•  ¿In tzajpe xobʼa tuʼn jun maestro?

•  Aju jaku bʼant tuʼna

•  ¿Yajtzun qa ma yolina tukʼil profesor?

•  Aju in tzaj kyqʼamaʼn junjuntl kuʼxun

 Chʼixme tkyaqil maj, ateʼ nim kuʼxun in kubʼ kyximen qa in kubʼ tyekʼin jun profesor nya bʼaʼn tmod kyukʼil moqa in tzaj tqanin nim tiʼchaq kye.

•   In tzaj tqʼamaʼn Luis jlu, jun qʼa te 21 abʼqʼi: «Jun maestra tzaj tqʼoʼn xnaqʼtzbʼil weye, kukxtoq in yolin kyiʼj nya bʼaʼn yol ex mintiʼtoq in nok tqʼoʼn kyoklen t-alumno. Chʼixtoq tjubilarin, tuʼntzunju mintiʼtoq in tzaj xobʼ tuʼn tel qʼiʼn taqʼun».

•   In tzaj tnaʼn Melanie, jun txin te 25 abʼqʼi, qa oʼkx tukʼil kubʼ tyekʼin jun maestra nya bʼaʼn tmod. «Tzaj tqʼamaʼn weye qa iltoq tiʼj tuʼn nnaqʼete tuʼn tok bʼinchaʼn nya bʼaʼn wiʼje tuʼnju nyatoq nim toklen okslabʼil jatumel in chinxtoqe».

 Maske in kubʼ tyekʼin jun profesor nya bʼaʼn tmod tukʼila toj abʼqʼi lu, jaku bʼant junjun tiʼchaq tuʼna tuʼn ttzalaja.

•   Bʼinchama aju in xi qʼamaʼn teya. Tuʼnju nya aʼyex tiʼchaq in xi kyqanin profesor kye ky-alumno, bʼaʼn tuʼn tel tnikʼa tiʼj tiʼ taj teya tmaestro tuʼn tbʼant tuʼna ex qʼonka tilil tuʼn t-xi tbʼinchaʼna.

   Texto nim toklen: «Aju xjal at tnabʼl ex list in kubʼ tqʼoʼn twiʼ kyiʼj qe yol bʼaʼn» (Proverbios 1:5).

   «El nnikʼe tiʼj qa iltoq tiʼj tuʼn t-xi nbʼinchaʼne aju in tzalaj maestra tiʼj. Tuʼntzunju, ok tilil wuʼne tuʼn t-xi nbʼinchaʼne ndebere ik tzeʼn taj. Onin jlu wiʼje tuʼntzun ttzalaj wiʼje» (Christopher).

•   Bʼaʼn tuʼn trespetarina. Yolina toj tumel kyukʼil maestro ex respetarina kye maske in kubʼ t-ximana qa mintiʼ kyoklen tiʼj jlu. Ex bʼaʼn tuʼn ttzaj tnaʼna qa nya junx toklena kyukʼil.

   Texto nim toklen: «Chebʼa che yoline tkyaqil maj, atwit tchyaʼl kyyole, tuʼntzun tel kynikʼe tiʼj tzaʼn tten tuʼn t-xi kytzaqʼweʼne teyle junjun xjal» (Colosenses 4:6).

   «Chʼixme tkyaqil maj, mintiʼ in che respetarin alumno kye profesor. Pero qa ma tzʼok tqʼoʼna kyoklen, kʼokel qʼoʼn toklena kyuʼn» (Ciara).

•   Tzʼelx tnikʼa kyiʼj. Bʼaʼn tuʼn ttzaj tnaʼna qa ax ikx kye maestro in che ok weʼ twitz nya bʼaʼn ik tzeʼn kye txqantl. Tuʼntzunju, miʼn kubʼ t-ximana qa nya bʼaʼn kymod ex qa in nel ikʼuna kyuʼn.

   Texto nim toklen: «Porke qkyaqil nimku maj in qo tzpet tiʼj» (Santiago 3:2).

   «Kwest kyaqʼun profesor. Noqwit maestro qine, mintiʼwtlo ojtzqiʼn wuʼne tiʼ jaku txi nbʼinchaʼne tuʼn miʼn kymolestarin kʼwal ex tuʼn tel kynikʼ tiʼj xnaqʼtzbʼil. Tuʼntzunju, ok tilil wuʼne tuʼn miʼn tkubʼ nqʼoʼne mas kyaqʼun maestro» (Alexis).

•   Yolina kyukʼil tmana. Kyaj tmana tuʼn ttzalaja toj escuela, tuʼntzunju jaku txi kyqʼoʼn tbʼanel consej teya tuʼntzun ttzalaja kyukʼil maestro.

