KYXJEL KUʼXUN
¿Tiʼ jaku bʼant wuʼne tuʼn tten tbʼanel nximbʼetze?
¿Alkye t-ximbʼetza at?
Tbʼanelxix
«In nok tilil wuʼne tuʼn ntzalaje ex tuʼn miʼn ttzaj nqʼoje. ¿Nyape toj tumel aj qtzeʼn tkyaqil qʼij?» (Valerie).
Nya toj tumel
«Aj tbʼant jun tbʼanel tiʼ wuʼne, in kubʼ nximane qa nya bʼaʼn taʼ moqa mlayxlo txi qnimen qa tbʼanel» (Rebeca).
Toj tumel
«Qa tbʼanelxix t-ximbʼetza, at maj in tzaj tbʼisa. Qatzun nya toj tumel, mintiʼ in tzalaja. Noqtzun tuʼnj, qa toj tumel nximbʼetze, in nonin wiʼje tuʼn telxix nnikʼe kyiʼj tiʼchaq» (Ana).
¿Tiquʼn nim toklen?
In tzaj tqʼamaʼn Tyol Dios qa aju «xjal in tzalaj, kykyaqil qʼij in che ok puro bʼaʼn te te» (Proverbios 15:15). Tuʼn jlu in nel qnikʼ tiʼj qa ma tzʼok tilil tuʼn jun xjal tuʼn tten t-ximbʼetz toj tumel, mas jaku tzalaj. Ax ikx, mas nim kyamiw ateʼ. ¿Tiquʼn? Tuʼnju ni jun taj tuʼn tten tukʼil jun xjal in nok tqʼoʼn tkyaqil te nya bʼaʼn.
Maske ikju, ax ikx qeju xjal at jun tbʼanel kyximbʼetz in che ok weʼ twitz nya bʼaʼn. Jun techel:
Kyoj noticia, oʼkx in che etz qʼamaʼn tqanil kyiʼj qʼoj, kyiʼj terrorismo ex bʼiybʼel.
Kykyaqil ja xjal in tzaj nya bʼaʼn kyxol.
Qkyaqilx in nok tilil quʼn tuʼn tkubʼ tiʼj nya bʼaʼn qmod ex qajbʼil.
At maj in kubʼ qnaʼn nya bʼaʼn kyuʼn qamiw.
Aj kyikʼ nya bʼaʼn lu, miʼn kubʼ t-ximana qa mintiʼ jun tiʼ in bʼaj ex miʼn txi tqʼoʼna ambʼil kye tuʼn tkubʼ numja kyuʼn, sino tenx t-ximbʼetza toj tumel. Qa ma bʼant jlu tuʼna, jaku kubʼ kyiʼj nya bʼaʼn t-ximbʼetza ex kʼelel tnikʼa tiʼj qa qkyaqilx in tzaj nya bʼaʼn qiʼj.
Jaku tzʼexa twitz nya bʼaʼn in che tzaj toj tanqʼibʼila qa ma tzaj tnaʼna qa kyjel toj ttxolil.
Aju jaku bʼant tuʼna
Tenx t-ximbʼetza toj tumel aj tel txalpaja.
In tzaj tqʼamaʼn Tyol Dios jlu: «Mi aʼl jun xjal at twitz txʼotxʼ tzʼaqlxix wen in tbʼinchaʼn aju bʼaʼn ex bʼajx bʼinchan il» (Eclesiastés 7:20). Bʼaʼn tuʼn ttzaj tnaʼna qa aj tel txalpaja, in bʼaj jlu tuʼnju aj il qoʼ, nya tuʼnju mintiʼ tajbʼena.
¿Tiʼ jaku bʼant tuʼna tuʼn tten t-ximbʼetza toj tumel?: Qʼonka tilil tuʼn tbʼant tbʼanel tiʼchaq tuʼna, pero miʼn kubʼ t-ximana tuʼn tok tkyaqil te tzʼaqli. In tzaj tqʼamaʼn jun kuʼxun jlu, aju Caleb tbʼi: «In nok tilil wuʼne tuʼn miʼn nximane oʼkx kyiʼj npaltile». Ex tqʼamatl jlu: «Sino in nok tilil wuʼne tuʼn miʼn wel txalpaje kyiʼj aʼyex tiʼchaq».
Miʼn tzʼok tmojbʼaʼna tanqʼibʼila kyukʼil txqantl.
In tzaj tqʼamaʼn Tyol Dios jlu: «Miʼn jaw qniman qibʼ. Miʼn tzʼok qikʼlen qibʼ qxolx. Miʼn tzaj tloʼch qkʼuʼj tiʼj juntl» (Gálatas 5:26). Qa ma tzʼel tpaʼna nim ambʼil tuʼn tok tkeʼyina qe foto kyoj redes sociales tiʼj tkyaqilju in jax kyqʼoʼn txqantl ex mintiʼ otoq tzaj qʼoʼn txokbʼil tiʼja, tzul tqʼoja ex tbʼisa. Axpe ikx jaku kubʼ t-ximana qa ma che ok tbʼanel tamiwa te aj qʼoj tiʼja.
