KYXJEL KUʼXUN

¿Tiʼ in kubʼ kyximen txqantl wiʼje?

TUʼN TOK QBʼIʼN TOJ

¿Tiquʼn nim toklen tzeʼn in bʼaj t-xbʼalumin tibʼa? Tuʼnju tuʼn t-xbʼaluna jaku tzʼel kynikʼ txqantl tiʼj tiʼ t-ximbʼetza at. Tuʼntzunju, ¿tiʼ in kubʼ kyximen txqantl tiʼja tuʼn t-xbʼaluna?

Oxe tiʼ mintiʼ tuʼn tbʼant tuʼna aj tjaw tjyoʼna t-xbʼaluna de moda ex tiʼ jaku bʼant tuʼna tuʼn miʼn tel tkanoʼna

Tnejel: Miʼn txi tqʼoʼna ambʼil kye anuncio tuʼn ttzaj kyqʼamaʼn teya alkye t-xbʼaluna kʼokel tqʼoʼna.

In tzaj tqʼamaʼn jun txin jlu aju Theresa tbʼi: «At maj in nok nkeʼyine jun anuncio tiʼj jun tiʼ nimku maj ex tuʼn jlu tbʼanel in nela toj nwitze. Aj tok nqʼoʼne nwitze kyiʼj anuncio ex ax kyxbʼalun nimku xjal tok, ax ikx weye waje tuʼn tel nkanoʼne».

Nya oʼkx qe xuʼj in chʼexpaj kyximbʼetz kyuʼn anuncio. In tzaj tqʼamaʼn uʼj The Everything Guide to Raising Adolescent Boys (Una guía completa para criar chicos adolescentes) jlu: «Ax ikx kye qʼa in che ok lepeʼ tiʼj moda [...]. Akux kʼwalx qe, in nok kyqʼoʼn kywitz kyiʼj anuncio in kubʼ kyqʼoʼn xjal».

Aju mas tbʼanel: In tzaj tqʼamaʼn Tyol Dios jlu: «Aju xjal mintiʼ tnabʼl in xi tniman tkyaqil aju in tzaj qʼmaʼn te; atzunju xjal at tnabʼl tok tkwent tiʼj jatum in bʼet» (Proverbios 14:15). Tuʼntzunju, ximana tiʼj tiʼ kyaj anuncio tuʼn ttzaj kyqʼamaʼn teya. Jun techel, aj tok tkeʼyina qe anuncio jatumel in che etz yekʼin xjal tok kyxbʼalun jitzʼ. Bʼaʼn tuʼn tkubʼ t-xjelina jlu:

«¿Alqe tzul tbʼanel qa ma chin ok lepeʼ tiʼj moda lu?»
«¿Tiʼ kyximbʼetz txqantl ktel wiʼje tuʼn xbʼalun lu?»
«¿Tzulpe tyekʼin xbʼalun alkye qine ex tiʼ okslaʼn wuʼne?»

Jun consej. Toj jun seman, qʼonka twitza tiʼj anuncio in netz kyiʼj xbʼalun. ¿Kyajpe kʼayil tuʼn tel tkanoʼna kyanqʼibʼil xjal in che etz yekʼin toj? ¿In nokpe tilil kyuʼn tuʼn tok lepeʼya tiʼj kyxbʼalun maske mintiʼ in nel tnikʼa tiʼj? In tzaj tqʼamaʼn jun txin jlu aju Keren tbʼi: «In nok tilil kyuʼn xjal tuʼn tok qqʼoʼn qxbʼalun mas akʼaj, tuʼn tbʼajxix qbʼinchaʼn qten ex kyaj tuʼn tok kyqʼoʼn kywitz txqantl tiʼj tbʼanel qxmilal. Ojtzqiʼn kyuʼn xjal bʼinchal anuncio qa mas jun rat jaku kubʼ kykʼuʼj kuʼxun».

Tkabʼin: Miʼn tzʼok tqʼoʼna xbʼalun at de moda noq tuʼn t-xi kʼamoʼna kyuʼn txqantl.

In tzaj tqʼamaʼn jun qʼa jlu aju Manuel tbʼi: «Aj tetz jun xbʼalun de moda, kykyaqil xjal kyaj tuʼn tok kyqʼoʼn. Ex in che ok ten yolil nya bʼaʼn tiʼja qa mintiʼ ma tzʼok tqʼoʼna». Chʼixme ax jlu in tzaj tqʼamaʼn jun txin Anna tbʼi: «Nya oʼkx tuʼn tok tqʼoʼna t-xbʼaluna de moda, sino nim toklen tuʼn t-xi kʼamoʼna kyuʼn tamiwa».

