Ikju. Kyaj tqʼamaʼn Tyol Dios qa mas nya bʼaʼn kymod xjal tuʼn tten toj ambʼil jaʼlo (2 Timoteo 3:1-5). a Pero ax ikx in tzaj tqʼamaʼn qa nya kykyaqil xjal kbʼel kyyekʼin nya bʼaʼn kymod. Sino ax ikx che tel xjal kʼokel tilil kyuʼn tuʼn tten kyximbʼetz ik tzeʼn te Dios ex tuʼn t-xi kybʼinchaʼn aju taj (Isaías 2:2, 3).

Toj xnaqʼtzbʼil lu, kxel qqʼoʼn tzaqʼwebʼil kyiʼj xjel lu:

•  ¿Tiʼ in tzaj tqʼamaʼn Tyol Dios tiʼj kymod xjal tuʼn tten toj ambʼil jaʼlo?

•  ¿Tiʼ nya bʼaʼn in tzaj kyiʼj txqantl tuʼnju oʼkx in che ximen xjal kyiʼjx?

•  ¿Tiquʼn mas in kubʼ kyyekʼin xjal nya bʼaʼn kymod?

•  ¿Tiʼ jaku bʼant quʼn aj tkubʼ kyyekʼin xjal nya bʼaʼn kymod?

•  ¿Kykyaqilpe xjal kbʼel kyyekʼin nya bʼaʼn kymod?

•  ¿Kukxpe che tel xjal nya bʼaʼn kymod?

 In tzaj tqʼamaʼn Tyol Dios junjun nya bʼaʼn kymod xjal ktel tuʼnju oʼkx in che ximen kyiʼjx. In tzaj tqʼamaʼn qa mlay bʼant kyjakʼunte kyibʼ, qa oʼkx kʼokel kykʼujlan kyibʼ, kʼokel kykʼujlaʼn qe tiʼchaq ex mlay kubʼ kyyekʼin kykʼujlabʼil tiʼj Dios (2 Timoteo 3:2-4).

 In japun twi profecía lu toj ambʼil jaʼlo. In nok qqʼoʼn qwitz tiʼj qa oʼkx in che ximen xjal kyiʼjx, tiʼjju at tajbʼen kye, tiʼjju in che tzalaj tiʼj ex kyiʼj junjuntl tiʼchaq. Ex mas kyjaʼ t-xiʼ jlu toj il. Tuʼnju oʼkx in che ximen xjal kyiʼjx, mintiʼ in nok kykʼujlaʼn aju bʼaʼn ex mintiʼ in nok kyqʼoʼn kyoklen tbʼanel kymod txqantl. Mintiʼ in che tzalaj tiʼjju at kye ex mintiʼ in xi kyqʼoʼn chjonte kye txqantl tiʼjju in bʼant kyuʼn (2 Timoteo 3:2, 3).

 In kubʼ kyyekʼin xjal junjun nya bʼaʼn kymod tuʼnju oʼkx in che ximen kyiʼjx. Ex ik tzeʼn in tzaj tqʼamaʼn Tyol Dios, atzun kymod xjal lu kbʼel kyyekʼin toj ambʼil jaʼlo:

•   In pon kykʼuʼj kyiʼj nim tiʼchaq. Ateʼ nim xjal in nok kykʼujlaʼn pwaq. In kubʼ kyximen qa oʼkx jaku che tzalaj qa at nim kypwaq ex qa at nim tiʼchaq kye (2 Timoteo 3:2).

•   In jaw kynimsan kyibʼ. Ateʼ nim xjal «in jaw kyniman kyibʼ, ex jawni qe» (2 Timoteo 3:2, 4). In jaw kynimsan kyibʼ tiʼjju in bʼant kyuʼn, tiʼj kymod ex tiʼj kypwaq.

•   In che siʼmin yol. Twitz tkyaqil Txʼotxʼ, ateʼ xjal in che xmayin ex in che yolin nya bʼaʼn tiʼj Dios ex kyiʼj txqantl (2 Timoteo 3:2, 3).

•   Mintiʼ in nikʼ toj kywiʼ. Ateʼ xjal «mibʼan che niman te Dios», «mintiʼ in chewix kykʼuʼj», «in che ok meltzʼaj kyiʼj kyukʼil, [ex] txʼuʼj kywiʼ» (2 Timoteo 3:2-4). In kubʼ kyyekʼin nya bʼaʼn kymod lu aj t-xi kybʼinchaʼn aju kye kyaj, qa mintiʼ in xi kyjyoʼn tumel tuʼn tkyaj jun nya bʼaʼn toj ttxolil ex qa mintiʼ in japun twi kyyol.

•   Txʼuʼj kywiʼ. Ateʼ nim xjal jun rat in tzaj kyqʼoj ex tuʼn jlu in nok kybʼinchaʼn nim nya bʼaʼn kyiʼj txqantl (2 Timoteo 3:3).