¿Tiʼ jaku bʼant tuʼna tuʼn tten t-ximbʼetza toj tumel?: Bʼaʼn tuʼn tel tnikʼa tiʼj qa mlay tzaj qʼoʼn txokbʼil tiʼja kyoj kykyaqil ninqʼij. Ex tkyaqilju in jax qʼoʼn kyoj redes sociales, mintiʼ in tzaj tyekʼin tkyaqilju in bʼaj toj tanqʼibʼil jun xjal. Jun txin Alexis tbʼi, tqʼama jlu: «Oʼkx in nok tqʼoʼna twitza tiʼj tbʼanel ambʼil toj tanqʼibʼil jun xjal kyoj redes sociales». Ax ikx tqʼama: «Mintiʼ in jax kyqʼoʼn xjal tkyaqilju in bʼaj kyiʼj junjun qʼij».
Tenx tbʼanel tmoda, mas kyukʼil toj tjaya.
In tzaj tqʼamaʼn Tyol Dios jlu: «Qa jaku bʼant kyuʼne, tzʼok tililx kyuʼne tuʼn kytene bʼaʼn kyukʼil kykyaqil xjal» (Romanos 12:18). Mlay tzʼok t-xqʼuqina aju in bʼant kyuʼn txqantl, pero jaku tzʼok t-xqʼuqina tmoda. Aya kbʼel ximente qa ktel tbʼanel tmoda.
¿Tiʼ jaku bʼant tuʼna tuʼn tten t-ximbʼetza toj tumel?: Qʼonka tilil tuʼn tkubʼ tyekʼina tbʼanel tmoda ex tuʼn miʼn ttzajxix nya bʼaʼn kyxole kyukʼil toj tjaya, ik tzeʼn jaku bʼant tuʼna kyukʼil txqantl. In tzaj tqʼamaʼn jun txi jlu, aju Melinda tbʼi: «Ni jun xjal tzʼaqli. Qkyaqilx in nok qbʼinchaʼn jun nya bʼaʼn tiʼj juntl». Ex tqʼamatl jlu: «Aqoʼ qo kbʼel ximente tiʼ qmod kbʼel qyekʼin, qa ktel tbʼanel qmod moqa miʼn».
Bʼaʼn tuʼn tqʼona chjonte.
In tzaj tqʼoʼn Tyol Dios nabʼil lu qe: «Kyqʼonxe chjonte» (Colosenses 3:15). Qa ma bʼant tqʼoʼna chjonte, kʼonil tiʼja tuʼn tok tqʼoʼna twiʼya kyiʼj tbʼanel tiʼchaq in bʼaj tiʼja, ex nya kyiʼj qeju tiʼchaq in kubʼ t-ximana qa nya bʼaʼn in che ela.
¿Tiʼ jaku bʼant tuʼna tuʼn tten t-ximbʼetza toj tumel?: Ax tok, in che tzaj nya bʼaʼn toj tanqʼibʼila, noqtzun tuʼnj, ax ikx ximana kyiʼj tbʼanel tiʼchaq in che ikʼ toj tanqʼibʼila. In tzaj tqʼamaʼn jun txin Rebeca tbʼi jlu: «In kux ntzʼibʼine tkyaqil qʼij jun tbʼanel tiʼ in nikʼ toj wanqʼibʼile». Ex tqʼamatl jlu: «Ngane tuʼn ttzaj nnaʼne qa chʼixmi tkyaqil maj at nim tbʼanel tiʼchaq jaku chin ximane tiʼj».
Ximana tiʼj tzeʼn kymod tamiwa.
In tzaj tqʼamaʼn Tyol Dios jlu: «Qa ma txi kyukʼin kyibʼe kyukʼil xjal mya bʼaʼn, ok ktzakjel kynabʼle» (1 Corintios 15:33). Qa ma tzʼok tjunin tibʼa kyukʼil qeju oʼkx in che yolin kyiʼj txqantl, in che xmayin ex mintiʼ in che tzalaj, jaku tzʼel tkanoʼna kymod.
¿Tiʼ jaku bʼant tuʼna tuʼn tten t-ximbʼetza toj tumel?: Aj kyok weʼ tamiwa twitz nya bʼaʼn, mlaylo che ximen tiʼj kyyol ex jaku ten nya bʼaʼn kyximbʼetz. Bʼaʼn tuʼn tonina kyiʼj, pero miʼn tzʼok tqʼonxix twiʼya tiʼjju in bʼaj kyiʼj. In tzaj tqʼamaʼn jun txin jlu, aju Michelle tbʼi: «Miʼn tzʼok qamiwen qibʼ kyukʼil qeju oʼkx in che yolin tiʼj nya bʼaʼn in tzaj kyiʼj».
¿Taja tuʼn tel mas tnikʼa tiʼj?
In tzaj tqʼamaʼn Tyol Dios qa toj ambʼil jaʼlo at nim yajbʼil ex kwest tuʼn qex kywitz (2 Timoteo 3:1). Tuʼnju at nim nya bʼaʼn, ¿kwestpe in nela toj twitza tuʼn tten t-ximbʼetza toj tumel? Qa taja tuʼn tel mas tnikʼa tiʼj, bʼaʼn tuʼn tjaw tuʼjina xnaqʼtzbʼil «¿Tiquʼn at nim yajbʼil jaʼlo?».
