In tzaj tqʼamaʼn Centros para el Control y la Prevención de Enfermedades, te Estados Unidos, qa xi qanin junjun xjel kye kuʼxun te 15 ex 19 abʼqʼi ex chʼixme kykyaqil kyqʼama qa o tzʼokx kyqʼoʼn ttzʼalbʼil juntl xjal toj kytziʼ (moqa sexo oral). Kubʼ ttzʼibʼin Sharlene Azam, aju uʼj tok tbʼi Oral Sex Is the New Goodnight Kiss (Sexo oral: el nuevo beso de buenas noches), ex tqʼama jlu: «Qa ma yolina tukʼil alkyexku kuʼxun tiʼj sexo oral, in tzaj kyqʼamaʼn qa normal in nela jlu toj kywitz». Ex in tzaj tqʼamaʼntl uʼj lu: «In kubʼ kyximen kuʼxun qa mintiʼ in che kubʼ ten tukʼil juntl xjal aj tokx kyqʼoʼn kytzʼalbʼil toj ttziʼ juntl».

•  ¿Tiʼ teya t-ximbʼetz tiʼj jlu?

•  ¿Alkye axix tok?

•  ¿Nimpe toklen jlu?

 Tzaqʼwenxa qe xjel lu:

1.   ¿Jakupe tzʼok ten tal jun txin qa ma tzʼokx tqʼoʼn ttzʼalbʼil jun xjal toj ttziʼ?

   1.   Jaku

   2.   Mlay

2.   ¿Jakupe tzaj yabʼil tiʼj jun xjal qa ma tzʼokx tqʼoʼn ttzʼalbʼil juntl xjal toj ttziʼ?

   1.   Jaku

   2.   Mlay

3.   ¿In kubʼpe ten jun xjal tukʼil juntl aj tokx tqʼoʼn ttzʼalbʼil toj ttziʼ juntl?

   1.   In kubʼ ten

   2.   Mintiʼ in kubʼ ten

 Mojbʼankuya ttzaqʼwebʼila kyukʼil tzaqʼwebʼil ateʼ kubʼni.

1.   ¿Jakupe tzʼok ten tal jun txin qa ma tzʼokx tqʼoʼn ttzʼalbʼil jun xjal toj ttziʼ?

    Tzaqʼwebʼil. Mlay. Tuʼn jlu in kubʼ kyximen nim kuʼxun qa bʼaʼn aju sexo oral ex qa mlay tzaj jun nya bʼaʼn kyiʼj tuʼn.

2.   ¿Jakupe tzaj yabʼil tiʼj jun xjal tuʼn sexo oral?

    Tzaqʼwebʼil: Jaku. Aj tokx tqʼoʼn jun xjal ttzʼalbʼil toj ttziʼ juntl jaku tzaj hepatitis A moqa B tiʼj, verrugas genitales, gonorrea, herpes, sida moqa sífilis.

3.   ¿In kubʼpe ten jun xjal tukʼil juntl aj tokx tqʼoʼn ttzʼalbʼil toj ttziʼ juntl?

    Tzaqʼwebʼil: In kubʼ ten. Tkyaqilju in bʼant kyuʼn kabʼe xjal tukʼil kytzʼalbʼil in nok jlu te sexo. Kyxol jlu at aju tuʼn kykubʼ kuẍeʼ kabʼe xjal, tuʼn tokx tqʼoʼn ttzʼalbʼil jun xjal toj ttziʼ juntl moqa toj t-ẍop juntl, ex aj tok tmakoʼn jun xjal ttzʼalbʼil juntl.

 Qqʼonk qwitz tiʼjju in tzaj tqʼamaʼn Tyol Dios tiʼj sexo oral.

 In tzaj tqʼamaʼn Biblia jlu: «Tajbʼil Dios [...] tuʼn miʼn kybʼinchanteye aj pajil» (1 Tesalonicenses 4:3).

