Aj tjaw tjaqoʼna Tyol Dios, oʼkx in nok tqʼoʼn twitza kyiʼj nim letra. Pero ¡miʼn tzaj bʼaj tkʼuʼja! Ximana tiʼj qa jaku tzʼok Biblia ik tzeʼn nimku tbʼanel wabʼj ateʼ tibʼaj jun mes. Mlay bʼant tuʼn kyxi twaʼna tkyaqil, pero jaku txi twaʼna aju jaku noj tkʼuʼja tuʼn.

 Qa taja tuʼn kyjatz tiʼna tbʼanel xnaqʼtzbʼil toj Biblia aj tjaw tuʼjina, moqa toj juntl yol, aj twaʼna tiʼj «wabʼj» in tzaj tukʼil Dios, il tiʼj tuʼn tok tqʼoʼn twiʼya tiʼjju in jaw tuʼjina.

Toj xnaqʼtzbʼil lu, kʼelel tnikʼa tiʼj tzeʼn jaku bʼant tuʼna.

•  ¿Tiquʼn il tiʼj tuʼn tok tqʼoʼn twiʼya tiʼjju in jaw tuʼjina toj Biblia?

•  ¿Tiʼ jaku bʼant tuʼna tuʼn kyjatz tiʼna tbʼanel xnaqʼtzbʼil aj tuʼjina tiʼj Biblia?

•  Aju in tzaj kyqʼamaʼn junjuntl kuʼxun

 Qa ma tzʼok tqʼoʼn twiʼya tiʼjju in jaw tuʼjina toj Biblia, mas xnaqʼtzbʼil che jawitz tiʼna toj. Qa mas ma tzʼok tilil tuʼna tuʼn tuʼjina tiʼj Biblia, kʼonil tiʼja tuʼn tel tnikʼa kyiʼj tbʼanel xnaqʼtzbʼil. Ximana tiʼj techel lu, qa toj chʼin ambʼil xkux tqʼoʼna jun bols té toj jun vas kyqaʼ, oklo kxel tqʼoʼn chʼin t-saboril, pero qa ma kux tqʼoʼna nim ambʼil kxel tqʼoʼn mas t-saboril.

 Chʼixmi ax jlu jaku bʼant tuʼna aj tuʼjina tiʼj Biblia. Tbʼanel qa nya jun rat xjaw tuʼjina ex qa ma tzʼel tpaʼna ambʼil tuʼn t-ximana tiʼj. Qa ma bʼant jlu tuʼna, kxel tqʼoʼna ambʼil tuʼn tkuʼpin toj tanmiya aju in jaw tuʼjina ex tuʼn tkyaj toj twiʼya. Atzun jlu bʼant tuʼn aj tzʼibʼil te Salmo 119. Tej tyolin tiʼj tley Dios tqʼama jlu: «Tkyaqil qʼij in chin ximane tiʼj» (Salmo 119:97).

 Aj tuʼjina tiʼj Biblia nya a t-xilen qa il tiʼj tuʼn tuʼjina ex tuʼn t-ximana tiʼj toj enter qʼij. Ik tzeʼn bʼant tuʼn salmista, el tpaʼn ambʼil tuʼn t-ximen tiʼj Tyol Dios. Tuʼnju bʼant jlu tuʼn, onin tiʼj tuʼn tel tnikʼ tiʼj alkye mas bʼaʼn tuʼn tbʼant tuʼn (Salmo 119:98-100).

 «Tzaj tqʼamaʼn ntxuʼye jun maj: ‹Siete qʼij tokx toj jun seman. In xi tqʼoʼna nim ambʼil kyiʼj tiʼchaq tgana, ¿nyatzulo tbʼanel tuʼn t-xi tqʼoʼna chʼin ambʼil te Jehová?›» (chi Melanie).

 Tbʼanel qa ma ximana kyiʼj tkawbʼil Jehová aj t-xi tbʼinchaʼna jun tiʼ, ik tzeʼn aj kyjaw tjyoʼna tamiwa moqa aj tok weʼye twitz jun nya bʼaʼn.

