Aqeju tman rana in che anqʼin twi tzeʼ te Japón ojtzqi’nqexix tuʼnju in che bʼitzin nim maj. Aj kyok ten bʼitzil junx jakulo kubʼ qximen qa mintiʼ ttxolil kybʼitz, noqtzun tuʼnj jaku tzʼel qnikʼ tiʼj tzeʼn in che bʼitzin teyele junjun. Toj tnam Japón o tzʼel kynikʼ xjal in che xnaqʼtzaʼn kyiʼj, qa in che bʼitzin tojxix ttxolil ex toj junx lugar aj t-xi kybʼitzin kye ttxuʼ rana.

 Ximane tiʼj jlu: Aqeju tman rana in che qʼajt tuʼntzun kytzaj bʼiʼn kyuʼn ttxuʼ rana ex tuʼn kytzaj laqʼeʼ kyiʼj. In bʼant jlu kyuʼn aj in nel mal tjaqʼ kyqul aju in nok qʼoʼn tbʼi te saco bocal ex tuʼn jlu mas in che qʼajt.

 Qa nim kybʼet rana in che bʼitzin toj axju lugar ¿Tzeʼntzun jaku tzʼel qnikʼ tiʼj qa junxitl tqʼajqʼajel teyele junjun kye? In tzaj kyqʼamaʼn xjal o tzʼel kynikʼ kyiʼj qa mintiʼ in che bʼitzin rana ate’ junx toj ax ambʼil, sino aj tbʼaj bʼitzin jun in xi tzyet tuʼn tbʼitzin juntl ex toj ttxolil. In onin jlu tuʼntzun miʼn kyok bʼiʼn toj ax ambʼil ex iktzun tten tbʼanelxix in nela tqʼajqʼajel kybʼitz. Nya oʼkxju ax ikx in nonin jlu kyiʼj tuʼn miʼn kysikt ex jaku che ojlan jun rat akux in pon ambʼil tuʼn kybʼitzin.

 Tbʼanel o tzʼel kye junjun xjal in che aqʼunan tiʼj internet ex tiʼj teléfono aju tten in che bʼitzin rana ex in nel kykanoʼn tuʼntzun tbʼant junjun programa mas jun rat in che aqʼunan toj internet. Tuʼntzun miʼn t-xi kysmon kyibʼ qe tqanil kyukʼil txqantl, tuʼn kyten tqanil segur ex tuʼn miʼn t-xiʼ naj nim luz kyuʼn.

 ¿Tiʼ t-xima tiʼj? Aju tten in bʼaj kynukʼun kyibʼ rana in che anqʼin twi tzeʼ te Japón aj in che ok ten bʼitzil ¿Atpe jun bʼinchal kye moqa mintiʼ?