¿In tzajpe xobʼa tuʼn t-xi tqʼamaʼna te Jehová tuʼn tajbʼena te ex tuʼn tbautisarina? Qa ikju, kʼonil xnaqʼtzbʼil lu tiʼja tuʼn tel xobʼil tiʼja.

Toj xnaqʼtzbʼil lu, kʼelel qnikʼ tiʼj jlu:

•  ¿Yajtzun qa ma kubʼ nbʼinchaʼne jun matij il otoqxi chin bautisarine?

•  ¿Tiʼ jaku bʼant wuʼne qa in chin tzaj xobʼe tuʼn ttzaj qʼoʼn mas woklene otoqxi chin bautisarine?

•  ¿Yajtzun qa in kubʼ nximane qa mintiʼ woklene tuʼn wajbʼene te Jehová?

•  Aju in tzaj kyqʼamaʼn junjuntl kuʼxun

 ¿Tiquʼn in tzaj xobʼa? In tzajlo xobʼa tuʼnju o tzʼex expulsarin jun xjal toj congregación tuʼnju o kubʼ tbʼinchaʼn jun nya bʼaʼn ex nya taja tuʼn tbʼaj jlu tiʼja (1 Corintios 5:11-13).

 «Tej naʼmxtoq nbautisarine, in tzaj xobʼe tej nximane tiʼj qa jakutoq kubʼ nbʼinchaʼne jun il. Oʼkx in ximane tiʼj kychʼixwi nmane jakutoq kubʼ nqʼoʼne» (Rebekah).

 Texto nim toklen: «Aju xjal bʼinchal il, bʼaʼn tuʼn tkyaj tkolin ju tbʼe mya bʼaʼn [...]; e tajtz meltzʼaj tukʼil Qdios, porke ate Dios at nim xtalbʼil tukʼil tuʼn tkubʼ tnajsaʼn kyil xjal» (Isaías 55:7).

 Ximana tiʼj jlu: Ax tok, in che ex expulsarin qeju in kubʼ kybʼinchaʼn jun matij il ex mintiʼ in najtz tiʼj kyanmi. Pero in kubʼ tyekʼin Jehová qʼaqʼbʼil tkʼuʼj kyiʼj qeju in kubʼ kyin kyibʼ, in najtz tiʼj kyanmi ex in xi kybʼiʼn kawbʼil in xi qʼoʼn kye (Salmo 103:13, 14; 2 Corintios 7:11).

 Maske aj il qoʼ, tuʼn tonbʼil Jehová jaku tzʼexa twitz alkyexku nya bʼaʼn (1 Corintios 10:13). Bʼaʼn tuʼn ttzaj tnaʼna qa a teya jaku kubʼ ximante tiʼ tuʼn tkubʼ tbʼinchaʼna ex nya qe txqantl.

 «In tzaj xobʼe tuʼn nbautisarine ex tuʼn tkubʼ nbʼinchaʼne jun matij il yajxitl. Pero mastoq nya bʼaʼn qa mintiʼtoq ma chin bautisarine. Mlay txi nqʼoʼne ambʼil tuʼn miʼn tkubʼ nbʼinchaʼne jun tiʼ jaʼlo noq tuʼnju in chin ximane tiʼjju jaku bʼaj toj ambʼil tzul» (Karen).

 Toj chʼin yol: Qa taja, jaku tzʼok tilil tuʼna tuʼn miʼn tkubʼ tbʼinchaʼna jun matij il ex tuʼn tkubʼ tbʼinchaʼna aju bʼaʼn. Atzun jlu in bʼant kyuʼn chʼixme kykyaqil tmajen Jehová. Aya kbʼel ximinte tiʼ kbʼantel tuʼna (Filipenses 2:12).

 ¿Taja mas onbʼil? Uʼjinktza xnaqʼtzbʼil «¿Qué puedo hacer para resistir las tentaciones?».

 ¿Tiquʼn in tzaj xobʼa? Jun techel, olo tzʼok tbʼiʼna qa o cheʼx junjuntl kuʼxun ajbʼel te Jehová toj juntl lugar najchaq kyiʼj toj kyja ex kyiʼj kyamiw. Ex in kubʼlo t-ximana qa ax jlu il tiʼj tuʼn tbʼant tuʼna.

 «Jaku tzaj qʼoʼn junjuntl oklenj kye qeju ya otoq che bautisarin. Noqtzun tuʼnj, ateʼ junjun erman in kubʼ kyximen tuʼn ttzaj kykʼamoʼn jun oklenj mas yajxitl moqa mlay bʼant kyuʼn tuʼnju in nikʼ junjun tiʼchaq toj kyanqʼibʼil» (Marie).

