«At maj in nok nxqʼuqin wibʼe tiʼjju in xi nqʼamaʼne, atzun junjuntl maj, mintiʼ in nonin nnabʼile wiʼje» (James).

 «Qa in chin luʼline mintiʼ in chin ximane tiʼj nyole, qatzun bʼaʼn atine, mas nim in chin yoline. Tuʼntzunju, tkyaqil maj in chin el txalpaje» (Marie).

 In tzaj tqʼamaʼn Tyol Dios jlu: «Ik tten qtziʼ ik tzaʼn qʼaqʼ». Ax ikx in tzaj tqʼamaʼn: «Tuʼn chʼin qʼaqʼ in bʼaj tzʼeʼy jun witz tuʼn» (Santiago 3:5, 6). ¿In tzajpe tbʼisa tuʼnju in xi tqʼamaʼna? Qa nim maj in bʼaj jlu tiʼja, kʼonil xnaqʼtzbʼil lu tiʼja.

•  ¿Tiquʼn in xi nqʼamaʼne aju mintiʼ tuʼn t-xi nqʼamaʼne?

•  Xnaqʼtzanx tibʼa tuʼn tok t-xqʼuqina taqʼa

•  Aju in tzaj kyqʼamaʼn junjuntl kuʼxun

 Tuʼnju aj il qoʼ. In tzaj tqʼamaʼn Tyol Dios jlu: «Porke qkyaqil nimku maj in qo tzpet tiʼj; qatzun at jun mintiʼ in tzpet tiʼj tyol, atzun xjalju tzʼaqlxix» (Santiago 3:2). Tuʼnju aj il qoʼ, nya oʼkx in qo el txalpaj tiʼj qbʼe sino ax ikx tiʼj qyol in xi qqʼamaʼn.

 «Tuʼnju nya tzʼaqli nnabʼile ex waqʼe, mlayx txi nqʼamaʼne qa tkyaqil in xi nqʼamaʼne toj tumel» (Anna).

 Aj qyolin nim. In tzaj tqʼamaʼn Tyol Dios jlu: «Aju xjal in yolin tiʼj nim yol, jaku tzpet tiʼj» (Proverbios 10:19). Aqeju xjal in che yolin tiʼj nim yol, mintiʼxix in nok kyqʼoʼn kywiʼ kyiʼj txqantl ex mas jaku tzʼok kybʼinchaʼn nya bʼaʼn kyiʼj tuʼn kyyol.

 «Aqeju xjal mas at kynabʼil, nya aqeju in che yolin tkyaqil maj. Ok Jesús te xjal mas at tnabʼil tzalu twitz Txʼotxʼ, pero at maj mintiʼ yolin» (Julia).

 Qe yaqbʼil nya toj tumel. In tzaj tqʼamaʼn Tyol Dios jlu: «At xjal in kʼixbʼisan tiʼj juntl kyuʼn qe tyol» (Proverbios 12:18). Aj t-xi qqʼamaʼn jun qyol ex mintiʼ in qo ximen tiʼj, ex aj kyajbʼen yol tuʼn tkux choʼn toj kyanmi txqantl quʼn, in nok jlu te jun yaqbʼil nya toj tumel. Aqeju xjal in che yaqin nya toj tumel, jakulo kubʼ kyximen qa noq in che yaqin, noqtzun tuʼnj, nya tzebʼajil aj tel qiʼn kyoklen txqantl. In tzaj tqʼamaʼn Tyol Dios tuʼn t-xi qbʼinchaʼn jlu: «Miʼn che yasune, miʼn che ximane mya bʼaʼn tiʼj juntl» (Efesios 4:31).

 «Chʼixme tkyaqil maj in xi nqʼamaʼne alkyexku tiʼ noq tuʼn kytzeʼn txqantl, noqtzun tuʼnj, at maj in xi nqʼamaʼne jun yaqbʼil nya toj tumel ex in tzaj nya bʼaʼn wiʼje tuʼn» (Oksana).

 At maj kwest tuʼn t-xi qxnaqʼtzan qibʼ tuʼn tok qxqʼuqin qaqʼ, pero ja che onin nabʼil ateʼ toj Tyol Dios qiʼj. Jun techel, ximana kyiʼj jlu:

 «Che ximane tiʼj jlu tuj kyanmiye [...] ex miʼn che qʼajte» (Salmo 4:4).

 At maj mas tbʼanel qa mintiʼ ma txi qqʼamaʼn jun tiʼ. In tzaj tqʼamaʼn jun txin jlu, aju Laura tbʼi: «Aju in kubʼ nximane aj in tzaj nqʼoje, nyalo axju jaku kubʼ nximane yajxitl». Ex tqʼamatl jlu: «Aj tel nqʼoje, in chin tzalaje tuʼnju mintiʼ otoq txi nqʼamaʼne aju otoq kubʼ nximane». Qa ma ximana tiʼjju taja tuʼn t-xi tqʼamaʼna, jaku tzʼonin tiʼja tuʼn miʼn t-xi tqʼamaʼna jun tiʼ nya toj tumel.

 «Ntbʼiʼn ẍkyinbʼaj tuʼmeʼljuʼ yol, ikxjuʼ kseʼn qaqʼ ntnaʼn tkʼokʼjal» (Job 12:11, XT).

 Qa ma ximana kyiʼj xjel ateʼ kubʼni, nim kʼonil tiʼja tuʼn t-ximana tiʼjju kxel tqʼamaʼna.

•   «¿Axpe tok? ¿Tbʼanelpe nyole? ¿Ilpe tiʼj?» (Romanos 14:19).

•   «¿Tiʼ jaku kubʼ nnaʼne noqwit weye saj qʼamaʼn jlu?» (Mateo 7:12).

•   «¿In kubʼpe nyekʼine qa in nok nqʼoʼne toklen kyyol txqantl?» (Romanos 12:10).

•   «¿Ape ambʼil lu mas tbʼanel tuʼn t-xi nqʼamaʼne jun tiʼ?» (Eclesiastés 3:7).

 «Teyle junjun bʼaʼn tuʼn t-ximan kyiʼj txqantl okslal qa at mas kyoklen twitz» (Filipenses 2:3).

 Kʼonil nabʼil lu tiʼja tuʼn tten tbʼanel t-ximbʼetza kyiʼj txqantl ex tuʼn tok t-xqʼuqina taqʼa, ex tuʼn t-ximana tiʼjju kxel tqʼamaʼna. Axpe ikx qa ya otoq t-xi tqʼamaʼna jun tiʼ nya toj tumel, kʼonil tiʼja tuʼn t-xi tqanina najsam kye txqantl qa ma kubʼ tin tibʼa (Mateo 5:23, 24). Tibʼajxi jlu, xnaqʼtzanx tibʼa tuʼn tok t-xqʼuqina taqʼa.