KYXJEL KUʼXUN
¿Tbʼanelpe qa ma kyaj ntzaqpiʼne qe nxnaqʼtzbʼile?
«Nya waje tuʼn nxiʼye toj escuela» ¿Ope kubʼ t-ximana jun maj jlu? ¿Ope kubʼ t-ximana tuʼn tkyaj ttzaqpiʼna escuela? Qa ikju, kʼonil xnaqʼtzbʼil lu tiʼja.
¿Tiquʼn in kubʼ kyximen junjun tuʼn miʼn kyxiʼ toj escuela?
In tzaj kyqʼamaʼn xjal at kyojtzqibʼil alkye junjun tiquʼn mintiʼ in cheʼx kuʼxun toj escuela:
Kwest tuʼn tel kynikʼ tiʼjju in tzaj xnaqʼtzaʼn kye. «Nya tbʼanel qe ncalificacione».
Nya kygan tuʼn kyxnaqʼtzan. «Mlay tzʼonin xnaqʼtzbʼil wiʼje».
Mintiʼ in kanun kypwaq. «Il tiʼj tuʼn waqʼunane tuʼn wonine kyiʼj toj njaye».
Ximana tiʼj tiʼ jaku tzaj tiʼja qa mintiʼ ma txiʼya toj escuela
In tzaj tqʼamaʼn Biblia jlu: «[Aju] xjal at tnabʼl tok tkwent tiʼj jatum in bʼet» (Proverbios 14:15). ¿Tiʼ xnaqʼtzbʼil jaku tzʼel qiʼn tiʼj jlu? Qa taja tuʼn tkyaj ttzaqpiʼna escuela, mas bʼaʼn qa ma ximana tiʼj tiʼ jaku tzaj qa ma bʼant jlu tuʼna.
Xjelinkuya jlu:
Qa mintiʼ setz bʼaj nxnaqʼtzbʼile, ¿kkanetelpe jun waqʼune yajxitl?
«Ximana tiʼj qa kpol ambʼil tuʼn t-xi tjyoʼna jun taqʼuna ex bʼalo ktel jun tfamilia ex il tiʼj tuʼn tkʼaʼchina kyiʼj. ¿Ex tiʼ jaku bʼant tuʼna tuʼnju in tzaj qanin kyoj junjun aqʼuntl qa o tzʼetz básico moqa bachillerato tuʼna?» (Julia).
Qa ma kyaj nkoline escuela, ¿tiʼ jaku bʼant wuʼne aj wok weʼye kywitz junjuntl problem toj ambʼil tzul?
«Kʼonil escuela tiʼja toj tanqʼibʼila. ¿Tiquʼn? Tuʼnju toj escuela in nok tojtzqiʼna txqantl xjal, in nok weʼya kywitz nya bʼaʼn ex junjun aqʼuntl. Ex chʼixme aʼyex tiʼchaq lu kʼokel weʼya twitz toj tanqʼibʼila» (Daniel).
¿Tiʼ jaku bʼaj toj wanqʼibʼile qa ma kyaj nkoline escuela?
«Bʼalo jaku kubʼ t-ximana jaʼlo qa nokx gan in xiʼya toj escuela. Pero aj tjapuna twi 23 abʼqʼi ex aj tjaw tiʼna tajlal tgastoya, kbʼel t-ximana jlu: ‹Tbʼanel tuʼnju in bʼant suma ex resta wuʼne›» (Ana).
Ximana tiʼj jlu
Jyona onbʼil. In tzaj tqʼamaʼn Tyol Dios jlu: «Qa at nimku xjal at kynabʼl, jaku klet tnam» (Proverbios 11:14). Qa nya bʼaʼn qe tcalificaciona in che etz, yolina kyukʼil tmana, kyukʼil profesor, tukʼil jun xjal jaku tzaj qʼonte consej teya tiʼj jlu moqa tukʼil jun xjal in nok qeʼ tkʼuʼja tiʼj.
«¿Yajtzun qa ma yolina tukʼil maestro? Bʼalo jaku kubʼ t-ximana qa mintiʼ in nonin maestro tiʼja tuʼn tetz tbʼanel tcalificaciona. Pero qa ma yolina tukʼil ex qa ma txi tqanina onbʼil te, bʼalo jaku tzʼonin tiʼja» (Edward).
Ximana tiʼj tzeʼn jaku tzʼonin tiʼja. In tzaj tqʼamaʼn Biblia jlu: «Mas bʼaʼn ju bʼajsbʼil te jun tiʼxti twitz ju ttzyetlen» (Eclesiastés 7:8). Aj tgraduarina, ya otoq che ten junjuntl tbʼanel tmoda ex otoq tzʼok tojtzqiʼna nim tiʼchaq jaku tzʼajbʼen tuʼna toj tanqʼibʼila.
«Bʼalo aj tikʼ ambʼil nya il tiʼj tuʼn t-xnaqʼtzana tiʼj jun examen moqa tuʼn tkubʼ tbʼinchaʼna jun tdebera toj escuela, pero qa ma tzikʼx nya bʼaʼn in tzaj tiʼja toj escuela, kʼonil jlu tiʼja aj tok weʼya kywitz nya bʼaʼn aj tchʼiya» (Vera).
Qa ma kyaj tzaqpiʼna escuela, in nok jlu ik tzeʼn in kuʼtza toj jun bote naʼmxtoq tpon jatumel tuʼn tweʼ. Ex ktzajel tbʼisa qa ma bʼant jlu tuʼna.
Miʼn kubʼ t-ximana qa nya bʼaʼn junjuntl tumel tuʼn t-xnaqʼtzana. In tzaj tqʼamaʼn Tyol Dios jlu: «[Aju] xjal noq t-xoʼn tibʼ tiʼj jun tiʼxti ex mintiʼ in kubʼ ten ximal tiʼj qa bʼaʼn, ktzajel mebʼayil tiʼj» (Proverbios 21:5). Miʼn kubʼ t-ximana jun rat naj qa mas bʼaʼn tuʼn tkyaj tkolina escuela. Bʼalo jaku tzʼetz bʼaj t-xnaqʼtzbʼila toj internet moqa ax tjaya.
«Aj ttena toj escuela, in nonin tiʼja tuʼn tok tilil tuʼna, tuʼn t-xi tbʼinchaʼna kyiʼj junjun problem ex in naqʼunana junx kyukʼil txqantl. Kʼonil jlu tiʼja toj tkyaqil tanqʼibʼila. Tuʼntzunju, tbʼanel qa ma tzʼetz bʼaj t-xnaqʼtzbʼila toj escuela» (Benjamín).
Toj chʼin yol: Qa ma tzʼetz bʼaj tkyaqil t-xnaqʼtzbʼila toj escuela, kʼonil tiʼja toj tanqʼibʼila.