KYXJEL KUʼXUN
¿Yajtzun qa in chin tzaj xobʼe tuʼn nyoline kyukʼil txqantl?
Aju nya bʼaʼn tqanil: Ateʼlo junjun tiʼ mintiʼ in bʼant tuʼna noq tuʼnju in tzaj xobʼa tuʼn tyolina kyukʼil txqantl. Ik tzeʼn tuʼn kyten tbʼanel tamiwa ex tuʼn tkubʼ tbʼinchaʼna junjuntl tiʼchaq naʼmx tbʼant tuʼna.
Aju tbʼanel tqanil: At maj, bʼaʼn qa in qo tzaj xobʼ tuʼn qyolin kyukʼil txqantl. Jaku tzʼonin tiʼja tuʼn t-ximana naʼmxtoq tyolina, tuʼn tok tqʼoʼn twitza kyiʼj junjun tiʼchaq ex tuʼn tok tbʼiʼna aju in tzaj kyqʼamaʼn txqantl.
Aju mas tbʼanel: Nya kukx jaku ten xobʼil tiʼja tuʼn tyolina kyukʼil txqantl, sino jaku kubʼ tiʼj tuʼna. ¿Taja tuʼn tel tnikʼa tiʼj tzeʼn jaku bʼant tuʼna? Kkanetel tzaqʼwebʼil tuʼna toj xnaqʼtzbʼil lu.
¿Tiquʼn in tzaj xobʼa?
Qa in tzaj xobʼa tuʼn tyolina kyukʼil txqantl, maslo jaku tzaj xobʼa qa ma txi qʼamaʼn teya tuʼn t-xiʼya yolil tukʼil jun xjal. In kubʼlo tnaʼna qa tjunalxa at, qa mintiʼ qe tamiwa ex qa ik tten ik tzeʼn tokxa toj jun kwart at qlolj toj. Qkyaqilx jaku qo tzaj xobʼ tuʼn jlu. Pero qa ma tzʼok tilil tuʼna tuʼn tel tnikʼa tiʼj tiquʼn in tzaj xobʼa, jakulo tzʼel tnikʼa tiʼj qa mintiʼ kyoklen jlu. Ximana kyiʼj oxe techel lu.
Tnejel: «Mintiʼ ojtzqiʼn wuʼne tiʼ kxel nqʼamaʼne».
Aju in bʼaj: Mas in tzaj kynaʼn xjal aju in kubʼ kynaʼn aj kyyolin tukʼila twitzju in xi tqʼamaʼna kye. Jaku kubʼ tiʼj xobʼil tuʼna aj tok tilil tuʼna tuʼn tok tbʼiʼna aju in tzaj kyqʼamaʼn txqantl ex qa ma ximana kyiʼj.
Ximana tiʼj jlu: ¿Alkye tamiwa taja tuʼn tten? ¿Aju in nok bʼiʼna tuʼn? ¿Moqa aju oʼkx in ximen tuʼn tyolin ex mintiʼ in tzaj tqʼoʼn ambʼil teya tuʼn tyolina?
Tkabʼin: «Jaku kubʼ kyximen xjal qa nya ngane tuʼn nyoline».
Aju in bʼaj: Ok che yolil xjal tiʼja qa in tzaj xobʼa, pero ax ikx qa mintiʼ in tzaj xobʼa. Qa ma tzʼok tilil tuʼna tuʼn miʼn ttzaj xobʼa, kʼonil jlu tuʼn tel kynikʼ txqantl tiʼja qa ateʼ tbʼanel tmoda ex qa taja tuʼn tyolina.
Ximana tiʼj jlu: Qa in kubʼ t-ximana qa in kubʼ kyximen txqantl nya bʼaʼn tiʼja, ¿nyapetzulo aya in kubʼ ximente nya bʼaʼn kyiʼj?
Toxin: «Che jawil tzeʼn txqantl wiʼje qa ma txi nqʼamaʼne jun nyole nya toj tumel».
Aju in bʼaj: In bʼaj jlu kyiʼj kykyaqil xjal. Qa ma che jaw tzeʼn txqantl tiʼj jun tyola, miʼn tzaj xobʼa, sino yekʼinxa qa mintiʼxix in ximana tiʼjju xbʼaj.
Ximana tiʼj jlu: ¿Nyape mas bʼaʼn in kubʼ tnaʼna aj ttena kyukʼil xjal in nel kynikʼ tiʼj qa at maj in che el txalpaj?