•   Ximana tiʼj tzeʼn jaku bʼant tuʼna. Tzaj qʼamaʼn jlu tuʼn jun txin Julia tbʼi: «Tzʼibʼinkuya tiʼ kbʼel tuʼjina toj Biblia, alkye or ex jatumel».

•   Jyonxa jun lugar mas bʼaʼn. Tqʼama jun txin Gianna tbʼi: «Aj tuʼjina tiʼj Biblia, jyonxa jun lugar jatumel jaku tena tjunalxa. Ex qʼamanxa kye toj tjaya tuʼntzun miʼn kypon jyol teya toj ambʼil aju»

   Aj tuʼjina tiʼj Biblia toj jun teléfono moqa toj jun tablet, jaku kubʼ tyupina qe notificación. Moqa jaku tzʼajbʼen jun Biblia tuʼna twitz uʼj. In tzaj kyqʼamaʼn aj xnaqʼtzal qa aj tjaw tuʼjina Biblia twitz uʼj, mas jaku tzʼel tnikʼa tiʼj. Ex mas kwest jaku tzʼela teya tuʼn tok tqʼoʼn twiʼya tiʼj qa ma jaw tuʼjina twitz jun pantalla.

   «Qa in chin uʼjine twitz jun pantalla, mas mintiʼ in nok nqʼoʼn nwiʼye tiʼjju in jaw wuʼjine tuʼnju tkyaqil ambʼil in che oktz notificación, in kubʼ bʼaj tcarga, mintiʼ in nok internet ex in bʼaj junjuntl tiʼchaq. Atzunte qa twitz uʼj in chin uʼjine, oʼkx in nok tilil wuʼne tuʼn tjaw wuʼjine toj spikʼun» (chi Elena).

•   Naʼna Dios naʼmxtoq txi tzyet. Qaninxa te Jehová tuʼn tel tnikʼa tiʼjju in jaw tuʼjina, tuʼn tzaj tnaʼna ex tuʼn tjatz tiʼna tbʼanel xnaqʼtzbʼil tojju otoq kubʼ t-ximana tuʼn tjaw tuʼjina toj Biblia (Santiago 1:5).

   Tuʼn tkubʼ tyekʼina te Jehová qa tajbʼilxixa aju xi tqanina, jyonxa tqanil tiʼjju in jaw tuʼjina. ¿Alkye tten? Aj t-xi tqʼoʼna clic toj JW Library moqa toj Biblia toj internet tiʼj jun versículo, moqa aj t-xi tjyoʼna mas tqanil ex mas xnaqʼtzbʼil at toklen tukʼilju texto xjaw tuʼjina.

•   Ximana kyiʼj junjun xjel. Ik tzeʼn: «¿Tiʼ in tzaj t-xnaqʼtzan jlu weʼye tiʼj Jehová? ¿Alkye jun tmod Jehová jaku tzʼel nkanoʼne?» (Efesios 5:1). «¿Jaku jatz wiʼne jun xnaqʼtzbʼil toj txʼolbʼabʼil lu? ¿Tzeʼn jaku tzʼajbʼen toj wanqʼibʼile?» (Salmo 119:105). «¿Jaku tzʼajbʼen aju ma jaw wuʼjine tuʼn wonine tiʼj juntl?» (Romanos 1:11).

   Ax ikx xjelinkuya jlu: «¿Tiʼ toklen aju xjaw wuʼjine tukʼil tkyaqil in yolin Biblia tiʼj?» Nim toklen xjel lu. ¿Tiquʼn? Tuʼnju junx xnaqʼtzbʼil in yolin tkyaqil Biblia tiʼj, in tzaj tzyet toj Génesis ex in pon bʼaj toj Apocalipsis. In yolin tiʼj tzeʼn tuʼn tajbʼen Kawbʼil tuʼn Jehová tuʼn tjaw nimset tbʼi, tuʼn tkubʼ yekʼit qa a at toklen tuʼn tkawin ex qa aju tkawbʼil atzun mas tbʼanel kawbʼil jaku ten.