KYXJEL KUʼXUN
¿Tiʼ jaku tzʼonin wiʼje tuʼn nbʼinchane ejercicio?
¿Tiquʼn bʼaʼn tuʼn nbʼinchane ejercicio?
Kyoj junjun tnam, ya mintiʼ in nel kypaʼn kuʼxun ambʼil tuʼn kybʼinchan ejercicio, tuʼn jlu jaku tzaj yabʼil kyiʼj. Tuʼntzunju, toj tumel aj ttzaj tqʼamaʼn Tyol Dios qa jaku tzʼonin ejercicio tiʼj qxmilal (1 Timoteo 4:8). Ximana tiʼj jlu:
Jaku kubʼ tnaʼna bʼaʼn qa ma bʼinchana ejercicio. Aj qbʼinchan ejercicio, in nonin tiʼj qcerebro tuʼn tbʼant jun tiʼ tuʼn aju endorfinas tbʼi, ex in nonin sustancia lu qiʼj tuʼn tkubʼ qnaʼn bʼaʼn ex tuʼn qtzalaj. Ateʼ junjun xjal in tzaj kyqʼamaʼn qa in nonin ejercicio qiʼj tuʼn miʼn ttzaj depresión qiʼj.
«Qa in chin exe ojqelal te prim, in bʼant mas aqʼuntl wuʼne ex in kubʼ naʼne bʼaʼn. Ax ikx, in chin tzalaje aj tex qʼij» (Regina).
In nonin ejercicio tuʼn tten tbʼanel t-ximbʼetza tiʼjxa. Qa ma bʼinchana ejercicio, mas tbʼanel kʼokel t-xmilala, ktel tipumala ex kʼokel qeʼ tkʼuʼja tiʼjxa.
«Tbʼanel qa ma bʼant 10 abdominales tuʼna. Toj abʼqʼi xkyaj, mlaytoq bʼant jun wuʼne. Pero aju mas nim toklen, in nok nxqʼuqine nxmilale» (Olivia).
Jaku tzʼanqʼina mas ambʼil qa ma bʼinchana ejercicio. Tuʼn taqʼunan qchkʼel toj tumel ex tuʼn t-xi qjaqʼoʼn kyqʼiqʼ toj tumel, bʼaʼn tuʼn qbʼinchan ejercicio. Ax ikx, ateʼ junjun ejercicio in che onin qiʼj tuʼn taqʼunan qanmi toj tumel, ik tzeʼn tuʼn qojqelan, tuʼn qnadarin ex tuʼn qxiʼ tibʼaj bisiklet. Nim xjal in che kyim tuʼnju mintiʼ in naqʼunan kyanmi toj tumel.
«Qa naqʼli qoʼ tuʼn qbʼinchan ejercicio, in kubʼ qyekʼin qa in nok qqʼoʼn toklen qxmilal teju Bʼinchal qe» (Jessica).
Toj chʼin yol: Nim jaku tzʼonin tiʼja qa ma bʼinchana ejercicio. Nya oʼkx kʼonil tiʼja toj ambʼil tzul, sino ax ikx toj ambʼil jaʼlo. In tzaj tqʼamaʼn jun txin jlu, aju Tonya tbʼi: «Mlayx tqʼamaya jlu: ‹¿Tiquʼn ma chin exe bʼetil moqa carrelil?›». Ax ikx tqʼama jlu: «Qa ma tzʼok tilil wuʼne tuʼn nbʼinchane ejercicio, mintiʼ in tzaj nbʼise».
Qa mintiʼ ma tzʼok xqʼuqit jun kar, kpol qʼij tuʼn tnaj. Axju jaku bʼaj tiʼja qa mintiʼ ma bʼinchana ejercicio.
¿Tiquʼn nya waje tuʼn nbʼinchane ejercicio?
Bʼalo at nim tiquʼn:
Nya nim toklen te weye. «In kubʼ kyximen qʼa ex txin qa at nim kyipumal tuʼnju kuʼxun qe. Mintiʼ in kubʼ kyximen qa kpol jun qʼij tuʼn ttzaj yabʼil kyiʼj. In kubʼ kyximen qa oʼkx in tzaj yabʼil kyiʼj qeju ma che tijen» (Sofía).
