Kwest in nela toj kywitz nim xjal qa ma che kyaj ten kyja toj jun qale tuʼnju in kubʼ nim jbʼal ex mintiʼ jun tiʼ jaku bʼant kyuʼn. In tzaj tqʼamaʼn jun kuʼxun Robert tbʼi jlu: «Aj tbʼaj jlu wiʼje, noq in chin kubʼ qeye ex mintiʼ jun tiʼ in bʼant wuʼne».

 ¿Ope bʼaj jlu tiʼja jun maj? Qa ikju, te teya ma kubʼ bʼinchaʼn xnaqʼtzbʼil lu.

•  Aju tuʼn tok tojtzqiʼna

•  Aju jaku bʼant tuʼna

•  Aju in tzaj kyqʼamaʼn junjuntl kuʼxun

•   Mlay che onin kʼuxbʼil tiʼja.

   Qa ma tzʼokxa toj Internet, bʼalo jaku tzʼonin chʼin tiʼja. Pero mlay tzʼonin tiʼja tuʼn t-ximana ex jaku bʼaj tgana.In tzaj tqʼamaʼn Jeremy te 21 abʼqʼi jlu: «At maj oʼkx in keʼyina tiʼj pantalla ex mintiʼ in ximana tiʼj juntl tiʼ».

   Ax t-ximbʼetz Elena. In tzaj tqʼamaʼn jlu: «At nimku tiʼchaq jaku bʼant quʼn kyukʼil kʼuxbʼil, pero in nel kyiʼn ambʼil qe tuʼn tok qqʼoʼn qwitz tiʼjju in bʼaj qtxlaj. Tuʼntzunju mas in bʼaj tgana aj tkubʼ tyupina tkʼuxbʼila».

•   Nim toklen tuʼn tten tbʼanel t-ximbʼetza.

   Qa at nim tiʼ tuʼn tbʼant tuʼna, mlayx bʼaj tgana. Pero ¿oʼkxpe jlu tuʼn tbʼant tuʼna? Miʼn, ax ikx nim toklen tuʼn ttzalaja tiʼjju in bʼant tuʼna. Jun techel, tqʼama jun txin Karen tbʼi jlu: «Maske attoq nim waqʼune toj tja xnaqʼtzbʼil, puro aburrid in nex nqʼije. Tuʼntzunju, il tiʼj tuʼn ttzalaja tiʼjju in bʼant tuʼna».

 ¿Ojtzqiʼn jlu tuʼna? Qa mintiʼ jun tiʼ tuʼn tbʼant tuʼna, mintiʼ tuʼn tok jlu te jun nya bʼaʼn. Sino jun tbʼanel ambʼil tuʼn tbʼant junjuntl tiʼchaq tuʼna. In nok jlu ik tzeʼn jun pi txʼotxʼ jatumel jaku kux awet awal tuʼntzun tchʼiy.

 Bʼinchama junjuntl tiʼchaq. Jyontza qe akʼaj tamiwa. Bʼinchama juntl tiʼ jaku tzalaja tuʼn. Aʼyeju xjal in bʼant junxichaq tiʼchaq kyuʼn, mintiʼ in bʼaj kygan ex mintiʼ in bʼaj kygan txqantl kyuʼn.

 Taqikʼ Tyol Dios nim toklen: «Tkyaqilju at tuʼn tbʼant tuʼna, tzʼok tililx tuʼna tuʼn tbʼant» (Eclesiastés 9:​10).

 «Kʼitzqeku xi tzyet tuʼn tbʼant nyoline toj yol chino mandarín. Tuʼnju tkyaqil qʼij in chin xnaqʼtzane tiʼj, in nel nnikʼe tiʼj qa ngane tuʼn tbʼant jlu wuʼne. Ngane tuʼn tajbʼen ambʼil wuʼne ex tuʼn taqʼunan nximbʼetze» (Melinda).

 Qʼonka twiʼya tiʼjju taja tuʼn tbʼant tuʼna. Qa ya ximen tuʼna tiʼ taja tuʼn tbʼant, kʼokel tqʼoʼn tkʼuʼja tiʼj. Ax ikx qa ma ximana tiʼj tiʼ tbʼanel tzul teya qa ma kubʼ tbʼinchaʼna qe taqʼuna toj tja xnaqʼtzbʼil, nya kwest kʼelel toj twitza ex kʼokel tilil tuʼna tuʼn tbʼant.

 Taqikʼ Tyol Dios nim toklen: «Aju mas bʼaʼn tuʼn tbʼinchante xjal, oʼkx [...] tuʼn ttzalaj tiʼj taqʼunbʼen» (Eclesiastés 2:24).

 «Tej chʼixtoq ngraduarine, in xnaqʼtzane ocho or tkyaqil qʼij tuʼnju otoq txi nnajsaʼne ambʼil. ¿Bʼajpe ngane tiʼj? Mintiʼ, tuʼnju wajtoqe tuʼn tjapun twi nximbʼetze, tuʼn ngraduarine. Atzun jlu onin wiʼje» (Hannah).

 At junjun tiʼchaq mlay chʼixpet tuʼna. Axpe ikx qa ma che bʼant tbʼanel tiʼchaq tuʼna, at maj aburrid jaku che ela toj twitza. At maj in tzaj kyqʼamaʼn qamiw qe qa mlay bʼant tuʼn kyten qukʼil ex ya mintiʼ in bʼant aju otoq kyaj bʼant tiʼj quʼn kyukʼil. Aj tbʼaj jlu, mas bʼaʼn tuʼn tten tbʼanel t-ximbʼetza twitzju tuʼn ttzaj tbʼisa.

 Taqikʼ Tyol Dios nim toklen: «[Aju] xjal in tzalaj, kykyaqil qʼij in che ok puro bʼaʼn te te» (Proverbios 15:15).

 «Tzaj tqʼamaʼn jun wamiwe weʼye qa mas bʼaʼn tuʼn ntzalaje tiʼj ambʼil aj ntene njunalxe. Tqʼama qa bʼaʼn tuʼn qnaqʼet tuʼn qten jun rat kyukʼil txqantl ex tuʼn qten qjunalx» (Ivy).