Xi tzyet tanq’ib’ila tukʼil jun tal célula cigoto tbʼi, nyaxix qʼanchaʼl tuʼnju tal chʼin xiẍ. Aju tnejel célula, aju cigoto, ok te nimku kybʼet ex ok te mas te 200 wiq células o che chʼexpaj te junxitl kyten, junjun e ok te mas tal chʼin, junjuntl e ok te mas matij ex junxichaq kyaqʼun in bʼant. Ex tej tikʼ junjun xjaw ya otoq tzʼoka te jun tal neʼ ex tzʼaqlixix t-ximlala

 Ximana tiʼj jlu: Jun célula aju cigoto in bʼaʼntoq jun copia tuʼn tiʼj T-ADN ex in nkubʼ tpan tibʼ te kabʼe. Qe kabʼe célula akʼaj lu in bʼant ax jlu kyuʼn toj nimku maj. Tnejel, tkyaqil qe akʼaj célula lu ax chi keʼyin, noqtzun tuʼnj, toj ky-ADN ate tkyaqil instrucciónes nim kyoklen tuʼn tbʼaj kybʼinchen nimku wiq células.

 Jun seman tokxlen itzʼj toj talbʼil t-txuʼ, in kubʼ kypan naj kyibʼ qe células te kabʼe. Junjun in che ok te tal neʼ moqa embrión, ex junjun in che ok te tmuj moqa placenta ex te qe tejidos at kyoklen tukʼil tmuj in che onin tuʼn tchʼiy tal neʼ moqa embrión.

 Atzun toj toxin seman, qe tcélula tal neʼ in bʼaj kybʼinchan kyten te oxe capa. Aqeju células te tnejel capa tok tiʼjxi in che ajbʼen tuʼn tbʼant tsistema nervioso, t-sesil twi, ttziʼ,tchibʼjal te tiʼjxi,ex junjuntl célula. Aqeju células te tkabʼin capa in che onin tuʼn tbʼant tchkʼel, qe tbʼaqil, qe triñon,qe tmusculo, ex junjuntl tejido. Ex aqeju te toxin capa te tu’jxi che okel te organo toj t-ximlal, ik tzeʼn qe tpulmon, tvejiga, ex chʼixme tkyaqil t-sistema digestivo.

 Toj ambʼil te embarazo, junjun tcélula tal neʼ in bʼet kyikʼ toj t-ximlal, kyjunalx moqa toj grupo. Junjuntl in nok kychmon kyibʼ ex in bʼaj kybʼinchen laminas tuʼntzun kyok te estructuras ik kyten ik tzeʼn jun cordon moqa at kycavidades. Il tiʼj tuʼn tbʼaj nukʼet aqʼuntl lu tuʼntzun tbʼant toj tumelxix. Jun techel, in pon jun ambʼil jatumel in nok kychmon kyibʼ laminas te células tuʼn tbʼant tubos tal chʼin kyuʼn. In bʼant aqʼuntl lu toj nimku lugar toj t-xmilal tal neʼ toj ax ambʼil. Ax ikx in che ok tubos te matij ex in nel txuʼl, ex te mankbʼil in bʼaj kyjunin kyibʼ tuʼn tbʼant jun red circulatoria kyuʼn.

 Aj in ul itzʼ jun tal neʼ mintiʼ yabʼil tiʼj, ya in che aqʼunan qeju miles te millones tcélulas at toj ambʼil ex lugar toj tumelxix.

 ¿Tiʼ t-xima tiʼj?¿Aju alkye ten in che chʼexpaj qe célula toj qxmilal atpe jun bʼinchal te moqa mintiʼ?