KYXJEL KUʼXUN
¿Tiquʼn nya kyaj nmane tuʼn ntzalaje?
Ma tzaj kyqʼamaʼn tamiwa tuʼn t-xiʼya kyukʼil toj jun fiesta. Pero tej t-xi tqanina permis kye tmana, tzaj kytzaqʼweʼn kyjaʼ: «¡Miʼn!». Tkyaqil maj axju tzaqʼwebʼil tzul kyqʼoʼn teya.
Toj xnaqʼtzbʼil lu, qo yolil tiʼj jlu:
¿Tiquʼn mintiʼ in tzaj kyqʼoʼn nmane npermise?
In kubʼlo t-ximana qa nya kyaj tmana tuʼn ttzalaja tuʼnju chʼixme tkyaqil maj mintiʼ in tzaj kyqʼoʼn permis teya.
Ax t-ximbʼetz jun txin, Marie tbʼi, tej t-xi tzyet tuʼn tten tteléfono. Chi kyjalu: «Tzaj tqʼoʼn ntate nim kawbʼil weʼye. Ik tzeʼn alkyeqe aplicación jaku che kutz wiʼne, alqukʼil tuʼn nyoline axpe ikx toj alkye or jaku tzʼajbʼen teléfono wuʼne... Atzun kye qe wamiwe, ¡in tzaj qʼoʼn ambʼil kye tuʼn tbʼant alkyexku kyuʼn!».
Ximana tiʼj jlu: ¿Axpe tok nya taj tman Marie tuʼn ttzalaj, moqa in ximen tiʼjju nya bʼaʼn jaku tzaj tiʼj tkʼwal?
In tzaj yekʼin toj carretera jun límite te velocidad tuʼntzun miʼn ttzaj nya bʼaʼn tiʼja. Iktzun tten qe kawbʼil in che kubʼ kyqʼoʼn tmana tibʼaja.
Bʼinchanxa jlu: Ximana qa aya in noka te mambʼaj moqa txubʼaj ex at jun tkʼwala tzma ma tzʼetz tteléfono. ¿Tiʼ teya t-xim? ¿Alkyeqe nya bʼaʼn jaku tzaj tiʼj tkʼwala qa mintiʼ sok t-xqʼuqin tibʼ aj tajbʼen teléfono tuʼn? ¿Alkyeqe kawbʼil kxel tqʼoʼna te? ¿Tiʼwtle jaku txi ttzaqʼweʼne qa ma tzaj tqʼamaʼn teya qa nya taja tuʼn ttzalaj?
Chi Tanya jlu: «Kukx tzaj tqʼamaʼn nmane weye: ‹Noqwit aya, ¿tzeʼnwtlo jaku tzʼela toj twitza?›. Tuʼnju yol lu, nya oʼkx in ximane kyiʼj kawbʼil kubʼ tqʼoʼn wibʼaje, sino el nnikʼe tiʼj tiquʼn in tzaj tqʼoʼn kawbʼil weye. Noqwit at wale, jakulo txi nqanine axju in tzaj tqanin nmane weʼye».
¿Tiʼ tuʼn tbʼant wuʼne tuʼn ttzaj kyqʼoʼn nmane npermise?
Chi Richard jlu: «Noqx gan qa ma jaw ẍchʼina kyiʼj tmana, ksiktela tuʼn jlu ex ax ik qe tmana che siktel tiʼja. Qa noq in yasina, kbʼel tyekʼina qa naʼmx tok tnabʼla ex mlayx tzaj kyqʼoʼn tmana tpermisa».
Chi Ivy jlu: «At jun tiquʼn in kubʼ kyqʼoʼn ntate qe kawbʼil wibʼaje. Nya a t-xilen jlu qa nya kyaj tuʼn ntzalaje, kyaj tuʼn ntzalaje pero toj jun tbʼanel tten ex tuʼn miʼn tokx nqʼoʼn wibʼe toj problem».
Texto nim toklen: «Aju xjal mintiʼ tnabʼl in xi ttzoqpin tibʼ tuʼn tqʼojin, atzunju xjal at tnabʼl in tjakʼunte tibʼ tuʼn miʼn tqʼojin» (Proverbios 29:11).
Chi Marie jlu: «Ok tilil wuʼne tuʼn wikʼe tibʼajju kawbʼil kubʼ tqʼoʼn nmane tiʼjju tzeʼn tuʼn tajbʼen nteléfoniye. Xi njyone tumel tuʼn t-xi ntzʼibʼine kye wamiwe toj qonikʼen wen ex tuʼn tkuʼtz ndescargarine qe aplicación aju otoq tzaj tqʼamaʼn nmane tuʼn miʼn tkuʼtz wiʼne. Pero kukx el tnikʼ ntate tiʼjju in bʼanttoq wuʼne, mas kawbʼil tzaj tqʼoʼn weʼye ex mintiʼtl ok qeʼ tkʼuʼj wiʼje. Nya bʼaʼn qa ma kubʼ tbʼinchaʼna jun tiʼ toj ewaj».
Chi Melinda jlu: «Tenx tpasense. Jakulo xi tiʼn ambʼil tuʼn ttzaj tqʼoʼn ttata tpermisa. Pero qa ma txi tnimana aju in tzaj kyqʼamaʼn teya, chebʼe chebʼe kxel kyqʼoʼn tpermisa».
Texto nim toklen: «Aqeye kʼwaʼlbʼaj, kynimanx kymane tuj tkyaqil, porke in tzalaj Qajaw tiʼj jlu» (Colosenses 3:20).
Chi Natalie jlu: «Mlay tzaj kyqʼoʼn ttata aju taja, qa noq in xi tqanina jun ex juntl maj, qa ma bʼant ikju tuʼna, mas in xi nya bʼaʼn toj il».
Chi Joshep jlu: «Kyaj tatbʼaj tuʼn tok kynabʼil kykʼwal. Tuʼntzunju, aj nyoline kyukʼil ntate kyiʼj qe kawbʼil in kubʼ kyqʼoʼn, mas in chin yoline tiʼjju tiquʼn tbʼanel moqa nya tbʼanel jun tiʼ ex nya noq tiʼjju in kubʼ nnaʼne. Mas tbʼanel in nela tkyaqil qa ikju in bʼant wuʼne».
Texto nim toklen: «Kynimanxe kymane ex kytxuʼye» (Efesios 6:2).
Bʼalo ax ikx tgana jlu
PIZARRÓN AT TILBʼILAL TWITZ
¿Tiʼ jaku bʼant wuʼne tuʼn ttzaj qʼoʼn mas ambʼil weye?
Tajlo teya tuʼn tok qʼoʼna te jun xjal ma chʼiy, pero bʼalo nya ik kyximbʼetz tmana tiʼja. ¿Tiʼ jaku bʼant tuʼna tuʼn tok qeʼ kykʼuʼj tiʼja?
KYXJEL KUʼXUN
¿Tiʼ jaku bʼant wuʼne tuʼn tok qeʼxix kykʼuʼj ntate wiʼje?
Toj xnaqʼtzbʼil lu kkanetel oxe onbʼil tuʼna aʼyeju che onil tiʼja tuʼn tok qeʼxix kykʼuʼj ttata tiʼja.
