Aju tal pez moqa tal kyiẍ te California atz in che kubʼ tqʼoʼn tjos ttzʼi mar te California (Estados Unidos) ex Baja California (México). Jaku txi qqʼamaʼn qa ojtzqiʼnxix tuʼn pez lu toj alkye qʼij ex alkye ambʼil kbʼel tqʼoʼn tjos tuʼntzun miʼn kykyim tal.

 Ximana tiʼj jlu: Oʼkx in kubʼ tqʼoʼn pez pejerrey tjos qa otoq tzikʼ oxe moqa kyaje qonikʼen tetzlen akʼaj xjaw moqa luna ex qa otoq jaw chʼiy mar. In kyaj arena tibʼaj jos tuʼn aʼ aj taj tiʼj tuʼntzun miʼn ttzaj nya bʼaʼn kyiʼj jos. Noqwit in kubʼ tqʼoʼn pez pejerrey qe tjos kyoj junjun qonikʼen naʼmxtoq tetz akʼaj xjaw ex otoqxi che chʼiy qe ola te mar, jaku txiʼ qʼiʼn arena junx kyukʼil qe tjos tuʼn a’.

 Ax ikx, mas in che chʼiy ola te qonikʼan toj marzo ex septiembre ex kyoj qe xjaw lu in che kubʼ tqʼoʼn pejerrey qe tjos. In nonin jlu tiʼj tal pez tuʼn tkubʼ tqʼoʼn qe tjos najchaq ttzi mar tuʼntzun miʼn tpon tipumal aʼ kyibʼaj.

 In kubʼ tyoʼn pejerrey jun ola tuʼn t-xi qʼiʼn tuʼn ttzi mar tuʼntzun tkubʼ tqʼoʼn qe tjos toj arena. Aj taj tiʼj ola toj tlugar in kyaj pez toj arena aju at chʼin aʼ toj. Entonces aju ttxuʼ pejerrey in kubʼ tbʼinchaʼn jun tjul te 5 a 8 centímetro t-xeʼ. In kux tqʼoʼn pejerrey tjeʼ toj jul tuʼntzun tkubʼ tqʼoʼn qe tjos ex tuʼntzun tpon jun moqa tuʼn kypon txqantl tman pez pejerrey qʼolte kyijaj kyoj jos. Aj tbʼant jlu tuʼn ttxuʼ pez, in xi tjakʼun tibʼ jatumel taʼ mar ex in nok tilil tuʼn tuʼn t-xi qʼiʼn juntl maj tuʼn juntl ola ex tuʼntzun tmeltzʼaj toj mar.

 Atz in che bʼant qe jos toj arena at aʼ toj. Pero il tiʼj tuʼn tpon tipumal jun ola kyiʼj tuʼn kypax ex tuʼn kyjaqet. Tuʼntzunju, tzmaxi aj tchʼiy juntl maj mar ex aj tikʼ kabʼe moqa kyaje seman, in che ul itzʼj qe tal pez pejerrey ex in che etz kyoj jos.

 ¿Tiʼ t-xima tiʼj? Aju alkye tten in kubʼ kyqʼoʼn pez pejerrey qe kyjos ex tuʼn kyul itzʼj kyal, ¿noqpe minabʼen jlu moqa at jun bʼinchal kye?