Tkyaqil abʼqʼi, in che bautisarin nim kuʼxun kykʼwal testigo de Jehová. ¿In kubʼpe t-ximen teya tuʼn tbautisarina? Qa ikju, tnejel il tiʼj tuʼn tel tnikʼa tiʼj tiʼ t-xilen tuʼn t-xi qqʼamaʼn te Jehová tuʼn qajbʼen te ex tuʼn qbautisarin.

•  ¿Tiʼ t-xilen tuʼn qbautisarin?

•  Aj t-xi qqʼamaʼn te Jehová tuʼn qajbʼen te

•  ¿Tiquʼn nim toklen tuʼn qbautisarin?

•  Aju in tzaj kyqʼamaʼn junjuntl kuʼxun

•  Aju in tzaj kyqʼamaʼn txqantl ex aju axix tok

 Tuʼn tbautisarin jun xjal, nya oʼkx a t-xilen tuʼn tjax qoʼn aʼ toj twiʼ. In tzaj tqʼamaʼn Tyol Dios qa aj tbautisarin jun xjal, nim toklen tuʼn tkux bʼaj t-xmilal tjaqʼ aʼ ex in kubʼ techlaʼn jlu jun tiʼ nim toklen.

•   Aj tkuʼxa toj aʼ, in kubʼ tyekʼina kywitz txqantl qa ya mlay t-xi tbʼinchaʼna aju texa tajbʼila.

•   Aj tjatza toj aʼ, in kubʼ tyekʼina qa in xi tzyet jun akʼaj tanqʼibʼila ex qa kʼokel tqʼoʼn twiʼya tiʼjju tajbʼil Dios.

 Aj tbautisarina, in kubʼ tyekʼina kywitz txqantl qa at toklen Jehová tuʼn tkubʼ t-ximen alkye bʼaʼn ex alkye nya bʼaʼn. Ax ikx, in kubʼ tyekʼina kywitz txqantl qa o txi tqʼamaʼna te Dios qa kxel tbʼinchaʼna aju tajbʼil tuʼn tbʼant tuʼna.

 Ximana tiʼj jlu: ¿Tiquʼn jaku txi tqʼamaʼna te Jehová kywitz txqantl qa kʼajbʼela te toj tkyaqil tanqʼibʼila? Uʼjinktza 1 Juan 4:19 ex Apocalipsis 4:11.

 Naʼmxtoq tbautisarina, bʼaʼn tuʼn t-xi tqʼamaʼna te Dios qa taja tuʼn tajbʼena te. ¿Tzeʼn jaku bʼant jlu tuʼna?

 In bʼant jlu tuʼna aj t-xi tqʼamaʼna te Jehová toj jun naʼj Dios qa kʼajbʼela te te jumajx noq tiʼxku jaku bʼaj ex noq tiʼxku jaku bʼant kyuʼn txqantl.

 Ex aj tbautisarina, in kubʼ tyekʼina kywitz txqantl qa o txi tqʼamaʼna jlu te Jehová. In nok jlu ik tzeʼn in xi tqʼamaʼna kye txqantl qa in kyaj tqʼoʼna tchwinqlala toj tqʼabʼ Jehová ex qa a in nok te tajaw (Mateo 16:24).

 Ximana tiʼj jlu: ¿Tiquʼn in nok tanqʼibʼila te mas tbʼanel aj tkyaj tqʼoʼna toj tqʼabʼ Jehová? Uʼjinktza Isaías 48:17, 18 ex Hebreos 11:6.

 Kyaj tqʼamaʼn Jesús qa il tiʼj tuʼn kybautisarin t-xnaqʼtzbʼen. Tuʼn jlu, in nel qnikʼ tiʼj qa in nok te jun requisito (Mateo 28:19, 20). Toj ambʼil jaʼlo, ax ikx nim toklen tuʼn kybautisarin okslal. Ex in tzaj tqʼamaʼn Tyol Dios qa il tiʼj tuʼn tbʼant quʼn tuʼntzun qklet (1 Pedro 3:21).

 Bʼaʼn tuʼn ttzaj tnaʼna qa ma bautisarina, il tiʼj tuʼn tbʼant jlu tuʼna tuʼnju kʼujlaʼn Jehová tuʼna ex tuʼnju nim toklen tamiwbʼil toj twitza. Bʼaʼn tuʼn tten t-ximbʼetza ik tzeʼn te jun salmista tej tqʼama jlu: «¿Tzaʼn tten tuʼn tchjet wuʼne te Qman tkyaqilju bʼaʼn o tbʼincha wiʼje?». Tqʼamatl jlu: «Te Qman tuʼn t-xi nqʼoʼne chjonte te, tuʼnju ma chin klete tuʼn. Kjapunel wuʼne tkyaqilju yol xi ntziyane te Qman kywitz kykyaqil xjal etzan tuʼn» (Salmo 116:12-14).

 Ximana tiʼj jlu: ¿Tiʼ o bʼant tuʼn Jehová tiʼja ex tzeʼn jaku txi tqʼoʼna chjonte te? Uʼjinktza Deuteronomio 10:12, 13 ex Romanos 12:1.