Mintiʼ ambʼil wiʼje. «At nim tiʼchaq in bʼant wuʼne, kwest tuʼn tel npaʼne ambʼil tuʼn nwaʼne ex tuʼn njtane, yajtzun te tuʼn nbʼinchane ejercicio» (Clarissa).
Mintiʼ npwaqe tuʼn nxiʼye toj gimnasio. «In xi tiʼn nim pwaq tuʼn tten tbʼanel qxmilal. Porke qa taja tuʼn t-xiʼya toj gimnasio, il tiʼj tuʼn t-xi tchjoʼna» (Gina).
Ximana tiʼj jlu:
¿Atpe jun tiʼ kwest in nela toj twitza tuʼn tbʼinchana ejercicio? Kʼokel tilil tuʼna tuʼn tkubʼ tiʼj jlu, pero tbʼanel qa ma bʼant tuʼna.
¿Tiʼ jaku tzʼonin wiʼje tuʼn nbʼinchane ejercicio tuʼntzun miʼn ttzaj yabʼil wiʼje?
Qo xnaqʼtzan kyiʼj junjun nabʼil:
Toj tkwenta taʼ tuʼn miʼn ttzaj yabʼil tiʼja (Gálatas 6:5).
Miʼn kubʼ t-ximana qa mlay bʼant ejercicio tuʼna (Eclesiastés 11:4). Jun techel, nya il tiʼj tuʼn qxiʼ toj gimnasio tuʼn qbʼinchan ejercicio. Bʼinchama jun ejercicio mas tgana ex kukx bʼinchama tkyaqil qʼij.
Qaninxa kye junjuntl alkye ejercicio in bʼant kyuʼn (Proverbios 20:18).
Ximinkuya alkye or kbʼinchala ejercicio, tiquʼn kbʼantel tuʼna ex tiʼ jaku tzʼonin tiʼja tuʼn kukx tbʼant tuʼna. Ax ikx tzʼibʼinkuya tzeʼn jaku tzʼonin tiʼja (Proverbios 21:5).
Jyontza jun tukʼila tuʼntzun tbʼinchana ejercicio. Jaku tzʼonin tiʼja ex jaku txi tqʼamaʼn teya tuʼn kukx tok tilil tuʼna (Eclesiastés 4:9, 10).
At maj kwest kʼelel toj twitza, pero miʼn sikta (Proverbios 24:10).
Tenx t-ximbʼetza toj tumel tiʼj ejercicio
In tzaj tqʼamaʼn Tyol Dios tuʼn tten qximbʼetz toj tumel kyiʼj tiʼchaq in che bʼant quʼn (1 Timoteo 3:2, 11). Tuʼntzunju, tenx t-ximbʼetza toj tumel tiʼj ejercicio. Aqeju in che ximen oʼkx tiʼj ejercicio, ya mintiʼ in che ximen kyiʼj tiʼchaq mas nim kyoklen. In tzaj tqʼamaʼn jun txin jlu, aju Julia tbʼi: «Qa oʼkx in ximen jun qʼa tuʼn tok t-xmilal te tbʼanel ex nya tuʼn tok tnabʼil, nya bʼaʼn in nela jlu toj nwitze».
Xqʼuqink tibʼa aj tok tbʼiʼna jlu: «Qa ma choʼn t-xmilala tuʼn ejercicio, bʼinchama mas tuʼntzun tel kʼixkʼoj tiʼja». Qa ma txi tbʼiʼna jlu, jaku tzaj nya bʼaʼn tiʼj t-xmilala ex ya mlay tzʼok tqʼoʼn twiʼya kyiʼj tiʼchaq mas nim kyoklen (Filipenses 1:10).
Ax ikx, jaku tzʼel tzpet tnabʼila tuʼn jlu. In tzaj tqʼamaʼn jun txin Vera tbʼi: «Ateʼ junjun txin in xi kykʼuʼn kyfoto xjal tbʼanel che keʼyin ex kyaj tuʼn kyok ik tzeʼn kye. In nok kyqʼoʼn kywitz kyiʼj foto lu tuʼntzun tok tilil kyuʼn tuʼn kybʼinchaʼn ejercicio. Pero aj tok kymojbʼan kyibʼ kyukʼil xjal lu, in tzaj bʼaj kykʼuʼj. Mas tbʼanel tuʼn qbʼinchan ejercicio tuʼn miʼn ttzaj yabʼil qiʼj, ex nya oʼkx tuʼn tten jun tbʼanel qxmilal».