•  Aju tuʼn tok tojtzqiʼna

•  Aju jaku bʼant tuʼna

•  Aju in tzaj kyqʼamaʼn junjuntl kuʼxun

 Jaku tzʼok qeʼ kykʼuʼj ttata tiʼja qa ma kubʼ tyekʼina qa jaku tzʼok qeʼ kyʼuʼj tiʼja. Qa ma txi tbʼiʼna qe kawbʼil in tzaj kyqʼoʼn ttata teya ik tten jlu ik tzeʼn tuʼn t-xi chjet jun kʼas. At jun tkʼasa kye ex qa ma txi tchjoʼna «tkʼasa» tojxix ambʼil bʼantni tiʼj, jaku tzaj qʼoʼn mas «tchʼexa» kyuʼn, toj juntl yol, tzul kyqʼoʼn mas tzaqpibʼil teya. Qatzun mintiʼ ma chjet «tkʼasa», miʼn jaw labʼina tiʼj qa nya nimtl «tchʼexa» saj qʼoʼn kyuʼn ttata.

 In xi tiʼn ambʼil tuʼn tok qeʼ kykʼuʼj txqantl qiʼj. Naʼmxtoq ttzaj kyqʼoʼn ttata mas tzaqpibʼil teya, il tiʼj tuʼn t-xi tyekʼina kye tukʼil tbʼinchbʼena qa jaku bʼant junjun tiʼ tuʼna.

 AJU AX TOK O BʼAJ: «Tej tzmatoq kʼwaʼlx qine, ojtzqiʼnxixtoq wuʼne tiʼ kyajbʼiltoq ntate tuʼn tbʼant wuʼne. Tuʼntzunju, in kubʼtoq nyekʼine qa in kubʼ nbʼinchaʼne aju in tzaj kyqʼamaʼn weye, pero toj ewaj in kubʼtoq nbʼinchaʼne aju wajbʼile. Ex tuʼn jlu mintiʼtl ok qeʼ kykʼuʼj ntate wiʼje. El naj nnikʼe tiʼj qa mlay bʼant jun tiʼ tuʼna toj ewaj tuʼn ttzaj qʼoʼn mas tzaqpibʼil teya. Tuʼn tok qeʼ kykʼuʼj tiʼja, il tiʼj tuʼn tkubʼ tyekʼina» (Craig).

 Qʼamanxa axix tok, inchq kwest. Qkyaqilx in qo el txalpaj, noqtzun tuʼnj, qa mintiʼ ma txi tqʼamaʼna junjun tiʼ o bʼant tuʼna noq tuʼn miʼn tel nikʼbʼaj tiʼj, ya mlay tzʼok qeʼ kykʼuʼj ttata tiʼja. Qatzun tkyaqil maj in xi tqʼamaʼna axix tok, ok kʼelel kynikʼ ttata tiʼja qa ma tzʼok tnabʼila tuʼn t-xi tqʼamaʼna qe tila aj tel txalpaja. Aʼyetzun xjal jlu jaku tzʼok qeʼ qkʼuʼj kyiʼj.

 «Nya toj tkyaqil ambʼil aj tel txalpaja ya miʼn tzʼok qʼuqeʼtl kykʼuʼj txqantl tiʼja, noqtzun tuʼnj, ya mlay tzʼok qeʼ kykʼuʼj tiʼja qa ma kubʼ tewina» (Anna).

 In tzaj tqʼamaʼn Tyol Dios jlu: «Qajbʼile tuʼn qbʼinchanteye aju bʼaʼn tuj tkyaqil» (Hebreos 13:18).

•   Ximana tiʼj jlu: Aj ttzaj kyqanin ttata teya jatumel ma txiʼya ex tiʼ kbʼantel tuʼna, ¿in xi tqʼamaʼna axix tok kye? Moqa aj ttzaj kyqanin teya jatumel xtena ex tiʼ xbʼant tuʼna, ¿in kubʼpe tewina junjun tiʼ aju kyajbʼil tuʼn tel kynikʼ tiʼj?