•   Mibʼan che bʼin. Kyaj tqʼamaʼn Jesús qa mas kchmetel il toj ambʼil jaʼlo ex tuʼn jlu mlay tzʼok kyqʼoʼn xjal toklen ley (Mateo 24:12). Ax ikx, tqʼama qa che kjawil «tilj xjal qʼojlel» (Lucas 21:9).

•   Mintiʼ kykʼujlabʼil kyiʼj toj kyja. Tuʼnju ateʼ nim xjal «mibʼan che niman tyol kyman» ex «mintiʼ kykʼujlalil», mas in tzaj nya bʼaʼn kyiʼj familia, in nok bʼinchaʼn nya bʼaʼn kyiʼj ex in che ok kʼixbʼisaʼn (2 Timoteo 3:2, 3).

•   Xmeletzʼ qe aj kykʼulin te Dios. Toj ambʼil jaʼlo, «mer nimal Dios che keʼyin» xjal (2 Timoteo 3:5). Noqtzun tuʼnj, mintiʼ in xi kybʼinchaʼn aju in tzaj tqʼamaʼn Dios, sino aju in kyqʼamaʼn nejenel kye okslabʼil (2 Timoteo 4:3, 4).

 Tuʼnju oʼkx in che ximen xjal kyiʼjx, mas in tzaj yabʼil tiʼj kyximbʼetz ex in tzaj kybʼis (Eclesiastés 7:7). Jun techel, qa kʼujlaʼn pwaq tuʼn jun xjal in sbʼun kyiʼj txqantl. Atzun qeju mintiʼ in nok kykʼujlaʼn qe toj kyja, jaku tzʼok kybʼinchaʼn nya bʼaʼn kyiʼj. Tuʼn jlu, jaku tzaj depresión kyiʼj toj kyja moqa jaku kubʼ kyximen tuʼn tkubʼ kybʼyon kyibʼ. Ex atzun qeju in che kubʼ sbʼuʼn kyuʼn txqantl, in tzaj nim bʼis kyiʼj.

 In tzaj tqʼamaʼn Tyol Dios tiquʼn o chʼexpaj kymod xjal:

•   Tuʼnju ya mintiʼ kykʼujlabʼil xjal tiʼj Dios ex kyiʼj txqantl, oʼkx in che ximen kyiʼjx (Mateo 24:12).

•   Tuʼnju ya mintiʼ xi qʼoʼn ambʼil te Tajaw il tuʼn tten toj kyaʼj ex o kutz xoʼn twitz Txʼotxʼ (Apocalipsis 12:9, 12). Atxix toj ambʼil aju, o tzʼok tilil tuʼn Tajaw il tuʼn kyximen xjal oʼkx kyiʼjx (1 Juan 5:19).

 In tzaj tqʼamaʼn Tyol Dios jlu: «Paʼnmil tibʼa kyiʼj jlu» (2 Timoteo 3:5). Nya a t-xilen jlu qa mlay qo yolin kyukʼil xjal, sino a t-xilen tuʼn miʼn tok qamiwen qibʼ kyukʼil qeju oʼkx in che ximen kyiʼjx ex mintiʼ in che nimen te Dios (Santiago 4:4).

 Nya kykyaqil. In tzaj tqʼamaʼn Tyol Dios qa ateʼ xjal «in che bʼisun ex in che oqʼ tuʼn tlaj tkyaqil mya bʼaʼn» (Ezequiel 9:4). Aqeju xjal lu, ya mintiʼ in che ximen oʼkx kyiʼjx ex in xi kynimen tkawbʼil Dios. Tukʼil kyyol ex kybʼinchbʼen in kubʼ kyyekʼin qa junxitl kymod kywitz txqantl (Malaquías 3:16, 18). Jun techel, in nok tilil kyuʼn tuʼn tten mujbʼabʼil kyxol kyukʼil txqantl ex mintiʼ in che onin kyiʼj qʼoj (Miqueas 4:3).

 Miʼn. Mlay pon jun ambʼil jatumel oʼkx che tel xjal nya bʼaʼn kymod. Chʼix tpon ambʼil jatumel kbʼel tnajsaʼn Dios qe xjal mintiʼ in che nimen te (Salmo 37:38). Ktzajel tqʼoʼn ambʼil tuʼn tten jun «akʼaj txʼotxʼ». Toj juntl yol, che anqʼil xjal toj mujbʼabʼil te jumajx (2 Pedro 3:13; Salmo 37:11, 29). Jaku tzʼok qeʼ qkʼuʼj tiʼj qa kbʼajel jlu tuʼnju in nonin Biblia kyiʼj nimku xjal tuʼn tchʼexpaj kyanqʼibʼil ex tuʼn kyanqʼin ik tzeʼn taj Dios (Efesios 4:23, 24).