¿Alkye ok te Juan el Bautista?
Aju in tzaj ttzaqʼweʼn Biblia
Ok Juan el Bautista te jun profeta (Lucas 1:76). Ul itzʼj toj abʼqʼi 2 tjaqʼxi ambʼil qʼiʼn quʼn jaʼlo ex kyim toj abʼqʼi 32 te ambʼil qʼiʼn quʼn jaʼlo. Xi tqʼoʼn Dios toklen tuʼn tbʼaj tbʼinchaʼn bʼe akux in nul Mesías moqa Cristo. Tuʼntzunju, xi tqʼoʼn Juan el Bautista txokbʼil kyiʼj xjal judiy tuʼn tajtz tiʼj kyanmi ex tuʼn kyok laqʼeʼ ttxlaj Dios (Marcos 1:1-4; Lucas 1:13, 16, 17).
Aju tqanil xi tqʼamaʼn Juan el Bautista kye xjal, onin kyiʼj tuʼn tel kynikʼ tiʼj qa a Jesús kʼokel te Mesías (Mateo 11:10). Xi tqʼamaʼn Juan kye tuʼn tajtz tiʼj kyanmi ex tuʼn kybautisarin tuʼntzun tkubʼ kyyekʼin qa ax tokx kyaj tuʼn kyok laqʼeʼ ttxlaj Jehová (Lucas 3:3-6). Tuʼnju e bautisarin nim xjal tuʼn, ok qʼoʼn tbʼi te Juan el Bautista. Aju xjal mas nim toklen bautisarin tuʼn Juan, a Jesús (Marcos 1:9). a
Toj xnaqʼtzbʼil lu, kxel qqʼoʼn tzaqʼwebʼil kyiʼj xjel lu:
¿Tiquʼn nimtoq toklen Juan el Bautista?
Tuʼnju kyaj qʼamaʼn toj Biblia tiʼtoq tuʼn tbʼant tuʼn: Otoq kyaj qʼamaʼn toj Biblia qa tuʼn ttzaj tsamaʼn Jehová jun xjal qʼol tqanil ex tuʼnju pakbʼan Juan, japun kywi yol lu tiʼj (Malaquías 3:1; Mateo 3:1-3). In tzaj tqʼamaʼn Biblia jlu: «Kyjaʼtzun noq bