Ope tzʼok tojtzqiʼna jun qʼa moqa jun txin aju tganeye? Ex kyaje tuʼn tok kyojtzqiʼn kyibʼe tuʼntzun kykubʼ mojeʼye. ¿Tiʼtzun il tiʼj tuʼn tbʼant kyuʼne akux in che yoline?

Kʼelel qnikʼ tiʼj toj xnaqʼtzbʼil lu:

•  Tbʼanel tuʼn t-xi kyqʼamaʼne aju axix tok kyximbʼetze

•  Bʼaʼn tuʼn tel tnikʼa tiʼj qa junxitl kyximbʼetze jaku ten tiʼj jun tiʼ

•  Jaku tzaj bʼaj kykʼuʼje akux in che yoline

 Aj tok kyojtzqiʼn kyibʼe, kʼelel tnikʼ jun tiʼj juntl aj tikʼ ambʼil. Oklo kʼelel tnikʼa kyiʼj junjun tmod qʼa moqa txin aj kyok weʼye twitz junjun tiʼchaq.

 Atlo junjun tmod qʼa moqa txin jakux tzikʼx, pero atlo junjuntl il tiʼj tuʼn kyyoline tiʼj. Akux in che yoline tiʼj, qʼonka tilil tuʼn tten t-ximbʼetza toj tumel ex nya oʼkx tuʼn t-ximana tiʼjju in kubʼ tnaʼna.

 Qe tiʼchaq il tiʼj tuʼn kyyoline tiʼj:

•   Aju pwaq moqa medi. ¿Atpe tkʼasa? ¿Jun ratpe in kubʼ tgastarina tpwaqa? Yajtzun qa ma che kubʼ mojeʼye, ¿jatumel kʼokel kyqʼoʼne pwaq moqa alkye tten kʼajbʼel kyuʼne?

•   Qa at jun yabʼil. ¿At jun yabʼil tiʼja moqa mintiʼ? ¿O tzaj jun yabʼil grave tiʼja toj ambʼil ojtxe?

•   Aju kyaje tuʼn tbʼant. ¿Tiʼ taja tuʼn tbʼant tuʼna toj tanqʼibʼila? ¿Junxpe taʼ t-ximbʼetza tiʼj jlu tukʼil qʼa moqa txin aju taja tuʼn kubʼ mojeʼya tukʼil? Kykubʼlenxi mojeʼye ¿Kukxpe che tzalajele qa mintiʼ xjapun twi kyximbʼetze?

•   Qe toj tjaya. ¿In nxqʼuqʼina tiʼj jun toj tjaya toj ambʼil jaʼlo? ¿Taja tuʼn t-xqʼuqina tiʼj jun toj tjaya toj ambʼil tzul?¿Tajbʼila tuʼn kyul tkʼwala moqa tala? Qa ikju ¿jteʼ?

 Aj kyyoline kyiʼj junjun tiʼchaq ik tzeʼn jlu, qʼamanxa aju axix tok, miʼn kubʼ tewena jun tiʼ ex miʼn tzʼok tilil tuʼna tuʼn tok jun nya bʼaʼn te bʼaʼn (Hebreos 13:18).

 Ximana tiʼj jlu: ¿Tiʼ taja tuʼn tok tbʼiʼna tiʼj qʼa moqa tiʼj txin in yolina tukʼil? ¿Tiʼ il tiʼj tuʼn tok tbʼiʼn qʼa moqa txin tiʼja? Qa ma txi tqʼamaʼna aju axix tok aj kyyoline jaʼlo, ¿tzeʼn jaku tzʼonin jlu kyiʼje otoqxi che kubʼ mojeʼye?

 Texto nim toklen: «Che yoline axix tok kyukʼil txqantl» (Efesios 4:25).

 «Jaku kubʼ t-ximen txin lu: ‹Tojlo 6 xjaw kjel bʼant tiʼj tuʼn qkubʼ mojeʼye›, pero atzunte qʼa in kubʼ t-ximen qa tojxilo jun abʼqʼi. Jakulo tzaj tbʼis txin tuʼn jlu tuʼnju tajwitlo tuʼn tkubʼ mojeʼ naj. Tuʼntzunju nim toklen tuʼn kyyolin ex tuʼn tel tnikʼ jun tiʼj juntl alkye kyximbʼetz» (chi Ariana, o tzikʼ jun abʼqʼi tkubʼlen mojeʼ).

 Mlay ten kyximbʼetz kabʼe xjal junx. Miʼn kubʼ t-ximane qa junx kyximbʼetze ktel ex qa axju kbʼel kynaʼne, tuʼnju junxitl tten ẍe jaw chʼiysaʼne moqa tuʼnju junxitl kytname.

