Xi qanin kye junjun kuʼxun atz Estados Unidos qa in che naʼn Dios ex tzaj tqʼamaʼn 80% qa in bʼant jlu kyuʼn, pero oʼkx 40% in naʼn Dios tkyaqil qʼij. Atlo junjun in kubʼ kyxjelin jlu: «¿Oʼkxpe in nonin naʼj Dios wiʼje tuʼn tkubʼ nnaʼne bʼaʼn?».

•  ¿Tiʼxix aju naʼj Dios?

•  ¿Axpe tok in chin tzaj bʼiʼne tuʼn Dios?

•  ¿Alkyeqe tiʼchaq jaku chin naʼne Dios tiʼj?

•  Aju in tzaj kyqʼamaʼn junjuntl kuʼxun

 Aj qnaʼn Dios in qo yolin tukʼil Jehová, aju kubʼ Bʼinchante tkyaqil. Maske mas nim toklen Dios twitz alkyexku juntl, «mya najchaq taʼ ttxlaj junjun qe» (Hechos 17:27). Ex in tzaj tqʼoʼn Xjan Uʼj txokbʼil lu qe: «Che laqʼexe ttxlaj Dios, ax ikx te ktzajel laqʼeʼ kyukʼile» (Santiago 4:8).

 ¿Tiʼ jaku bʼant tuʼna tuʼn tok laqʼeʼya ttxlaj Dios?

•   Aj tnaʼna Dios, in yolina tukʼil Jehová.

•   Aj tuʼjina tiʼj Xjan Uʼj, in yolin Dios tukʼila.

 Qa ma naʼna Dios ex qa ma xnaqʼtzana tiʼj Xjan Uʼj, kʼonil tiʼja tuʼn tten jun tbʼanel tamiwbʼila tukʼil Dios.

 «Jun tbʼanelxix kyoklen xjal tuʼnju jaku che yolin tukʼil Jehová, aju maʼxix toklen» (Jeremy).

 «Aj t-xi nqʼamaʼne te Jehová aju in kubʼ nnaʼne, in nonin wiʼje tuʼn tel nnikʼe tiʼj qa nqayin atine ttxlaj» (Miranda).

 Maske in nok qeʼ tkʼuʼja tiʼj qa axix tok at Dios ex in nnaʼne Dios te, jakulo kubʼ t-ximana qa mintiʼ in tzaj bʼiʼna tuʼn. Pero in tzaj tqʼamaʼn Xjan Uʼj qa in qo tzaj tbʼiʼn Dios (Salmo 65:2). Ex taj tuʼn t-xi tqʼamaʼna te tkyaqilju in bʼaj tkʼuʼja tiʼj. ¿Tiquʼn? Tuʼnju in ximen Dios tiʼja (1 Pedro 5:7).

 Ximana tiʼj jlu: ¿Kukxpe in yolina kyukʼil tamiwa? Ax jlu jaku bʼant tuʼna tukʼil Dios. Yolina tukʼil tkyaqil qʼij ex bʼaʼn tuʼn tajbʼen tbʼi tuʼna, aju Jehová (Salmo 86:5-7; 88:9). Ex in tzaj tqʼoʼn Xjan Uʼj txokbʼil tiʼja tuʼn kukx tnaʼna Dios te (1 Tesalonicenses 5:17).

 «Aj nnaʼne Dios te Ntate at toj kyaʼj in chin yoline tukʼil ex in xi nqʼamaʼne te tkyaqilju tkuʼx toj wanmiye» (Moises).

 «In chin yoline tukʼil Jehová kyiʼj tiʼchaq nim kyoklen, ik tzeʼn in bʼant wuʼne tukʼil ntxuʼye ex kyukʼil tbʼanel wamiwe» (Karen).

 In tzaj tqʼamaʼn Xjan Uʼj jlu: «Tkyaqil kymanxe te Dios tuj kynaʼj Diose; kyqaninxe te, ax ikx kyqʼonxe chjonte te» (Filipenses 4:6).

 ¿Ape t-xilen jlu qa jaku yolina tukʼil kyiʼj nya bʼaʼn in nok weʼya twitz? Jaku. Ax Tyol Dios in tzaj qʼamante tuʼn tbʼant jlu quʼn, chi: «Qʼonkja qe tbʼisa tuj tqʼabʼ Qman, ate ktzajel qʼonte tipuna tuʼn tikʼx tuʼna» (Salmo 55:22).

 Pero nya oʼkx jaku yolina kyiʼj nya bʼaʼn in nok weʼya twitz. In tzaj tqʼamaʼn jun txin aju Chantelle tbʼi: «Mlay chin oke te tbʼanel tamiw Jehová qa oʼkx in xi nqanine onbʼil te». Ex in tzaj tqʼamaʼntl jlu: «Toj nximbʼetze, aju tnejel tuʼn tbʼant quʼn aju tuʼn t-xi qqʼoʼn chjonte te, ex qa ma qo ximen tiʼj, jaku txi qqʼoʼn chjonte kyiʼj nim tiʼchaq».

 Ximana tiʼj jlu: ¿Alkyeqe tiʼchaq jaku txi tqʼoʼna chjonte te Jehová kyiʼj? Ximana kyiʼj oxe tiʼchaq jaku txi tqʼoʼna chjonte te Jehová jaʼlo.

 «Aj tok qqʼoʼn qwitz tiʼj jun tbʼanel bʼech, jaku tzʼonin qiʼj tuʼn t-xi qqʼoʼn chjonte te Jehová» (Anita).

 «Jaku ximana tiʼj jun taqikʼ Tyol Dios tgana moqa tiʼj jun tbʼanel tbʼinchbʼen Jehová, yajxitl qʼonxa chjonte te tiʼj jlu» (Brian).