 Bʼinchama aju in tzaj qʼamaʼn teya. Bʼinxa tkyaqil kykawbʼil ttata. Bʼinchama naj qe aqʼuntl toj tjaya. Miʼn tzikʼa tibʼaj ambʼil bʼantni tiʼj. Bʼinchama qe taqʼuna toj tja xnaqʼtzbʼil. Miʼn meltzʼaja mas yaj tjaya twitzju or tuʼn tpona.

 «Qa ma txi kyqʼoʼn ttata ambʼil teya tuʼn texa kyukʼil tamiwa ex qa ma txi qʼamaʼn teya tuʼn tmeltzʼaja a las 9 te qonikʼen, miʼn meltzʼaja a las 10 y media ex tuʼn tayona tuʼn t-xi qʼoʼn ambʼil teya tuʼn texa toj juntl qʼij» (Ryan).

 In tzaj tqʼamaʼn Tyol Dios jlu: «Teyle junjun tuʼn t-xi tiqan tex tiqatz» (Gálatas 6:5).

•   Ximana tiʼj jlu: ¿Tiʼ kyximbʼetz txqantl at tiʼjju tuʼn tpona toj ambʼil bʼantni tiʼj, tuʼn kykubʼ tbʼinchaʼna qe aqʼuntl toj tjaya ex tuʼn kyxi tbʼiʼna kawbʼil, axpe ikx qeju nya bʼaʼn in che ela toj twitza?

 Ten tpasensa. Qa ya mintiʼ in nok qeʼ kykʼuʼj ttata tiʼja, kxel tiʼn ambʼil tuʼn tok qeʼ juntl maj kykʼuʼj tiʼja. Il tiʼj tuʼn tten tpasensa tuʼn tkubʼ tayona.

 Tzaj nqʼoje tuʼnju mintiʼ tzaj kyqʼoʼn ntate mas woklene akux in chin chʼiye. Mintiʼ el nnikʼe tiʼj qa aju tuʼn qchʼiy nya junx taʼ tukʼilju tuʼn tok qnabʼil. Xi nqʼamaʼne kye ntate tuʼn ttzaj kyqʼoʼn ambʼil weye tuʼn t-xi nyekʼine qa jaku tzʼok qeʼ kykʼuʼj wiʼje. Xi tiʼn chʼin ambʼil, noqtzun tuʼnj bʼant jlu. Ex el nnikʼe tiʼj qa tuʼn tok qeʼ kykʼuʼj txqantl qiʼj mintiʼ toklen jlu tukʼilju jteʼ qabʼqʼi, sino tiʼjju in bʼant quʼn» (Rachel).

 In tzaj tqʼamaʼn Tyol Dios jlu: «Tzikʼwit kywitze kyiʼjxe» (2 Corintios 13:5).

•   Ximana tiʼj jlu: Qa taja tuʼn tok qeʼ juntl maj kykʼuʼj ttata tiʼja, ¿tzeʼn jaku kubʼ tyekʼina alkye teya?

 NABʼIL: Bʼinchama jun tiʼ, qa aju tuʼn tpona lwey, tuʼn kybʼant taqʼuna toj ja, tuʼn tmeltzʼaja ja toj or o txi qʼamaʼn teya moqa alkyexku juntl tiʼ. Qʼamanxa kye ttata aju otoq kubʼ t-ximana ex qaninxa kye tiʼ kyajbʼil tuʼn tbʼant tuʼna tuʼn tok qeʼ kykʼuʼj tiʼja. Ex tzʼok tilil tuʼna tuʼn t-xi tbʼiʼna nabʼil lu toj Tyol Dios: «Kykotpiʼmele kyiʼje aju ojtxi kytene, ex kyqʼonkje aju ojtxi kychwinqlale» (Efesios 4:22). Aj tbʼet ambʼil, kʼokel kyqʼoʼn ttata kywitz tiʼjju in bʼant tuʼna.