¿Ojtzqiʼn jlu tuʼna? Ateʼ junjun kuʼxun in kubʼ kyximen qa nya kwest tuʼn tok kyamiwen kyibʼ kyukʼil txqantl tuʼnju in che chatiarin moqa kukx in xi kysamaʼn mensaje. Pero mas jaku che kanet tbʼanel tamiwa qa ma yolina kyukʼil. Jun sicóloga Sherry Turkle tbʼi, aju at tojtzqibʼil tiʼjju in bʼaj kyiʼj xjal tuʼn tecnología, kubʼ ttzʼibʼin jlu: «Oʼkx qa ma tzʼok qkeʼyin twitz juntl xjal ex qa ma txi qbʼiʼn tqʼajqʼajel twiʼ, in kubʼ qyekʼin alkyexix qmod». a
Qa ma tzʼok tilil tuʼna tuʼn tyolina kyukʼil xjal, kʼelel tnikʼa tiʼj qa nyaxix kwest tuʼn tbʼant jlu ik tzeʼn in kubʼ t-ximana.
Aju jaku bʼant tuʼna
Miʼn tzʼok tmojbʼaʼna tmoda tukʼil kymod txqantl. Nya a t-xilen qa il tiʼj tuʼn tyolina kyukʼil kykyaqil xjal, sino a t-xilen tuʼn miʼn ttzajxix xobʼa aj tyolina. Qa ma bʼant jlu tuʼna, ok che tel tbʼanel tamiwa. Ex kbʼantel junjuntl tiʼchaq tuʼna.
«Nya il tiʼj tuʼn tyolina toj tkyaqil ambʼil ex tuʼn tok kyqʼoʼn txqantl kywitz tiʼja. Sino oʼkx jaku qʼolbʼena ex jaku txi tqanina junjun xjel» (Alicia).
Texto nim toklen: «Teyle junjun tuʼn tikʼ twitz tiʼj tex taqʼunbʼen; kyjaʼtzun bʼaʼn tuʼn ttzalaj tiʼj taqʼunbʼen ex mya tiʼj taqʼunbʼen juntl» (Gálatas 6:4).
Qʼonk twiʼya tiʼj kyyol txqantl ex bʼaʼn tuʼn tel tkanoʼna. Qʼonk twitza tiʼj tiʼ in bʼant kyuʼn xjal aj kyyolin kyukʼil txqantl. ¿Alkye tbʼanel kyyol in najbʼen? ¿Ex alkye kyyol nya bʼaʼn in najbʼen? Kyxol qeju mod in nok tqʼoʼn twitza tiʼj, ¿alkye jun taja tuʼn tel tkanoʼna?
«Ateʼ junjun xjal nya kwest in nela toj kywitz tuʼn kyten kyamiw. Tuʼntzunju, bʼaʼn tuʼn tok tqʼoʼn twitza tiʼjju in bʼant kyuʼn ex tiʼ in xi kyqʼamaʼn aj tok kyojtzqiʼn jun xjal. Qʼonk twiʼya tiʼj ex kanoʼmila» (Aarón).
Texto nim toklen: «Aju kʼuxbʼil, in japun ttziʼ tuʼn juntl kʼuxbʼil, ex aju xjal nnoʼk tnabʼl tuʼn t-xnaqʼtzbʼil juntl xjal» (Proverbios 27:17).
Bʼaʼn tuʼn t-xi tqanina junjun xjel: Chʼixmi tkyaqil maj, kygan xjal tuʼn t-xi kyqʼamaʼn aju in kubʼ kyximen. Qa ma txi tqanina junjun xjel, jaku tzʼonin tiʼja tuʼn t-xi tzyet tuʼn tyolina ex tuʼn miʼn tok kyqʼoʼn txqantl kywiʼ tiʼja.
«Qa otoq kubʼ t-ximana tiʼ kxel tqʼamaʼna, mlay tzaj nim t-xobʼila. Naʼmxtoq t-xiʼya toj jun fiesta, jaku ximana alqiʼj jaku yolina moqa alkyeqe xjel jaku txi tqanina. Qa ma bʼant jlu tuʼna, mlayxix tzaj xobʼa aj tyolina kyukʼil xjal mintiʼ ojtzqiʼn tuʼna» (Alana).
Texto nim toklen: «Mya noq oʼkx tuʼn tok tqʼoʼn tkwent tiʼj aju at tajbʼen te, ax ikx tuʼn tok tqʼoʼn tkwent tiʼj aju at tajbʼen kye txqantl» (Filipenses 2:4).
a Ma jatz toj libro En defensa de la conversación.