«O tzʼok tilil wuʼne tuʼn tkubʼ wuʼjine Tyol Dios, noqtzun tuʼnj, nimxix tqan in nela toj nwitze» (Briana, te 15 abʼqʼi).

 ¿Axpe jlu in bʼaj tiʼja? Qa ikju, aju xnaqʼtzbʼil lu ma bʼaj bʼinchaʼn te teya.

•  ¿Tiquʼn nim toklen tuʼn tkubʼ quʼjin Tyol Dios?

•  Junjun tten tuʼn tkubʼ quʼjin Tyol Dios

•  Aju in tzaj kyqʼamaʼn junjuntl kuʼxun

 Tzeʼn teya toj twitz, ¿in bʼajpe qgan tuʼn quʼjin tiʼj Tyol Dios? In nel qnikʼe tiʼj. Bʼalo oʼkx in ximana tiʼj qa at nim mil t-xaq kyukʼil tal letra tkuʼx toj Tyol Dios ex mintiʼ qe tilbʼilal toj. ¡Junxitl jlu qa ma tzʼok qmojbʼaʼn tukʼil televisión ex qe video!

 Noqtzun tuʼnj, ximana tiʼj jlu: qa ma kanet jun ojtxe kʼubʼil pwaq tuʼna aju tkuʼx jun matij qʼinumabʼil toj, ¿nyape tajxixa tuʼn tjaw tjaqoʼna?

 Aju Tyol Dios ik tten ik tzeʼn kʼubʼil pwaq lu jatumel tkuʼx jun qʼinumabʼil. Ok che kanetel nim qʼinumabʼil tuʼna toj aju ok kʼonil tiʼja tuʼn:

•   Tjaw tjyoʼna junjun tbʼanel tiʼchaq kbʼantel tuʼna.

•   Tten tbʼanel kyxole kyukʼil ttata.

•   Kykanet tbʼanel tamiwa.

•   Miʼn ttzaj bʼaj tkʼuʼja tuʼnju in bʼant nim tiʼchaq tuʼna.

 ¿Alkye tten jaku tzʼoninxix jun ojtxe uʼj qiʼj? Tuʼnju «tkyaqil aju tzʼibʼan tuj Tuʼjil, a Dios o qʼmante» (2 Timoteo 3:16). A jlu in tzaj tyekʼin qe qa aʼyeju nabʼil in che kanet quʼn toj Xjan Uʼj atz tzajni tukʼil xjal mas nim toklen tibʼaj tkyaqil.

 Tnejel, jaku tzaj tzyet tuʼna toj tnejel t-xaq tzmaxi aj tkubʼ bʼaj. A jlu kʼonil tiʼja tuʼn tel tnikʼa tiʼj alkye tqanil tkuʼx toj Tyol Dios. Jaku bʼant tuʼna toj nimku tten; qqʼonk qwitz kyiʼj kabʼe techel:

•   Jaku che kubʼ tuʼjina qe 66 uʼj toj ttxolil moqa ik tzeʼn nukʼuʼn kyten, tuʼn ttzaj tzyet tuʼna tiʼj Génesis ex tuʼn tpon bʼaj tiʼj Apocalipsis.

•   Jaku kubʼ tuʼjina Tyol Dios toj ttxolil ik tzeʼn e bʼaj qe tiʼchaq.

 Nabʼil: Toj xnaqʼtzbʼil 4-A te uʼj Jun onbʼil tuʼn qxnaqʼtzan tiʼj Tyol Dios ok kʼokel tqʼon twitza tiʼj jun tajlal nukʼuʼn tten tiʼj tzeʼn e ikʼ qe tiʼchaq nim toklen toj tanqʼibʼil Jesús tej tten tzalu twitz Txʼotxʼ.

 Tkabʼ, jaku jaw tjyoʼna jun txʼolbʼabʼil aju at toklen tukʼil jun nya bʼaʼn in tzaj toj tanqʼibʼila. Jun techel:

•   ¿Taja tuʼn kyten tamiwa aʼyeju jaku tzʼok qeʼxix tkʼuʼja kyiʼj? Qa ikju, uʼjinkuya txʼolbʼabʼil tiʼj David ex Jonatán (1 Samuel, capítulos 18 al 20). Yajxitl, bʼinchankuya aju aqʼuntl «Cómo encontrar amigos de verdad» tuʼn tel tiʼna junjun tbʼanel xnaqʼtzbʼil tiʼj txʼolbʼabʼil lu.

•   ¿Taja tuʼn tten mas tipuna tuʼn kyel tikʼena nya bʼaʼn? Jaku kubʼ tuʼjina aju txʼolbʼabʼil tiʼj José ex tuʼn t-ximana tiʼj tzeʼn el tikʼen jun nya bʼaʼn (Génesis, capítulo 39). Yajxitl, bʼinchankuya aqʼuntl «Cómo resistir las tentaciones» ex «Acusado falsamente», tuʼn tel tiʼna junjun tbʼanel xnaqʼtzbʼil tiʼj.

•   ¿Taja tuʼn tel tnikʼa tiʼj tzeʼn jaku che onin naʼj Dios tiʼja? Uʼjinkuya aju ikʼ tiʼj Nehemías (Nehemías, capítulo 2). Yajxitl, bʼinchankuya aju aqʼuntl «Jehová contestó su oración» jatumel kʼeletz tiʼna tbʼanel xnaqʼtzbʼil tiʼj.

 Nabʼil: Qa taja tuʼn tuʼjina tiʼj Tyol Dios, jyoʼnktza jun tembʼil jatumel mintiʼ in qʼajt jun tiʼ tuʼntzun tok tqʼoʼnxix twiʼya tiʼj.

 Toxin, jaku jaw tjyoʼna jun txʼolbʼabʼil moqa jun salmo, kjawil tuʼjina ex ximana tiʼj tzeʼn jaku tzʼonin tiʼja. Aj tbʼaj tuʼjina, ximana kyiʼj xjel ik tzeʼn qe jlu:

•   ¿Tiquʼn o che kyaj tqʼoʼn Jehová qe yol lu toj Tuʼjil Tyol?

•   ¿Tiʼ in tzaj tyekʼin jlu weye tiʼj tmod Jehová ex tiʼj alkye tten in che bʼant qe tiʼchaq tuʼn?

•   ¿Tzeʼn jaku tzʼonin wiʼje toj wanqʼibʼile aju ma bʼaj wuʼjine?

 Nabʼil: Ximana tiʼj jun tiʼ jaku bʼant tuʼna. Tzʼibʼinkuya alkye qʼij kxel tzyet tuʼn tkubʼ tuʼjina Tyol Dios tukʼil «Programa tuʼn quʼjin tiʼj Tyol Dios», aju kkanetel tuʼna toj qtembʼile te Internet.