KYXJEL KUʼXUN
¿Tiʼ jaku tzʼonin wiʼje tuʼn tikʼx bʼis wuʼne qa o kyim jun xjal kʼujlaʼn wuʼne?
¿Ope kyim jun toj tjaya moqa jun tamiwa? Qa ikju, kʼonil xnaqʼtzbʼil lu tiʼja tuʼn tikʼx bʼis tuʼna.
Toj xnaqʼtzbʼil lu, kʼelel qnikʼ tiʼj jlu:
¿Tojpe tumel tuʼn tkubʼ nnaʼne nim bʼis?
Chʼixmi kykyaqil xjal in kubʼ kynaʼn nim bʼis aj tkyim jun xjal kʼujlaʼn kyuʼn ex in kubʼ kynaʼn jlu toj nimku ambʼil.
«Tkyaqil qʼij in tzaj nnaʼne nchmane. Maske ma tzikʼ kabʼe abʼqʼi tej tkyim, kukx in chin jaw oqʼe aj nyoline tiʼj» (Olivia).
«Kukx onin nyaye wiʼje tuʼn t-xi nbʼinchaʼne aju kubʼ nximane, pero mintiʼ ok tqʼoʼn twitz tiʼj tej tbʼant jlu wuʼne. Tuʼntzunju, in tzaj nbʼise aj tjapun twi jun nximbʼetze tuʼnju mintiʼ in nok tqʼoʼn twitz tiʼj» (Alison).
Jaku kubʼ tnaʼn jun xjal junxichaq tiʼchaq aj tkyim jun xjal kʼujlaʼn tuʼn. Qo yolin kyiʼj junjun techel.
«Tej tkyim ntiye, toj nim ambʼil mintiʼ xi nnimane jlu. Naʼmxtoq tkyim jun toj njaye, tuʼntzunju, tzaj salin wiʼje tej tok nbʼiʼne jlu» (Nadine).
«Tzaj nqʼoje tiʼj nchmane tej tkyim. Xi qqʼamaʼne te tuʼn tok t-xqʼuqin tibʼ tuʼn miʼn ttzaj yabʼil tiʼj, pero mintiʼ xi tbʼiʼn qyole» (Carlos).
«Kyxol kykyaqil toj qjaye, oʼkx qine tukʼil ntzike mintiʼ o tene tej tkyim nchmane. Tej tkyim, kubʼ nnaʼne nya bʼaʼn tuʼnju mintiʼ in yoline tukʼil tej chʼixtoq tkyim» (Adriana).
«Qamiwtoq qibʼe tukʼil jun mejebʼleʼn, pero e kyim toj jun aksident. Tej tbʼaj jlu in chin xobʼtoqe aj tetz bʼet jun toj njaye tuʼnju kubʼ nximane qa ax ikx te jakutoq kyim» (Jared).
«Ma tzikʼ oxe abʼqʼi tkyimlen nyaye ex in tzaj nbʼise tuʼnju mintiʼ in ntene mas ambʼil tukʼil» (Julianna).
Toj tumel tuʼn ttzaj qqʼoj, tuʼn tkubʼ qnaʼn bʼis, tuʼn qtzaj xobʼ ex tuʼn tkubʼ qnaʼn junjuntl tiʼchaq aj tkyim jun xjal kʼujlaʼn quʼn. Qa in kubʼ tnaʼna jun kyxol qe jlu, miʼn tzikʼ tnaʼl tuʼna qa chebʼe kʼelel tiʼja. Pero akux in bʼaj lu, ¿tiʼ jaku tzʼonin tiʼja tuʼn tikʼx bʼis tuʼna?
¿Tiʼ jaku tzʼonin wiʼje toj ambʼil lu?
Yolina tukʼil jun tamiwa. In tzaj tqʼamaʼn Biblia jlu tiʼj jun axix tok amiw: «Ok ttzaj jun mya bʼaʼn tiʼj, nnoʼk tamiw ik tzaʼn jun terman» (Proverbios 17:17). Qa ma yolina tukʼil juntl tiʼjju in kubʼ tnaʼna, jaku tzʼonin tiʼja tuʼn tkubʼ tnaʼna bʼaʼn.
«Toj tumel tuʼn tkubʼ qnaʼn bʼis aj tkyim jun xjal kʼujlaʼn quʼn. Jakulo kubʼ t-ximana qa nya il tiʼj tuʼn t-xi qʼuqbʼaʼn tkʼuʼja kyuʼn txqantl, pero jakulo tzaj mas tbʼisa qa ma bʼant jlu tuʼna ex jaku kubʼ t-ximana qa mlayx tzʼexa twitz nya bʼaʼn. Tuʼntzunju, bʼaʼn tuʼn tyolina tukʼil juntl» (Yvette).
Miʼn tzikʼ tnaʼl tuʼna. In tzaj tqʼamaʼn Tyol Dios jlu: «Aju xjal bʼaʼn, in tbʼinchaʼn ju bʼaʼn ex atzun taʼ ju bʼaʼn tuj tanmi» (Lucas 6:45). Jaku kubʼ ttzʼibʼina aju in tzaj tnaʼna tiʼj xjal kʼujlaʼn tuʼna moqa jaku kubʼ tbʼinchaʼna jun álbum de fotos.
