«Ateʼ junjun wukʼile in che pon toj escuela ex mintiʼ jun tiʼ qʼiʼn kyuʼn. Oʼkx in che kubʼ qeʼ bʼil música ex mintiʼ in nok kyqʼoʼn kywiʼ tiʼj profesor. ¡Qatzun nya bʼaʼn kycalificación in netz, in kubʼ kyxjelin tiquʼn ma bʼaj jlu! Ateʼ junjuntl in nok tilil kyuʼn tuʼn kyxnaqʼtzan ik tzeʼn weye, pero ax ikx nya bʼaʼn qe calificacón in che etz quʼne. Mintiʼ in nel nnikʼe tiquʼn in bʼaj jlu. In kubʼ qnaʼn siktleʼn tuʼn jlu ex mas qa in qo xnaqʼtzan tkyaqil seman» (Yolanda).

 ¿Ope kubʼ tnaʼn teya ik tzeʼn te Yolanda? Jakulo kubʼ tnaʼna bʼis aj tok tkeʼyina qa nya bʼaʼn qe tcalificacióna in che etz.

 Ateʼ junjun kuʼxun in tzaj bʼaj kykʼuʼj ex ya mintiʼ in nok tilil kyuʼn tuʼn kyxnaqʼtzan ex in kyaj kytzaqpiʼn tuʼn kyxi toj escuela. Maske jaku bʼant jun kyxol tiʼchaq lu kyuʼn kuʼxun pero at juntl tiʼ mas tbʼanel jaku bʼant kyuʼn. Ateʼ 6 tumel jaku bʼant tuʼna ex jaku che onin tiʼja.

•  Aju jaku bʼant tuʼna

•  Aju in tzaj kyqʼamaʼn junjuntl kuʼxun

•   Txiʼya toj escuela tkyaqil qʼij. Bʼalo in kubʼ t-ximana qa nya nim toklen jlu, pero qa mintiʼ ma txiʼya toj tkyaqil clase mlay tzʼonin tiʼja.

   «Tej nxnaqʼtzane, aqeju kuʼxun mintiʼ in nok kyqʼoʼn toklen kycalificación mintiʼtoq in che pon tkyaqil qʼij toj escuela ex nya bʼaʼntoq kycalificación in che etz» (Matthew).

   Texto nim toklen: «Porke alkyeju in kuʼx tawaʼn xjal, axtzunju kjawil tchmoʼn» (Gálatas 6:7).

•   Qʼonkxix twiʼya tiʼjju in tzaj xnaqʼtzaʼn teya toj escuela. Bʼaʼn qa ma txiʼya toj escuela. Pero nya oʼkx jlu tuʼn tbʼant tuʼna. Sino il tiʼj tuʼn tok tqʼoʼnxix twiʼya tiʼj xnaqʼtzbʼil, tuʼn tkubʼ ttzʼibʼina aju in tzaj xnaqʼtzaʼn teya, tuʼn t-ximana tiʼjju tyol profesor ex qa jaku bʼant, jaku txi tqanina te aju mintiʼ in nel tnikʼa tiʼj.

   «Kukx in xi nqanine nim xjel te profesor. Ex o tzʼok nqʼoʼne nwitze tiʼj qa mintiʼ in nel qnikʼe tiʼj jun xnaqʼtzbʼil in tzaj tyekʼin, in nok tilil tuʼn tuʼn ttzaj tchikʼbʼaʼn toj jun tten mas fácil» (Olivia).

   Texto nim toklen: «Kyqʼoʼnke kwent tiʼj ju in kybʼiʼne» (Lucas 8:18).

•   Tzʼok tilil tuʼna tuʼn miʼn tcopiarina. At nim tumel tuʼn kysbʼun kuxuʼn toj escuela ex jun kyxol jlu aju tuʼn kycopiarin. Pero nya bʼaʼn tuʼn qcopiarin tuʼnju in nok jlu te jun sbʼubʼil ex jaku tzaj nya bʼaʼn qiʼj tuʼn.

   «Qa mintiʼ ojtzqiʼn tzaqʼwebʼil tuʼna, miʼn copiarina kyiʼj qe tukʼila. Mlay tzʼonin jlu tiʼja, tuʼnju ok knaqʼetela tuʼn kyonin txqantl tiʼja ex mlay bʼant junjun tiʼchaq tuʼna tjunalxa» (Jonathan).

   Texto nim toklen: «Teyle junjun tuʼn tikʼ twitz tiʼj tex taqʼunbʼen; kyjaʼtzun bʼaʼn tuʼn ttzalaj tiʼj taqʼunbʼen ex mya tiʼj taqʼunbʼen juntl» (Gálatas 6:4).

•   Bʼinchama tdebera. Qa jaku bʼant, bʼinchankuya tdebera naʼmxtoq tkubʼ tbʼinchaʼna juntl tiʼ ex mas qa in ximana tuʼn tsaqchana. a Qa ma bʼant jlu tuʼna ok kbʼel tnaʼna tzalajbʼil.

   «Nim toklen toj nwitze tuʼn tbʼaj nbʼinchaʼne ndebere ex tuʼn jlu i etz qe tbʼanel ncalificacióne. Aj nmeltzʼaje njaye oʼkx waje tuʼn wojlane ex tuʼn nbʼine tiʼj música, pero tnejel in nok tilil tuʼn tbʼaj nbʼinchaʼne ndebere tuʼntzun tbʼant junjuntl tiʼchaq wuʼne» (Calvin).

   Texto nim toklen: Qʼonka tilil tuʼn tjaw tskʼoʼna «alkyeju mas bʼaʼn» (Filipenses 1:10).

•   Qaninxa onbʼil. Miʼn tzaj tchʼixwiya tuʼn t-xi tqanina onbʼil. Yolina kyukʼil tmana moqa tukʼil jun maestro tuʼn kyonin tiʼja. Ex qa jaku bʼant, jaku txi kychjoʼne jun maestro moqa jun xjal o tzʼetz t-xnaqʼtzbʼil tuʼn tonin tiʼja.

   «Yolina tukʼil profesor. Qʼamanxa te qa mintiʼ in nel tnikʼa tiʼj xnaqʼtzbʼil in tzaj tchikʼbʼaʼn ex qa taja tuʼn tel tnikʼa tiʼj. Tuʼn jlu jakulo tzʼel tnikʼ tiʼj qa nim toklen xnaqʼtzbʼil toj twitza ex kʼonil tiʼja» (David).

   Texto nim toklen: «Qa at nim qʼol consej bʼaʼn nneʼla jlu» (Proverbios 15:22).

•   Tzʼajbʼen tkyaqil onbʼil tuʼna. Toj junjun tnam, in che tzaj onin qe kuʼxun toj examén aj ttzaj qanin junjuntl xjel kye tuʼn tjax kycalificación. Tbʼanel qa ma che ajbʼen onbʼil lu tuʼna. Ex jaku txi tqanina te maestro tuʼn tzaj qʼoʼn juntl tdebera moqa tuʼn ttzaj qʼoʼn juntl maj examén teya.

   «Il tiʼj tuʼn tok tilil wuʼne tuʼn kyetz tbʼanel ncalificacióne. Nya oʼkx jlu in bʼant wuʼne. Sino in xi nqanine kye maestro qa jaku txi nbʼinchaʼne juntl ndebere moqa tuʼn t-xi nbʼinchaʼne juntl maj aju nya bʼaʼn xbʼant» (Mackenzie).

   Texto nim toklen: «Aju xjal in aqʼnan, at tkambʼabʼl tiʼj jlu» (Proverbios 14:23).