 Texto nim toklen: «Teyle junjun tuʼn tikʼ twitz tiʼj tex taqʼunbʼen; kyjaʼtzun bʼaʼn tuʼn ttzalaj tiʼj taqʼunbʼen ex mya tiʼj taqʼunbʼen juntl» (Gálatas 6:4).

 Ximana tiʼj jlu: Miʼn tzʼok tmojbʼaʼna aju in bʼant tuʼna tukʼilju in bʼant kyuʼn txqantl, sino mas bʼaʼn tuʼn t-xi tbʼiʼna consej lu: «K’u’jlama Qman Dyos tu’n tkyaqil tanmiya» (Marcos 12:30, Xjan Tuʼjil).

 In tzaj tqʼamaʼn texto qa nim toklen tuʼn tajbʼena te Jehová tuʼn tkyaqil tanmiya ex nya tuʼn tkyaqil kyanmi txqantl. Qa ax tok kʼujlaʼn Jehová tuʼna, kxel tbʼinchaʼna tkyaqilju jaku bʼant tuʼna tuʼn tajbʼena te.

 «Nya jun saqchbʼil tuʼn qbautisarin, pero nya a t-xilen jlu qa in nok te jun iqtz. Qa ma che jaw tjyoʼna tbʼanel tamiwa, che onil tiʼja toj ambʼil atxix tajbʼen teya. Chebʼe tzul qʼoʼn junjuntl oklenj teya ex kʼonil jlu tiʼja tuʼn tkubʼ tnaʼna mas tzalajbʼil. Qa naʼmx tbautisarina, in xi tnajsaʼna ambʼil tuʼn ttzalaja» (Julia).

 Toj chʼin yol: Qa nim toklen toj twitza aju tkʼujlabʼil Jehová o kubʼ tyekʼin tiʼja, mas kʼokel tilil tuʼna tuʼn tajbʼena te (1 Juan 4:19).

 ¿Taja mas onbʼil? Uʼjinktza xnaqʼtzbʼil «¿Soy una persona responsable?».

 ¿Tiquʼn in tzaj xobʼa? A Jehová in kawin tibʼaj tkyaqil. Mintiʼx qoklen qa ma tzʼok qmojbʼan qibʼ tukʼil. Tuʼn jlu, jakulo kubʼ t-ximana qa mintiʼ in ximen tiʼja.

 «Tuʼnju testigo de Jehová qe nmane, kubʼ nximane qa oʼkx kye otoq che ok te tamiw Jehová. Kubʼ nximane qa ok tqʼoʼn Jehová twitz kyiʼj ex nya wiʼje» (Natalie).

 Texto nim toklen: «Mlay tzul jun xjal wukʼile qa mya tuʼn Nmane sul qʼiʼn, aju tzaj samante weye» (Juan 6:44).

 Ximana tiʼj jlu: Qa in kubʼ t-ximana tuʼn tbautisarina, in tzajlo tyekʼin jlu qa in txokin Jehová tiʼja tuʼn tok laqʼeʼya ttxlaj ex tuʼn toka te tamiw. ¿Tiʼ kbʼantel tuʼna? ¿Kxelpe tkʼamoʼna txokbʼil lu?

 Bʼaʼn tuʼn ttzaj tnaʼna qa oʼkx Jehová jaku qʼamante tiʼ tuʼn tbʼant kyuʼn qeju kyaj tuʼn kyok te tamiw. Ex ni jun xjal jaku qʼamante jlu. Ax ikx, in tzaj tqʼamaʼn Tyol Dios qa tzul laqʼeʼ Jehová ttxlaja qa ma tzʼok laqʼeʼya ttxlaj (Santiago 4:8).

 «Tuʼnju ojtzqiʼna tuʼn Jehová ex taj tuʼn tok te tamiwa, in tzaj tyekʼin jlu qa kʼujlaʼna tuʼn. Tuʼntzunju, qa in kubʼ t-ximana qa mintiʼ toklena tuʼn tajbʼena te Jehová, bʼaʼn tuʼn ttzaj tnaʼna qa junxitl te t-ximbʼetz ex mintiʼ in nel txalpaj» (Selina).

 Toj chʼin yol: Qa ma che japun requisito tkuʼx toj Tyol Dios tuʼna tuʼn tbautisarina, jaku kʼulina te Jehová. Ex bʼaʼn tuʼn ttzaj tnaʼna qa at toklen tuʼn tkʼulina twitz (Apocalipsis 4:11).

 ¿Taja mas onbʼil? Uʼjinktza xnaqʼtzbʼil «¿Tiquʼn nim toklen tuʼn qnaʼn Dios?».