Aju mas tbʼanel: In tzaj tqʼamaʼn Biblia jlu: «Miʼn che ok lpeʼye tiʼj kynabʼl xjal mya bʼaʼn» (Romanos 12:2). Tbʼanel consej lu, tuʼntzunju, qʼonka twitza kyiʼj t-xbʼaluna ex xjelinkuya jlu:

«¿Alqiʼj in chin ximane aj tjaw njyoʼne nxbʼalune?»
«¿Nimpe toklen toj nwitze tuʼn ttzaj nlaqʼoʼne qe xbʼalun de marca?»
«¿In jawpe nnimsane wibʼe kywitz txqantl tuʼnju alkye tten in bʼaj nbʼincha’n ntene?»

Jun consej. Nya oʼkx tuʼn t-ximana tiʼj tuʼn ttzaj tlaqʼoʼna qe xbʼalun de moda ex tuʼn t-xi kʼamoʼna kyuʼn tamiwa, moqa tuʼn tok tqʼoʼna t-xbʼaluna toj tumel ex tuʼn tel ikʼuna. Sino tzʼok tilil tuʼna tuʼn ttzaj tjyoʼna qe xbʼalun tbʼanel che keʼyin toj twitza. Aj tkubʼ tnaʼna bʼaʼn tuʼn jlu, kʼonil tiʼja tuʼn miʼn ttzaj tbʼisa tuʼn kyyol txqantl.

Toxin: Miʼn tzʼok tqʼoʼna t-xbʼaluna jitzʼ

In tzaj tqʼamaʼn jun txin aju Jennifer tbʼi jlu: «At maj waje tuʼn tok nqʼoʼne nxbʼalune qʼanchaʼl nxmilale toj, jitzʼ ex ẍtʼank moqa strekʼ».

Aju mas tbʼanel: In tzaj tqʼamaʼn Tyol Dios jlu: «Aju kyyekʼbʼil kyibʼe myawt aju qʼanchaʼl [...] noq oʼkx tuʼn kyyekʼunteye aju at tuj kyanmiye» (1 Pedro 3:3, 4). Tuʼn t-xi tbʼiʼna consej lu, bʼaʼn tuʼn t-ximana tiʼj alkye mas bʼaʼn, ¿aju tuʼn tok bʼaj kywitz xjal tiʼja tuʼnju alkye tten in bʼaj t-xbʼalumin tibʼa moqa tuʼnju ateʼ tbʼanel tmoda?

Jun consej. Aju mas tbʼanel t-xbʼaluna jaku tzʼok, aju qa mintiʼ ma jaw tniman tibʼa toj. Maske mintiʼ in bʼant jlu kyuʼn xjal toj ambʼil jaʼlo, ximana tiʼj jlu:

¿Ope yolina jun maj tukʼil jun xjal aju oʼkx in yolin tiʼjx? Bʼisbʼajil tuʼnju mintiʼ in nel tnikʼ xjal tiʼj qa oʼkx in che el laqʼeʼ txqantl tiʼj tuʼn jlu.

Qa oʼkx in yolin jun xjal tiʼjx, in che el laqʼeʼ txqantl tiʼj. Ax jlu in bʼaj tukʼil alkye tten in bʼaj qxbʼalumin qibʼ.

Ax jlu jaku bʼaj tiʼja qa mintiʼ ma bʼaj t-xbʼalumin tibʼa toj tumel. Aj tok bʼaj kywitz xjal tiʼja tuʼn t-xbʼaluna, jaku kubʼ tyekʼina qa mintiʼ in nok qeʼ tkʼuʼja tiʼjxa ex qa creído teya. Ax ikx jaku txi tqʼoʼna ambʼil kye txqantl tuʼn tten nya bʼaʼn kyximbʼetz tuʼn t-xbʼaluna.

Qʼonka tilil tuʼn miʼn tjaw tnimsan tibʼa toj t-xbʼaluna ex miʼn txi tqʼoʼna ambʼil kye txqantl tuʼn tkubʼ kyximen nya bʼaʼn tiʼja. In tzaj tqʼamaʼn Monica jlu: «Aj tbʼaj t-xbʼalumin tibʼa toj tumel, mintiʼ in tzaj tyekʼin jlu qa il tiʼj tuʼn tbʼaj t-xbʼalumin tibʼa ik tzeʼn te tyaya. Sino in kubʼ tyekʼina qa in nok tqʼoʼna toklena ex kyoklen txqantl».