Nim toklen tuʼn kyok xqʼuqit qe tiʼchaq nim kywiʼ ik tzeʼn jun ja moqa jun kar. Chʼixme ax jlu in bʼaj tukʼil qamiwbʼil tukʼil Jehová. ¿Tiʼ il tiʼj tuʼn tbʼant tuʼna tuʼn kukx tten jun tbʼanel tamiwbʼila tukʼil Jehová otoqxi bautisarina?

Toj xnaqʼtzbʼil lu, kʼelel qnikʼ tiʼj jlu:

•  Kukx xnaqʼtzana tiʼj Biblia

•  Kukx naʼna Dios te Jehová

•  Kukx yolina tiʼjju nimen tuʼna kyukʼil txqantl

•  Kukx bʼeta kyoj chmabʼil

 Texto nim toklen: «Tuʼn kybʼinchanteye bʼaʼn tuj tkyaqil, ik tzaʼn jun awal in tqʼoʼn twitz, ex tuʼn telxix kynikʼe tiʼj Dios junjun qʼij» (Colosenses 1:10).

 Aju t-xilen: Otoqxi bautisarina, il tiʼj tuʼn kukx tuʼjina tiʼj Tyol Dios ex tuʼn kukx t-ximana tiʼjju in nel tnikʼa tiʼj (Salmo 25:4; 119:97).

 Aju jaku bʼaj: Atlo maj nya taja tuʼn t-xnaqʼtzana ex jakulo kubʼ t-ximana qa nya ik teya ik tzeʼn qe txqantl kygan tuʼn kyxnaqʼtzan.

 Aju jaku bʼant tuʼna: Jyonxa tqanil kyiʼj xnaqʼtzbʼil taja tuʼn tel tnikʼa kyiʼj toj Tyol Dios. Tuʼn miʼn tbʼaj tgana tuʼn t-xnaqʼtzana tiʼj Tyol Dios, bʼaʼn tuʼn t-ximana tiʼj alkye or ex alkye xnaqʼtzbʼil kʼokel tqʼoʼn twitza tiʼj. Aju mas nim toklen tuʼn tbʼant tuʼna aju tuʼn tok tkʼujlaʼna Jehová ex aju Tyol. Qa ma bʼant jlu tuʼna, jaku tzʼonin tiʼja ex ktzalajela aj t-xi tbʼinchana (Salmo 16:11).

 Nabʼil: Qa taja tuʼn tok tqʼoʼna twiʼya tiʼj t-xnaqʼtzbʼila, bʼaʼn tuʼn t-xi tjyoʼna jun lugar jatumel mintiʼ bulla.

 ¿Taja mas onbʼil?

•   Uʼjinktza qe xnaqʼtzbʼil lu:

   «¿Tzeʼn jaku tzʼonin Tyol Dios wiʼje? Tkabʼ plaj: Xnaqʼtzanx tibʼa tuʼn ttzalaja tiʼjju in kubʼ tuʼjina toj Tyol Dios».

   «¿Qué hago si no me puedo concentrar?».

•   Qʼonka twitza tiʼj video:

   Aju in tzaj kyqʼamaʼn junjuntl kuʼxun: Tuʼn kyuʼjin tiʼj Tyol Dios.

•   Jaku kutz tdescargarina xnaqʼtzbʼil lu:

   «Programa tuʼn quʼjin tiʼj Tyol Dios».

 Texto nim toklen: «Mi jun tuʼn tbʼaj kykʼuʼje tiʼj; tkyaqil kymanxe te Dios tuj kynaʼj Diose; kyqaninxe te, ax ikx kyqʼonxe chjonte te» (Filipenses 4:6).

 Aju t-xilen: Aj qyolin tukʼil Dios, jaku txi qbʼiʼn aj quʼjin tiʼj Tyol ex jaku qo yolin tukʼil aj qnaʼn Dios. Jaku txi tqʼamaʼna tkyaqilju taja te ex jaku txi tqʼoʼna chjonte te tiʼj tkyaqilju tbʼanel tiʼchaq in tzaj tqʼoʼn teya.

 Aju jaku bʼaj: Jakulo txi tqʼamaʼna aʼyex yol toj tnaʼj Diosa. Axlo ikx jaku kubʼ t-xjelina qa in tzaj bʼiʼna tuʼn Jehová ex qa in ximen tiʼja (Salmo 10:1).

 Aju jaku bʼant tuʼna: Akux in nex qʼij, ximana tiʼj tiʼ taja tuʼn t-xi tqʼamaʼna te Jehová. Qa mintiʼ ma ten ambʼil tiʼja tuʼn tnaʼna Dios moqa mlay bʼant tuʼna, bʼaʼn tuʼn t-xi tqʼamaʼna te Jehová aju in kubʼ tnaʼna aj tkubʼaj qʼij. Ax ikx, miʼn naʼna Dios oʼkx tiʼjxa (Filipenses 2:4).

