Toj xnaqʼtzbʼil lu, kʼelel qnikʼ tiʼj jlu:

•  Aj tyolin jun qʼa tukʼil jun txin

•  ¿Mape bʼant ntene tuʼn tten weye nnovia moqa nnovio?

 In kubʼ kyximen junjun qa aj tyolin jun qʼa tukʼil jun txin moqa aj kyok te novio, noq jaku bʼant jlu kyuʼn tuʼn kytzalaj jun rat. Pero toj xnaqʼtzbʼil lu kʼelel qnikʼ tiʼj qa aju ambʼil aj tten tnovia moqa tnovio jun xjal in najbʼen tuʼn tel nikʼ tiʼj qa che kbʼel mojeʼ moqa mlay. Toj juntl yol, at jun tiquʼn bʼaʼn tuʼn tyolin jun qʼa tukʼil jun txin ex nya oʼkx tuʼn kytzalaj jun rat.

 In che jaw yolin kabʼe xjal tuʼntzun aj tbʼet ambʼil in che kubʼ mojeʼ. Pero ax ikx at maj, mintiʼ in che kubʼ mojeʼ. Tuʼntzunju, aj kyyolin kabʼe xjal, il tiʼj tuʼn tel kynikʼ tiʼj qa naʼmx tok kybʼiʼn qa che kbʼel mojeʼ moqa mlay.

 Toj chʼin yol: Qa in kubʼ t-ximana qa o bʼant ttena tuʼn tten jun teya tnovia moqa jun teya tnovio, ax ikx a t-xilen qa in kubʼ t-ximana qa ya o bʼant ttena tuʼn tkubʼ mojeʼya.

 Qa ya at teya tnovia moqa tnovio, kpol-lo jun qʼij jatumel kbʼel mojeʼya. Tuʼntzunju, bʼaʼn tuʼn t-ximana tiʼj alkyeqe tmoda il tiʼj tuʼn tten tuʼntzun toka te jun tbʼanel chmilbʼaj moqa te jun tbʼanel xuʼjilbʼaj. Lu junjun techel kyiʼj mod lu bʼaʼn tuʼn t-ximana tiʼj:

•   Aju tmoda kyukʼil toj tjaya. Aj tok weʼya twitz jun nya bʼaʼn, ¿alkye tmoda in kubʼ tyekʼina kyukʼil tmana, kyukʼil ttzika moqa kyukʼil titzʼina? Qa bʼaʼn moqa nya bʼaʼn, ax tmoda lu kbʼel tyekʼina tukʼil t-xuʼjila moqa tukʼil tchmila.

   Texto nim toklen: «Kykolinkje qʼoj, miʼn che jaw kyaqpaje, miʼn tzaj tloʼch kykʼuʼje, miʼn che jaw schʼine tuʼn kyqʼoje, miʼn che yasune, miʼn che ximane mya bʼaʼn tiʼj juntl» (Efesios 4:31).

   Xjelinkuya jlu: «Naqwit txi qanin kye nmane, kye ntzike ex kye witzʼine, ¿jakutzulo tzaj kyqʼamaʼn qa in chin respetarine kye? Aj ttzaj jun nya bʼaʼn qxole kyukʼil, ¿in chin yoline toj tumel moqa jun rat in tzaj nqʼoje?».

•   Kximela tiʼj tukʼila: Aj tkubʼ mojeʼya il tiʼj tuʼn t-ximana tiʼjju tajbʼil tukʼila. Ex chʼixmi tkyaqil maj kxel bʼinchet aju tajbʼil tukʼila ex nya aju teya tajbʼil.

   Texto nim toklen: «Mya noq oʼkx tuʼn kyximane tiʼj ju bʼaʼn te kyeye, ax ikx tuʼn kyximane tiʼj alkyeju bʼaʼn kye txqantl» (1 Corintios 10:24).

   Xjelinkuya jlu: «¿In nokpe tilil wuʼne toj tkyaqil maj tuʼn tbʼant aju wajbʼile? ¿Tiʼ kyxim txqantl wiʼje? ¿In kubʼpe kyximen qa tbʼanel nmode kyukʼil? ¿Toj alkye ambʼil o kubʼ nyekʼine qa in chin ximane kyiʼj txqantl ex nya oʼkx wiʼje?».

•   Kbʼel tin tibʼa: Aju jun tbʼanel chmilbʼaj moqa jun tbʼanel xuʼjilbʼaj, in nel tnikʼ tiʼj qa at tpaltil ex in xi tqanin najsam.

   Texto nim toklen: «Qkyaqil nimku maj in qo tzpet tiʼj» (Santiago 3:2).

   Xjelinkuya jlu: «¿Jun ratpe in xi nqʼamaʼne qa aqine at npaje tiʼj jun tiʼ? ¿Moqa in nok tilil wuʼne tuʼn tkubʼ wewine ¿Tiʼ in bʼant wuʼne aj ttzaj qʼoʼn junjun consej weye kyiʼj junjun tiʼchaq? ¿Bʼaʼnpe in nela toj nwitze moqa jun rat in tzaj nqʼoje tuʼn?».

•   Il tij tuʼn tajbʼen pwaq tuʼna toj tumel. Qa ma tzʼajbʼen pwaq moqa medi tuʼna toj tumel, mas mlay tzaj qʼoj toj tmejebʼleʼna.

   Texto nim toklen: «Alkye jun kyxole, qa taj tuʼn tbʼant jun ja tuʼn, ¿mlaypelo kubʼ qeʼ ximal tiʼj nej nikʼpun knajel tuʼn, qa akux aju pwaq tuʼn tbʼant ja?» (Lucas 14:28).

   Xjelinkuya jlu: «¿In kaninpe pwaq wuʼne kyiʼj tiʼchaq? ¿Moqa kukx in netz nkʼase? ¿Tzeʼn o kubʼ nyekʼine qa in najbʼen pwaq wuʼne toj tumel?».

•   Il tiʼj tuʼn toka te jun tbʼanel okslal. Qa testigo de Jehová teya; il tij tuʼn t-xnaqʼtzana tiʼj Tyol Dios toj ambʼil o bʼaj t-ximana tuʼn tbʼant, ax ikx, il tiʼj tuʼn txiʼya kyoj kykyaqil chmabʼil.

   Texto nim toklen: «At tzalajbʼil kye qeju in nel kynikʼ tiʼj qa at tajbʼen Dios kye» (Mateo 5:3).

   Xjelinkuya jlu: «¿In nok nqʼoʼne toklen wajbʼebʼile te Dios? ¿Nokpe tilil wuʼne tuʼn nxnaqʼtzane tiʼj Tyol Dios ex tuʼn nxiʼye kyoj kykyaqil chmabʼil?¿Moqa in xi nqʼoʼne ambʼil kye junjuntl tiʼchaq tuʼn miʼn tbʼant wuʼne?»

 Toj chʼin yol: At toklen xjal kbʼel mojeʼ tukʼila tuʼn tkanet jun tbʼanel tukʼil. Qa in nok tilil tuʼna tuʼn toka te jun tbʼanel xjal, maslo fácil jaku kanet jun xjal tuʼna aju ax ikx in nok tilil tuʼn ik tzeʼn teya.