Estricto qe maestro. In nok obligarina kyuʼn qe tukʼila. Kwest qe examen ex nim tarea in kyaj qʼon teya. Qa nya tgana tuʼn t-xiʼya toj escuela, miʼn tzaj bʼaj tkʼuʼja qkyaqilx jaku kubʼ qnaʼn jlu. a In tzaj tqʼamaʼn jun txin Rachel tbʼi jlu: b

 «Jaku chinxe nok jaxku tumel. ¡Jaku chinxe ttzi playa, jaku chinxe kyukʼil wamiwe, jaku chin onine kyiʼj nmane toj cocina tuʼn tbʼant wabʼj moqa tuʼn tbʼant limpieza, pero tuʼn nxiʼye toj escuela miʼn!».

 Qa ax t-ximbʼetza ik tzeʼn te Rachel, jaku kubʼ tnaʼna qa toj cárcel ata aj ttena toj escuela tzmaxi aj tetz bʼaj xnaqʼtzbʼil tuʼna. ¿Tiʼ jaku bʼant tuʼna tuʼn miʼn tkubʼ tnaʼna jlu?

 ¿Ojtzqiʼnpe tuʼna? Nya il tiʼj tuʼn tel tikʼuna escuela, qa ma tzʼok tilil tuʼna tuʼn t-xi tchʼexpuʼna t-ximbʼetza tiʼj, jaku naqʼeta tiʼj. Axpe ikx kʼelel tnikʼa tiʼj qa nim toklen xnaqʼtzbʼil ex kʼonil tiʼja tuʼn tbʼant junjuntl aqʼuntl tuʼna aj toka te matij xjal.

 Tuʼn miʼn tel tikʼuna escuela, ximana tiʼj alkye tten jaku tzʼonin tiʼja:

 Tuʼn tten tnabʼla. Qa mas ma xnaqʼtzana mas fácil kʼelel teya tuʼn t-xi t-bʼinchana tjunalxa kyiʼj junjun nya bʼaʼn jaku tzaj tiʼja toj aqʼuntl moqa toj tanqʼibʼila ex tuʼn miʼn t-ayona tiʼj onbʼil tkyaqil maj. Maske at junjun tiʼ nya bʼaʼn in nel teya toj escuela, xjelinkuya jlu: «¿Alkye tten jaku tzʼonin xnaqʼtzbʼil lu wiʼje?».

 Texto nim toklen: «Nkʼwaʼl, kukx tuʼn tten tnabʼla, ex miʼn kyaj tkolina aju tnabʼla bʼaʼn» (Proverbios 3:21).

 Tuʼn toka te aqʼnal xjal. Tkyaqil aju nbʼant tuʼna toj escuela jaku tzʼonin tiʼja tuʼn tajbʼen ambʼil tuʼna toj tumel, tuʼn t-xi tbʼinchana tkyaqil toj ttxolil ex tuʼn toka te jun tbʼanel aqʼunal. Tuʼntzunju xjelinkuya jlu: «¿Alkye tten in nonin escuela wiʼje tuʼn woke te jun tbʼanel aqʼunal ex tuʼn tbʼant tkyaqil wuʼne toj ttxolil? ¿Tzeʼn jaku che bʼant qe tiʼchaq lu wuʼne?».

 Texto nim toklen: «Aju xjal in aqʼnan, at tkambʼabʼl tiʼj jlu» (Proverbios 14:23).

 Tuʼn ttena bʼaʼn kyukʼil txqantl xjal. Aj ttena kyukʼil qe tukʼila toj escuela a jlu kʼonil tiʼja tuʼn tel tnikʼa tiʼj alkyexix in kubʼ kynaʼn ex tuʼn kyok trespetarina. In tzaj tqʼamaʼn jun kuʼxun Joshua tbʼi jlu: «Nimxix toklen tuʼn tbʼant tyolina toj tumel kyukʼil txqantl ikxtzun tuʼn tel tnikʼa tiʼj historia ex ciencia. Jaku tzʼajbʼen teya toj tkyaqil tanqʼibʼila». Xjelinkuya jlu: «¿Alkye tten o tzaj t-xnaqʼtzan escuela weye tuʼn tten tbʼanel nmode kyukʼil txqantl, maske junxitl nimen kyuʼn ex junxitl tten in che anqʼin?».

 Texto nim toklen: «Tzʼok tililx kyuʼne tuʼn tten kymojbʼabʼl kyibʼe kyukʼil kykyaqil xjal» (Hebreos 12:14).

 Tuʼn tbʼant ttena tij ambʼil tzul. Jaku tzʼonin escuela tiʼja tuʼn tel tnikʼa alkye aqʼuntl bʼaʼn nel teya, aj tel tnikʼa tiʼj tzʼok tililxix tuʼna tuʼn t-xnaqʼtzana tiʼj. In tzaj tqʼamaʼn jun txin Brooke tbʼi jlu: «Bʼalo jaku xnaqʼtzana tuʼn tbʼant jun aqʼuntl tuʼna aju tgana, ik tzeʼn o bʼant wuʼne, ex aj tgraduarina mas fácil jaku kanet taqʼuna». Xjelinkuya jlu: «¿Alkye aqʼuntl chin aqʼunale tiʼj tuʼn wanqʼine aj wetz graduarine toj escuela? ¿Alkye xnaqʼtzbʼil jaku txi wiʼne tuʼn tbʼant jun aqʼuntl wuʼne?».

 Texto nim toklen: «Qʼoʼnk tkwenta tiʼj jatum kbʼel tqʼoʼn tqana» (Proverbios 4:26).