•  Aju tuʼn tok tojtzqiʼna

•  Aju jaku bʼant tuʼna

•  Aju in tzaj kyqʼamaʼn junjuntl kuʼxun

•   Kukx in tzaj nya bʼaʼn kyxol kabʼe amiw. Tuʼnju aj il qoʼ, jakulo tzaj tqʼamaʼn jun tamiwa, axpe ikx aju mas tbʼanel tamiwa, jun tiʼ nya toj tumel teya moqa jaku tzʼok tbʼinchaʼn jun nya bʼaʼn tiʼja. Bʼaʼn tuʼn ttzaj tnaʼna qa qkyaqilx aj il qoʼ. Ex qa ma qo ximen tiʼj, axlo ikx teya o tzʼok tbʼinchaʼna jun nya bʼaʼn tiʼj juntl (Santiago 3:2).

•   Jaku kubʼ tnaʼna nya bʼaʼn tuʼnju in nok tkeʼyina toj Internet. Jun techel, jun kuʼxun David tbʼi in tzaj tqʼamaʼn jlu: «Aj tokxa toj Internet ex in nok tqʼoʼn twitza kyiʼj tilbʼilal tamiwa ex otoq ten toj jun ninqʼij, jakulo kubʼ t-ximana tiquʼn mintiʼ xi txkoʼna tuʼn. Axpe ikx jaku kubʼ t-ximana qa ma naj tamiwbʼila tukʼil ex jaku tzaj tbʼisa».

•   Jaku bʼant tuʼn texa twitz nya bʼaʼn.

 Ximana tiʼjxa. In tzaj tqʼamaʼn Tyol Dios jlu: «Miʼn taqʼa ambʼil tuʼn ttzaj naj tqʼoja, porke aju qʼoj atzun in kybʼinchaʼn xjal mintiʼ kynabʼl» (Eclesiastés 7:9).

 «At maj, aj tikʼ ambʼil in nel tnikʼa tiʼj qa aju tzaj tqʼoja tuʼn nya nim toklen» (Alyssa).

 Ximana tiʼj jlu: ¿Jun ratpe in tzaj tqʼoja? ¿Jakupe tzikʼx tuʼna junjun tiʼchaq in che el txalpaj txqantl tiʼj? (Eclesiastés 7:21, 22).

 Bʼaʼn tuʼn ttzaj tnaʼna qa mas bʼaʼn tuʼn tkubʼ tnajsaʼna kyil txqantl. In tzaj tqʼamaʼn Tyol Dios qa tbʼanel qa ma kubʼ qnajsaʼn kyil txqantl (Proverbios 19:11).

 «Maske at jun tiquʼn tuʼn ttzaj tqʼoja, mas bʼaʼn tuʼn tkubʼ tnajsaʼna kyil txqantl. A t-xilen jlu qa ya mlay txi tqʼamaʼna te xjal alkye nya bʼaʼn ok tbʼinchaʼn tiʼja nix tuʼn t-xi tqʼamaʼna te tuʼn ttzaj tqanin najsam teya nimku maj. Qa ma kubʼ tnajsaʼna til, ya mintiʼ tuʼn ttzaj tnaʼna» (Mallory).

 Ximana tiʼj jlu: ¿Junpe matij il aju sok bʼinchaʼn tiʼja? ¿Jakupe kubʼ tnajsaʼna til tamiwa tuʼn tten mujbʼabʼil kyxole? (Colosenses 3:13).

 Ximana tiʼj juntl xjal. In tzaj tqʼamaʼn Tyol Dios jlu: «Teyle junjun mya noq oʼkx tuʼn tok tqʼoʼn tkwent tiʼj aju at tajbʼen te, ax ikx tuʼn tok tqʼoʼn tkwent tiʼj aju at tajbʼen kye mastl» (Filipenses 2:4).

 «Qa ax tok kʼujlaʼn jun qamiw quʼn ex in nok qqʼoʼn toklen, kʼonil jlu qiʼj tuʼn t-xi qbʼinchaʼn naj tiʼj jun nya bʼaʼn, tuʼnju o tzʼok tilil quʼn tuʼn tten jun tbʼanel qamiwbʼil. Tuʼntzunju, nya qaj tuʼn t-xi qnajsaʼn» (Nicole).

 Ximana tiʼj jlu: ¿Jakupe tzʼok tqʼoʼna toklen aju in tzaj tqʼamaʼn tamiwa teya? (Filipenses 2:3).

 Toj chʼin yol: Qa mintiʼ saj naj tqʼoja aj ttzaj jun nya bʼaʼn, kʼonil jlu tiʼja aj tchʼiya. ¿Yajtzun qa ma txi t-xnaqʼtzan tibʼa tuʼn tbʼant jlu tuʼna jaʼlo?