten jaku kyaj ntzaqpiʼne kabʼe tten wanqʼibʼile?

•  Aju in tzaj kyqʼamaʼn junjuntl kuʼxun

 Jaku txi qqʼamaʼn qa at kabʼe tten tanqʼibʼil jun kuʼxun qa in kubʼ tbʼinchaʼn nya bʼaʼn aj tten kyukʼil qe tukʼil, pero in kubʼ tbʼinchaʼn aju bʼaʼn aj tten kyukʼil erman toj congregación. In nok jlu ik tzaʼn in najbʼen jun tkʼoj.

 «Aj tten kabʼe tten tanqʼibʼil jun kuʼxun in kubʼ tewin aju in bʼant tuʼn kywitz txqantl ex ni jun in nel tnikʼ tiʼj tiʼxix tkux toj tanmi. Tuʼn jlu in sbʼun kyiʼj kykyaqil» (chi Erin).

 ¿Ojtzqiʼn tuʼna? Aj tten kabʼe tten tanqʼibʼil jun xjal in kubʼ tbʼinchan aju nya bʼaʼn toj ewaj ex ojtzqiʼn tuʼn qa nya bʼaʼn in nela toj twitz Jehová.

 «Xi tzyet tuʼn tok nqʼoʼne nwitze kyiʼj qe xjal mintiʼ kyxbʼalun tok toj internet tej qʼiʼntoq 14 abʼqʼi wuʼne. Pero ajtoq ntene kyukʼil wamiwe in che ajbʼen te Jehová, in kubʼ nyekʼine qa in nel wikʼune pornografía pero toj wanmiye nya ik ttenju» (chi Nolan).

 Texto nim toklen: «Mi jun xjal jaku bʼant tuʼn tajbʼen te kabʼe patrón: porke kʼelel tikʼun jun, atzun juntl ok tkʼujlaʼ, ex qa oʼkx ok kʼajbʼel te jun patrón, atzun juntl mintiʼ taj tiʼj» (Mateo 6:24).

 Nyalo ik ttenju. Ax tok atlo junjun xjal o kubʼ kyximen tuʼn miʼn tkubʼ kyanqʼin aju in tqʼamaʼn Biblia. Pero ¿ape jlu in bʼaj tiʼja? Moqa at kabʼe tten tanqʼibʼila tuʼnju:

•   Nya taja tuʼn toka te junxitl kywitz qe tukʼila.

•   Tuʼnju mas in kubʼ tnaʼna bʼaʼn kyukʼil qe tukʼila kywitz qe erman.

•   Moqa tuʼnju in tnaʼna qa mintiʼ tipumala tuʼn tjapun tkawbʼil Dios tuʼna.

 «At junjun kuʼxun in kubʼ kynaʼn bʼaʼn aj kyten kyukʼil qe xjal nya okslal tuʼnju kyaj tuʼn kytzalaj kykyaqil kyiʼj» (chi David).

 Pero nya tuʼn jlu qaj tuʼn t-xi qqʼamaʼn qa bʼaʼn aj tten kabʼe tchwinqlal jun xjal. Sino tuʼn jlu in nel qnikʼ tiʼj tiquʼn axpe ikx qe junjun xjal bʼaʼn qe, jaku che ok ten bʼinchal junjun nya bʼaʼn. Qa a jlu o bʼaj tiʼja, ¿tiʼ jaku bʼant tuʼna?

1.  1. Ximana tiʼj qa bʼaʼn taʼ tanqʼibʼila jaʼlo moqa nya. Ximana kyiʼj xjel lu: «¿Ikpe wanqʼibʼile ik tzeʼn jlu waje tuʼn tten? Qa nya ikju, ¿tiʼtzulo tzul wiʼje qa kukx ma ten kabʼe tten wanqʼibʼile?».

    Texto nim toklen: «Aju xjal at tnabʼl, ok ttil kyjaʼ ttzaj mya bʼaʼn, nneʼl oq tiʼj; atzunju xjal mintiʼ tnabʼl, noq kyjaʼ in xiʼ laqʼeʼ tuj tbʼe ex in tzaj mya bʼaʼn tiʼj» (Proverbios 27:12).

2.  2. Tzaqpinkja kabʼe tten tanqʼibʼila. Qʼamanxa tiʼ aju in bʼaj tiʼja kye qe tmana ex qa te jun tamiwa in najbʼen te Jehová. Che tzalajel tuʼnju otoq jyona onbʼil kyukʼil ex tuʼnju taja tuʼn tkubʼ tbʼinchana aju bʼaʼn.

    «Kwest ela tuʼn t-xi nqʼamaʼne aju qe nbʼinchbʼene nya bʼaʼn kye txqantl. Pero kubʼ nnane nim tzalajbʼil tej t-xi nqʼamaʼne» (chi Nolan).

    Texto nim toklen: «Aju xjal in che kubʼ tewan qe til, mlay tzʼel bʼaʼn te te; atzunju xjal in jatz tmaʼn til ex bʼiʼx nneʼl tpaʼn tibʼ tiʼj, kbʼel najsaʼn til» (Proverbios 28:13).

3.  3. Bʼinxa aju kawbʼil tzul qʼoʼn teya. Qa at jun tiʼ o kubʼ tewena kywitz qe tmana moqa kywitz qe erman, maslo kwest tuʼn tok qeʼtl kykʼuʼj tiʼja. Tuʼn jlu, tzul-lo kyqʼoʼn qe tmana moqa qe ansyan junjun kawbʼil teya tuʼn miʼn tbʼant junjun tiʼchaq tuʼna. Aj ttzaj qʼoʼn kawbʼil teya, tzʼok tilil tuʼna tuʼn t-xi tbʼiʼna ex tuʼn miʼn tkubʼ tbʼinchaʼna juntl maj nya bʼaʼn, sino oʼkx aju bʼaʼn toj tkyaqil (Hebreos 13:18).

    Texto nim toklen: «Bʼinxa qe consej ex nimanxa aju kxel kawinte teya; kyjaʼtzun jaku tzʼok tnabʼla» (Proverbios 19:20).

4.  4. Qeʼk tkʼuʼja tiʼj qa kʼujlaʼna tuʼn Dios. Tuʼnju kʼujlan qoʼ tuʼn Jehová in nok tqʼoʼn twitz tiʼj tkyaqilju in bʼant quʼn. Ex in tzaj tbʼis aj tok tkeʼyin qa at kabʼe tten tanqʼibʼila. Pero taj tuʼn tonin tiʼja tuʼn tjiqumanjtz tiʼj tbʼeya tuʼnju a kwentil teya (1Pedro 5:7).

    Texto nim toklen: «Ate Qman in keʼyin tiʼj tkyaqilju in bʼaj twitz txʼotxʼ ex in xi tqʼoʼn kyipun qeju axix tok nnoʼk qeʼ kykʼuʼj tiʼj» (2 Crónicas 16:9).