«Kubʼ nximane tuʼn tkubʼ ntzʼibʼine tkyaqilju tzaj t-xnaqʼtzaʼn wamiwe weye tej naʼmxtoq tkyim tuʼntzun miʼn tikʼ tnaʼl wuʼne. Onin jlu wiʼje tuʼn tikʼx bʼis wuʼne» (Jeffrey).
Xqʼuqink tibʼa. In tzaj tqʼamaʼn Tyol Dios qa tbʼanel tuʼn qbʼinchan ejercicio (1 Timoteo 4:8). Tuʼntzunju, bʼaʼn tuʼn twaʼna bʼaʼn, tuʼn tbʼinchana ejercicio ex tuʼn tojlana.
«Aj tkyim jun xjal kʼujlaʼn tuʼna, at maj, ya mintiʼ in ximana tiʼjju in xi tbʼinchaʼna. Tuʼn jlu, ya mlay tzʼok t-xqʼuqin tibʼa ex jaku tzaj jun yabʼil tiʼja. Tuʼntzunju, kukx waʼna ex tzʼojlana bʼaʼn» (Maria).
Tzʼonina kyiʼj txqantl. In tzaj tqʼamaʼn Tyol Dios jlu: «Mas at tzalajbʼil kyeye qa at chʼin ma txi kyqʼoʼne te juntl, ex mya aqeye tuʼn kykʼmonteye» (Hechos 20:35).
«Bʼaʼn tuʼn tonina kyiʼj txqantl, ex mas kyiʼj qeju o kyim jun xjal kʼujlaʼn kyuʼn. Tuʼn jlu, kʼelel tnikʼa tiʼj qa nya oʼkx teya in nok weʼya twitz bʼis» (Carlos).
Qʼamanxa te Dios aju in kubʼ tnaʼna. In tzaj tqʼamaʼn Biblia qa in tzaj tbʼiʼn Jehová qnaʼj Dios (Salmo 65:2). Ax ikx, in tzaj tqʼamaʼn qa «nneʼl tiʼn bʼis tuj kyanmi qeju nim in che bʼisun, ex nnoʼk tqʼanan aju kʼixbʼlen kyiʼj» (Salmo 147:3).
«Aj tkubʼ tnaʼna bʼis, qaninxa te Jehová tuʼn ttzaj tqʼoʼn tipumala ex tuʼn ttzaj tqʼuqbʼaʼn tkʼuʼja. At maj kbʼel tnaʼna bʼis ex at maj kbʼel tnaʼna tzalajbʼil, pero kukx ktel Jehová tukʼila» (Jeanette).
Tenx t-ximbʼetza toj tumel tiʼjxa. Bʼaʼn tuʼn ttzaj tnaʼna qa junxichaq tiʼ in kubʼ kynaʼn xjal tuʼn bʼis. In tzaj tqʼamaʼn Tyol Dios jlu tiʼj Jacob tej tkubʼ t-ximen qa otoq kubʼ bʼyoʼn tkʼwal: «Mintiʼ o kubʼ tuj twitz tuʼn tqʼuqbʼanjtz tkʼuʼj» (Génesis 37:35). Tuʼntzunju, miʼn tzaj bʼaj tkʼuʼja qa ma txi tiʼn ambʼil tuʼn tel bʼis tiʼja.
«Maske ma tzikʼ 15 abʼqʼi tkyimlen ttzik ntxuʼye, kukx in tzaj nnaʼne junjun tiʼchaq tiʼj» (Taylor).
Ximana tiʼj qa in toqj jun tbʼaqila. Oklo kikʼex nim kʼixkʼoj tuʼna ex kxel tiʼn ambʼil tuʼn tqʼanit. Akux in pon ambʼil lu, kxel tqʼamaʼn doctor teya tuʼn tok t-xqʼuqin tibʼa ex kxel tqʼamaʼn teya tiʼ tuʼn tbʼant tuʼna.
Chʼixmi ax jlu il tiʼj tuʼn tbʼaj tuʼntzun tel bʼis qiʼj. Il tiʼj tuʼn tikʼ ambʼil tuʼntzun ya miʼn tkubʼ qnaʼnxix bʼis. Tuʼntzunju, bʼaʼn tuʼn tten tpasensa. Bʼaʼn tuʼn t-ximana kyiʼj nabʼil tkuʼx toj xnaqʼtzbʼil lu ex jyonxa alkyeqe mas jaku che onin tiʼja.
Bʼalo ax ikx tgana jlu
JUNJUNTL XNAQʼTZBʼIL
Aj tkyim jun xjal kʼujlaʼn quʼn
Ojtzqinka junjun tiʼchaq jaku che bʼant tuʼna tuʼn miʼn tkubʼ tnaʼna bʼis.
¡WEʼKTZA!
Qeju nya bʼaʼn jaku tzʼok weʼya twitz
Aj tkyim jun toj qja, ¿alkyeqe nya bʼaʼn jaku qo ok weʼ twitz?
