KYXJEL KUʼXUN
¿Tiʼ jaku bʼant wuʼne tuʼn tbʼant-xix nyoline kyukʼil txqantl?
¿Tiquʼn mas bʼaʼn qa ma yolina tukʼil jun xjal twitzju tuʼn tyolina oʼkx toj mensaje tukʼil?
At junjun in tzaj qʼamante qa kwest tuʼn qyolin tukʼil jun xjal ex qa jaku tzaj bʼaj qkʼuʼj tuʼn jlu, tuʼntzunju in kubʼ kyximen qa mas bʼaʼn tuʼn kyajbʼen mensaje quʼn.
«Kwest qa ma yolina tukʼil jun xjal porque qa ma tzʼel tzpeta tiʼj jun tyola ya mlay txi tbʼinchaʼna tiʼj ex ya mlay jatz tborrarina» (Chi Anna).
«Aj kyajbʼen mensaje de texto quʼn tuʼn qyolin jaku kubʼ qximen alkye qe yol che ajbʼel quʼn pero aj qyolin tukʼil jun xjal ya mlay txi qbʼinchaʼn kyiʼj yol otoq chex qqʼamaʼn. ‹Okx in chin ximane tiʼj: ¡Tuʼn miʼn wel tzpete kyiʼj nyole!›» (Chi Jean).
Noqtzun tuʼnj, kpol ambʼil jatumel il tiʼj tuʼn tyolina tukʼil jun xjal. Jun techel, qa taja tuʼn kyten tamiwoya, tuʼn tkanet jun taqʼuna, moqa aj tkubʼ t-ximana tuʼn tkubʼ mojeʼya, il tiʼj tuʼn tyolina tukʼil xjal.
At jun tbʼanel tqanil teya, jaku bʼant tyolina kyukʼil xjal maske in tzaj xobʼa moqa in tzaj tchʼixwiya.
«At maj jaku txi tqʼamaʼna junjun tyola nya tuʼj tumel ex jaku tzaj tchʼixwiya tuʼn. Miʼn kubʼ t-ximana qa mlayx tzʼel tzpeta pero qa ma tzʼel tzpeta bʼaʼn tuʼn tjaw tzeʼna tiʼjxa» (Chi Neal).
Tzeʼn jaku txi tzyet tuʼn tyolina
Bʼaʼn tuʼn t-xi tqanina qe xjel. Ximana tiʼj jun tiʼ kyaj xjal tuʼn kyyolin tiʼj ex jaku txi tzyet tuʼn tyolina kyukʼil aj t-xi tqanina jun xjel ik tzeʼn qe jlu:
«¿Ope tzʼok tbʼiʼna bʼitz lu?».
«¿Tgana videojuego lu?».
«¿Ok tkeʼyina partido toj seman lu?
Jaku kanet juntl tumel tuʼna tuʼn tyolina tukʼil jun xjal qa ma ximana tiʼj jun tiʼ junx in bʼant kyuʼne. Jun techel, bʼalo ax escuela in che xnaqʼtzane moqa ax aqʼuntl in che aqʼunane tiʼj. ¿Jaku txi tqanina junjun xjel at toklen tukʼil jlu tuʼntzun t-xi tzyet tyolina?
«Ximana tiʼj jun tiʼ taja tuʼn ttzaj tqʼamaʼn xjal teya ex qaninxa jun xjel tiʼj jlu» (Chi Maritza).
Tenx tnabʼila: Miʼn txi tqanina nim xjel kye xjal. Axpe ikx miʼn txi tqanina qe xjel jaku kubʼ kynaʼn xjal nya bʼaʼn tuʼn. Ik tzeʼn qa ma txi tqanina «¿Alkye jun tiʼ mas in tzaj xobʼa tuʼn?» moqa aj t-xi tqanina «¿Tiquʼn ax t-xbʼaluna color azul in nok tqʼoʼna?». Qa ma che ajbʼen qe xjel lu quʼn jaku kubʼ kyximen xjal qa in qo yolin nya bʼaʼn kyiʼj.