 Nabʼil: Qa in kubʼ t-ximana qa aʼyex yol in che ajbʼen tuʼna toj tnaʼj Diosa qʼamanxa te Jehová. Taj tuʼn tok tbʼiʼn tkyaqilju in bʼaj tkʼuʼja tiʼj, axpe ikx qa at toklen kyukʼil tnaʼj Diosa (1 Juan 5:14).

 ¿Taja mas onbʼil?

•   Uʼjinktza xnaqʼtzbʼil lu:

   «¿Tiquʼn nim toklen tuʼn qnaʼn Dios?».

•   Jaku kutz tdescargarina xnaqʼtzbʼil lu:

   «¿Cómo puedo mejorar mis oraciones?».

 Texto nim toklen: «Kwentin ok tibʼa, ex qʼoʼnka kwent tiʼj ju xnaqʼtzbʼil in tqʼoʼna [...]; qa ma tbʼinchaya jlu, axa ok kletel kyukʼix qeju in che bʼin tiʼj tyola» (1 Timoteo 4:16).

 Aju t-xilen: Aj tyolina kyukʼil txqantl tiʼjju nimen tuʼna, mas in chʼiy qʼuqbʼil tkʼuʼja. Qa ma bʼant jlu tuʼna jaku kleta ex jaku che klet txqantl.

 Aju jaku bʼaj: Atlo maj, mlay ten tgana tuʼn tyolina tiʼjju nimen tuʼna kyukʼil txqantl moqa jaku tzaj xobʼa, ex mas toj escuela.

 Aju jaku bʼant tuʼna: Miʼn che kubʼ tbʼinchaʼna qe tiʼchaq noq tuʼnju in kubʼ tnaʼna. ik tzeʼn aj ttzaj xobʼa. Kubʼ ttzʼibʼin apóstol Pablo jlu: «Qatzun mya tuʼn wexe wajbʼil ma nbʼinchaye [aju pakbʼabʼil], qa ikju at juntl ma qʼmante weye tuʼn waqʼnane tiʼj» (1 Corintios 9:16, 17).

 Nabʼil: Bʼaʼn tuʼn tok tamiwin tibʼa tukʼil jun erman jaku tzʼonin tiʼja ex in kubʼ tqʼoʼn jun tbʼanel techel toj pakbʼabʼil. Pero naʼmxtoq tbʼant jlu tuʼna, qaninxa permis kye tmana (Proverbios 27:17).

 ¿Taja mas onbʼil?

•   Uʼjinktza xnaqʼtzbʼil lu:

   «¿Por qué temo hablar de mi fe?».

 Texto nim toklen: «Qo ximan tiʼj tuʼn qkyuwsante qibʼ qxolx tuʼn qkʼujlante qibʼ ex tuʼn qbʼinchante bʼaʼn. Ex miʼn txi qkolin tuʼn tok qbʼuyin qibʼ» (Hebreos 10:24, 25).

 Aju t-xilen: Aju tiquʼn mas nim toklen in qoʼx kyoj chmabʼil aju tuʼn qkʼulin te Jehová. Pero ax ikx at junjuntl tiquʼn. Aj txiʼya kyoj chmabʼil, in tzaj kyqʼuqbʼaʼn erman tkʼuʼja. Ex aj ttena kyoj chmabʼil ex aj t-xi tqʼoʼna jun tyola kyoj, in xi tqʼuqbʼaʼna kykʼuʼj txqantl (Romanos 1:11, 12).

 Aju jaku bʼaj: At maj, jaku tzʼok tqʼoʼna twiʼya kyiʼj junjuntl tiʼchaq akux ata kyoj chmabʼil moqa oʼkx jaku txiʼya junjun maj kyoj. Bʼalo jaku tzʼel kyiʼn junjun tiʼchaq ambʼil teya tuʼn txiʼya kyoj kykyaqil chmabʼil ik tzeʼn qe tdebera toj escuela.

 Aju jaku bʼant tuʼna: Nim toklen tuʼn tkubʼ tbʼinchaʼna qe tdebera toj escuela. Noqtzun tuʼnj, tbʼanel qa ma kubʼ t-ximana tuʼn txiʼya kyoj kykyaqil chmabʼil ex tuʼn tok tqʼoʼna twiʼya tiʼj xnaqʼtzbʼil. Bʼaʼn tuʼn tok tqʼoʼna twiʼya kyiʼj xjel in che tzaj qanin tuʼntzun t-xi tqʼoʼna jun tyola. Aj tbʼaj chmabʼil, jaku txi tqʼamaʼna te jun erman qa tbʼanel tyol ma txi tqʼoʼn moqa tbʼanel toklen ma tzʼetz.

 Nabʼil: Bʼaʼn tuʼn tok tqʼoʼna twitza kyiʼj xnaqʼtzbʼil naʼmxtoq txiʼya kyoj chmabʼil. Jaku kuʼtz tdescargarina aplicación JW Library® ex jaku tzʼokxa jatumel in tzaj tqʼamaʼn «Reuniones» tuʼntzun tok tkeʼyina xnaqʼtzbʼil.

 ¿Taja mas onbʼil?

•   Uʼjinktza xnaqʼtzbʼil lu:

   «¿Por qué debo ir a las reuniones cristianas?».