 Aju yaẍbʼil moqa kyʼaʼjil, atz in yolin kyiʼj kabʼe xjal in che kubʼ kuẍeʼ ex naʼmx kycasarin, toj juntl yol, atz in yolin tiʼj aj tokx tqʼoʼn ttzʼalbʼil jun xjal toj ttziʼ juntl moqa toj t-ẍop juntl, ex aj tok tmakoʼn jun xjal ttzʼalbʼil juntl. Aʼyeju xjal in kubʼ kybʼinchaʼn jlu tzul nim nya bʼaʼn kyiʼj ex jaku naj kyamiwbʼil tukʼil Dios tuʼn jlu (1 Pedro 3:12).

 In tzaj tqʼamaʼn Biblia jlu: «Alkyeju in bʼinchan aj pajil, in bʼinchan il tiʼjx t-ximlal» (1 Corintios 6:18).

 Jaku tzaj yabʼil tiʼj jun xjal aj tokx tqʼoʼn ttzʼalbʼil toj ttziʼ juntl ex jaku naj tamiwbʼil tukʼil Dios. Ax ikx jaku tzaj tbʼis tuʼn jlu. In tzaj tqʼamaʼn libro Cómo hablar de sexo con los adolescentes para que te escuchen jlu: «Nya oʼkx aj tkubʼ kuẍe jun xjal tukʼil juntl in kubʼ tnaʼn qa mintiʼ tajbʼen, qa tjunalx at ex qa o bʼaj yajin. Tuʼntzunju, nya oʼkx kxel qʼamet jlu kye kuʼxun, sino ax ikx qa jaku kubʼ kynaʼn nya bʼaʼn qa ma kubʼ kybʼinchaʼn alkyexku tten sexo ex qa nya toj tumel. Aj tkubʼ tena tukʼil jun xjal, ya mlay chʼexpaj jlu».

 In tzaj tqʼamaʼn Biblia jlu: «Aqine Dios aju Kymane, aqine chin xel xnaqʼtzante ju bʼaʼn tuʼn tajbʼen te kyeye» (Isaías 48:17).

 ¿Tiʼ teya t-ximbʼetz at tiʼj? ¿Jakupe tzaj tbʼanel teya kyuʼn ley in kubʼ tqʼoʼn Dios tiʼj sexo? ¿Moqa in kubʼ t-ximana qa in nel kyiʼn tzaqpibʼil teya? Ximana tiʼj jun bʼe jatumel in che bʼet nim kar ex jatumel ateʼ señal toj aʼyeju in tzaj kyqʼamaʼn jteʼ tvelocidad jun kar tuʼn t-xi tiʼn ex jatumel tuʼn tweʼ. ¿In che oninpe señal lu tiʼja moqa jaku tzaj kyiʼn nya bʼaʼn tiʼja? ¿Tiʼ jaku bʼaj tiʼja ex kyiʼj txqantl xjal qa mintiʼ ma tzʼok tqʼoʼna toklen qe señal lu?

 Ax jlu jaku bʼaj qa mintiʼ ma tzʼok tqʼoʼna kyoklen tley Dios. Qa mintiʼ ma chex tbʼiʼna, jaku tzaj nya bʼaʼn tiʼja (Gálatas 6:7). In tzaj tqʼamaʼn libro Sex Smart (Sexo inteligente) jlu: «Qa ojtzqiʼn tuʼna qa nya bʼaʼn jun tiʼ, pero in kubʼ tbʼinchaʼna, ya mlay tzʼonin jlu tiʼja tuʼn tok tqʼoʼna toklen aju nimen tuʼna ex tuʼn tok t-respetarin tibʼa». Noqtzun tuʼnj, qa ma che japun tley Dios tuʼna, kbʼel tyekʼina qa in nok tqʼoʼna toklen aju nimen tuʼna ex kbʼel tnaʼna bʼaʼn (1 Pedro 3:16).