   Texto nim toklen: «Mintiʼ in japun aju in kubʼ kyximen xjal qa mi aʼl jun qʼol kyconsej» (Proverbios 15:22).

   «O che ex tmana kywitz nim nya bʼaʼn. Tuʼntzunju bʼaʼn tuʼn t-xi tbʼiʼna kyyol ex ktzalajela» (Olivia).

 Atlo maj, kpol ambʼil tuʼn tyolina tukʼil profesor in kubʼ tyekʼin nya bʼaʼn tmod tukʼila ex kxel tqʼamaʼna te tiʼ in kubʼ tnaʼna. Qa ma tzaj xobʼa, bʼaʼn tuʼn ttzaj tnaʼna qa mintiʼ in jyona qʼoj, sino oʼkx taja tuʼn tyolina tukʼil. Ex maslo tbʼanel kʼelel twitzju otoq kubʼ t-ximana.

 Texto nim toklen: «Qo lepeʼk tiʼj ju in tzaj qʼinte qmojbʼabʼl qibʼ qxolx» (Romanos 14:19).

 «Qa in kubʼ t-ximana qa in qʼojin profesora tiʼja, qaninxa te tiʼ nya bʼaʼn o tzʼok tbʼinchaʼna tiʼj. Noq tiʼxku tzul tqʼamaʼn teya, kʼonil tiʼja tuʼn tkubʼ tyekʼina mas tbʼanel tmoda» (Juliana).

 «Tbʼanel tuʼn t-xi tjyoʼna jun tbʼanel ambʼil tuʼn tyolina tukʼil profesor tiʼjju in kubʼ tnaʼna ex jaku bʼant jlu tuʼna naʼmxtoq t-xi tzyet clase moqa aj tkubʼaj. Tuʼn jlu, jakulo tzʼok tqʼoʼn toklena tuʼnju alkye tten ma yolina tukʼil» (Benjamín).

 JUN TIʼ O BʼAJ:

 «Nyatoq tbʼanel qe ncalificacione in che jatz ex mintiʼtoq in nonin maestra wiʼje. Wajtoqe tuʼn tkyaj ntzaqpiʼne tuʼn nxnaqʼtzane tuʼnju kubʼ tyekʼin nya bʼaʼn tmod wukʼile.

 «In jyone onbʼil tukʼil juntl profesor ex tzaj tqʼamaʼn jlu weye: ‹Nya ojtzqiʼna tuʼn maestra ex nya ojtzqiʼn tuʼna. Nim toklen tuʼn t-xi tqʼamaʼna te qa mintiʼxix in nel tnikʼa tiʼj xnaqʼtzbʼil. Jakulo tzʼonin jlu kyiʼj junjuntl alumno in che xobʼ tuʼn kyyolin tukʼil›.

 «Nyatoq waje tuʼn tbʼant jlu wuʼne, pero in ximane tiʼjju tzaj tqʼamaʼn weye... ex ax tok aju tzaj tqʼamaʼn. Qa wajtoqe tuʼn tonin wiʼje, iltoq tiʼj tuʼn nyoline tukʼil.

 «Toj juntl qʼij, in yoline tukʼil maestra ex xi nqʼamaʼne te qa tbʼaneltoq qe tclase ex qa wajtoqe tuʼn tel mas nnikʼe kyiʼj. Pero kwesttoq in nela toj nwitze ex mintiʼtoq ojtzqiʼn wuʼne tiʼ tuʼn t-xi nbʼinchaʼne. Tzaj tqʼoʼn junjun consej weye ex tzaj tqʼamaʼn qa jaku tzʼonin wiʼje aj tkubʼaj clase moqa toj correo electrónico.

 «¡Mintiʼ kubʼ nximane qa tuʼn tbʼaj jlu! Tej nyoline tukʼil, mas tbʼanel ok tkyaqil toj escuela» (María).

 Nabʼil: Qa kwest in nela toj twitza tuʼn ttena bʼaʼn tukʼil jun profesor, bʼaʼn tuʼn t-ximana tiʼj qa jaku tzʼonin jlu tiʼja mas yajxitl. In tzaj tqʼamaʼn Katie jlu, jun txin te 22 abʼqʼi: «Aj tetza toj escuela, kyolila kyukʼil xjal mas nim kyoklen ex atlo maj mlay kubʼ kyyekʼin tbʼanel kymod tukʼila. Qa ma kubʼ tyekʼina tbʼanel tmoda tukʼil jun profesor in kubʼ tyekʼin nya bʼaʼn tmod tukʼila, jaku tzʼonin jlu tiʼja tuʼn tkubʼ tyekʼina tbʼanel tmoda kyukʼil qeju jaku tzʼok kybʼinchaʼn nya bʼaʼn tiʼja toj ambʼil tzul».