Tbʼanel qa ma txi tqʼamaʼna te xjal alkye teya t-ximbʼetz at tiʼj xjelbʼitz in che yoline tiʼj. Jaku bʼant jlu tuʼna naʼmx moqa otoq tzaj ttzaqʼweʼn xjal aju xjelbʼitz, tuʼntzun miʼn tkubʼ tnaʼn xjal qa in nok toj xjel tuʼna sino qa oʼkx taja tuʼn tyolina tukʼil.
Qʼonka kwent kyiʼj xjel in xi tqanina tuʼntzun miʼn tkubʼ kyximen txqantl qa in noka ik tzeʼn jun polisiy.
Nabʼil toj Tyol Dios: «Aju t-ximbʼetz jun xjal tuj ewaj in bʼant, ik tten ik tzaʼn jun aʼ maʼ t-xeʼ, ex aju xjal at tnabʼl jurat nneʼl tnikʼ tiʼj» (Proverbios 20:5).
Qʼonka twiʼya tiʼj. Tuʼn kukx tyolina tukʼil xjal, mas nim toklen tuʼn tok tqʼoʼna twiʼya tiʼj twitzju tuʼn tbʼant tyolina.
«In nok tilil wuʼne tuʼn tel mas nnikʼe tiʼj xjal in chin yoline tukʼil. Yajxitl in nok tilil wuʼne tuʼn ttzaj nnaʼne aju otoq qo yoline tiʼj, ex in chin ximane tiʼj junjuntl xjel jaku txi nqanine te aj qyoline juntl maj» (Chi Tamara).
Tenx tnabʼila: Miʼn tzaj bʼaj tkʼuʼja tiʼjju alkye yol kxel tqʼamaʼna. Qa ma tzʼok tqʼoʼna twiʼya tiʼj tyol xjal mas jaku tzʼel tnikʼa tiʼj tiʼ kxel ttzaqʼweʼna tuʼntzun kukx kyyoline.
Nabʼil toj Tyol Dios: «Bʼaʼn tuʼn t-xi kybʼiʼn naje ju yol, pero mya jurat naj tuʼn kyyoline» (Santiago 1:19).
Ximana kyiʼj txqantl. Jaku kubʼ tnana nim tzalajbʼil aj tyolina tukʼil jun xjal qa ma tzʼok tilil tuʼna tuʼn t-ximana tiʼj.
«Aj tel tnikʼ xjal tiʼj qa in nok tilil tuʼna tuʼn tok tqʼoʼna toklen tyol, kbʼel kynaʼne bʼaʼn aj kyyoline, maske atlo maj tzul xobʼa» (Chi Marie).
Tenx tnabʼila: Miʼn txi tqanina jun xjelbʼitz aju jaku kubʼ tnaʼn xjal nya bʼaʼn tuʼn. Qa ma txi tqʼamaʼna. «Tbʼanel t-xbʼaluna! ¿Jteʼ tzaj tuʼna?» tuʼn jlu jaku kubʼ kynaʼn xjal qa in nokx qqʼon qibʼ toj kyanqʼibʼil.
Nabʼil toj Tyol Dios: «Teyle junjun mya noq oʼkx tuʼn tok tqʼoʼn tkwent tiʼj aju at tajbʼen te, ax ikx tuʼn tok tqʼoʼn tkwent tiʼj aju at tajbʼen kye txqantl» (Filipenses 2:4).
¿Tzeʼn jaku kubʼaj tuʼn tyolina? In tzaj tqʼamaʼn jun kuʼxun Jordan tbʼi: «Tzʼok tilil tuʼna tuʼn tkubʼaj kyyole tukʼil jun tbʼanel yol. Jaku txi tqʼamaʼna jun tbʼanel yol ik tzeʼn jlu ‹tbʼanel tuʼnju ma qo yolin›, moqa ‹chebʼe tzʼex tqʼija›, a jlu jaku tzʼonin tuʼn tzaj tqʼoʼn xjal ambʼil teya tuʼn tyolina tukʼil toj juntl maj».