 Ximana tiʼj jlu: Qa nya junx sela kyximbʼetze kyiʼj junjun tiʼchaq nya nim kyoklen ex qa mintiʼ in che ikʼe kyibʼaj nabʼil tkuʼx toj Tyol Dios, ¿okpe kxel tqʼoʼna ambʼil te juntl tuʼn t-xi bʼinchet aju taj tuʼn tten mujbʼabʼil kyxole?

 Texto nim toklen: «Tz’elxwit nik’b’aj kyi’je kyu’n kykyaqil xjal qa mejor kymodiye» (Filipenses 4:5).

 «Maske jaku kubʼ kyximane qa junx kyximbʼetze ktel tiʼj tkyaqil tiʼchaq, pero atlo maj mlay bʼaj jlu. Tbʼanel qa junx qximbʼetz at tiʼj jun tiʼ, pero mas tbʼanel qa ma che kubʼ qyekʼin tbʼanel qmod aj kytzaj junjun nya bʼaʼn qxol (chi Matthew, o tzikʼ jweʼ abʼqʼi tkubʼlen mojeʼ).

 Aj txi tzyet tuʼn tyolina tukʼil jun qʼa moqa tukʼil jun txin jaku tzeʼl tiʼn nim ambʼil tiʼja ex tuʼn jlu jakulo tzaj bʼaj tkʼuʼja. ¿Tiʼ jaku tzʼonin tiʼja?

 Bʼaʼn tuʼn t-xi tqʼamaʼna jniʼ ambʼil at tiʼja ex miʼn tzʼok tqʼoʼn twiʼya oʼkx tiʼj tnovioya moqa tnoviaya. Qa miʼn, jaku ya mlay che bʼant junjuntl tiʼchaq nim toklen tuʼna ex ya miʼn tentl ambʼil tiʼja tuʼn ttena kyukʼil tamiwa. O tzikʼ jweʼ abʼqʼi tkubʼlen mojeʼ Alana ex in tzaj tqʼamaʼn jlu: «Kukx at kyajbʼen tamiwa maske otoq kubʼ mojeʼya, ex ax ikx kye, kukx at tajbʼena kye. Tuʼntzunju, miʼn tzʼel tiʼna kyoklen jaʼlo noq tuʼnju in nexa tukʼil jun qʼa moqa tukʼil jun txin».

 Naʼntza qa aj tkubʼ mojeʼya, kukx kʼelel tpaʼna ambʼil tuʼn tbʼant tkyaqil tiʼchaq toj tanqʼibʼila. Tuʼntzunju qʼonka tilil tuʼn tbʼant jlu tuʼna jaʼlo akux tzma in che yoline.

 Ximana tiʼj jlu: ¿Tajpe teya tuʼn tel tpaʼn qʼa moqa txin mas ambʼil teya twitzju jaku bʼant tuʼn? ¿In kubʼpe t-ximana qa taj qʼa moqa txin tuʼn ttena toj tkyaqil ambʼil tukʼil? ¿Tiʼ jaku bʼant kyuʼne tuʼn tten kyxime toj tumel tiʼj jlu tuʼntzun miʼn kysikte?

 Texto nim toklen: «Tkyaqil bʼanimaj tqʼijlalil tzalu twitz txʼotxʼ» (Eclesiastés 3:1).

 «Qa oʼkx in che ex qeju kynovio kyibʼ tuʼn kytzalaj jun rat, noq che jawil xobʼ ex mlay tzʼel kynikʼ tiʼj tiʼ kbʼantel kyuʼn aj kykubʼ mojeʼ. Tuʼntzunju, tbʼanel tuʼn tbʼant junjuntl tiʼchaq kyuʼn ik tzeʼn tuʼn kyxiʼ loqʼel, tuʼn tbʼant junjun tiʼchaq toj ja ex tuʼn kyex pakbʼal. Kʼonil jlu kyiʼj tuʼn kyaqʼunan junx ex tuʼn tten jun tbʼanel kymejebʼleʼn» (chi Daniel, o tzikʼ kabʼe abʼqʼi tkubʼlen mojeʼ).

 Naʼntza qa aj t-xi tzyet tuʼn tyolin jun qʼa tukʼil jun txin, noq jun ambʼil jlu tuʼn tok kyojtzqin kyibʼ tuʼntzun tkubʼ kyximen qa che kbʼel mojeʼ moqa miʼn. Aju toxin plaj te xnaqʼtzbʼil lu, kyolil tiʼj alkyeqe tiʼchaq bʼaʼn tuʼn t-ximana tiʼj aj tkubʼ t-ximana qa kbʼel mojeʼya moqa miʼn.