«Jakulo bʼaj qgan tiʼj Tyol Dios. Noqtzun tuʼnj, oʼkx jaku bʼaj qgan tiʼj qa mintiʼ in nel qnikʼ tiʼj tzeʼn tuʼn tkubʼ quʼjin», chi jun qʼa aju Will tbʼi.

 ¿Taj teya tuʼn tel tnikʼa tiʼj alkye tten jaku tzalaja aj tjaw tuʼjina Tyol Dios? Aju xnaqʼtzbʼil lu kʼonil tiʼja.

•  Anqʼinkuya qe txʼolbʼabʼil tkuʼx toj Tyol Dios

•  Jyontza chʼintl tqanil

•  Aju in tzaj kyqʼamaʼn junjuntl kuʼxun

 Anqʼinkuya aju in jaw tuʼjina ik tzeʼn qe tumel lu:

1.   Jyoʼnktza jun txʼolbʼabʼil tkuʼx toj Tyol Dios aju taja tuʼn t-xnaqʼtzana tiʼj. Bʼalo jun tiʼ o tzikʼ, jun piẍ tiʼj jun uʼj in yolin tiʼj tanqʼibʼil Jesús moqa jun txʼolbʼabʼil kyiʼj qeju qbʼibʼetz toj Tyol Dios aʼyeju ateʼ toj tembʼil jw.org.

2.   Uʼjinktza txʼolbʼabʼil. Jaku jaw tuʼjina tjunalxa moqa tukʼil tqʼajqʼajel twiʼya kyukʼil toj tjaya moqa kyukʼil tamiwa. Jaku tzʼok jun te narrador ex jaku jaw kyuʼjin junjuntl aju in tzaj kyqʼamaʼn txqantl.

3.   Bʼinchankuya jun kyxol qeju nabʼil lu:

   •   Bʼinchama jun tilbʼilal tiʼj txʼolbʼabʼil moqa junjun kʼloj tilbʼilal aju in tzaj kyqʼamaʼn qe txʼolbʼabʼil toj ttxolil toj ambʼil tej kyikʼ. Tzʼibʼinkuya jun txol yol aju in tzaj tchikʼbʼaʼn tiʼj teyele junjun tiʼchaq ikʼ.

   •   Bʼinchama jun ttxolil. Jun techel, aj tjaw tuʼjina tqanil tiʼj jun xjal kukx ajbʼen te Jehová, mojbʼankuya aju bʼant tuʼn ex qe tmod kyukʼil qeju kʼiwlabʼil e tzaj tkʼamoʼn.

   •   Chʼixpunkuya aju txʼolbʼabʼil te jun tqanil. Yekʼinxa toj junxichaq tten ex qaninxa «xjelbʼitz» kye qeju at kyoklen toj txʼolbʼabʼil ex kye junjuntl xjal ok kykeʼyin aju bʼaj.

   •   Qa jaw tjyoʼn jun xjal in yolin txʼolbʼabʼil tiʼj jun nya bʼaʼn ximbʼetz, ximana qa junxitl tiʼ kbʼajel tiʼj. Jun techel, ximana tiʼjju ikʼ tiʼj Pedro, aju tqʼama qa nya ojtzqiʼntoq Jesús tuʼn (Marcos 14:66-72). ¿Tiʼwtlo bʼant tuʼn Pedro tej ttzaj qanin xjel te kyuʼn xjal?

   •   Qa jaku bʼant tuʼna, tzʼibʼinkuya jun ttxʼolbʼabʼila in jatz tiʼj jun txʼolbʼabʼil toj Tyol Dios. Ax ikx tzʼibʼinkuya qe xnaqʼtzbʼil jaku tzʼel qiʼn tiʼj (Romanos 15:4).

 Qa ma ximana tiʼj junjun tiʼ ikʼ toj jun txʼolbʼabʼil toj Tyol Dios, jaku che kanet qʼinumabʼil ewin ateʼ tuʼna. At maj, jun moqa kabʼe yol in tzaj kyqʼoʼn chʼintl tqanil nim toklen.

 Jun techel, mojbʼankuya Mateo 28:7 tukʼil Marcos 16:7.

•   ¿Tiquʼn kux tqʼoʼn Marcos tqanil tiʼj Jesús qa chʼixtoq tkubʼ tyekʼin tibʼ kywitz t-xnaqʼtzbʼen «ex twitz Pedro»?

•  Jun onbʼil: Toj ambʼil aju mintiʼ ten Marcos; bʼalo a Pedro xi qʼamante te.

•  Qʼinumabʼil toj Tyol Dios: ¿Tiquʼn xi tqʼuqbʼaʼn tkʼuʼj Pedro aju qa tajtoq Jesús tuʼn tok tkeʼyin juntl maj? (Marcos 14:66-72). ¿Tzeʼn xi tyekʼin Jesús te Pedro qa jun axix tok amiw te? ¿Tzeʼn jaku tzʼel tkanoʼna tiʼj Jesús qa taja tuʼn toka te jun tbʼanel amiw?

 Aj tkubʼ tanqʼina qe txʼolbʼabʼil ex aj ttzaj tjyoʼna chʼintl tqanil kyiʼj, mas jaku tzalaja tiʼjju in jaw tuʼjina toj Tyol Dios.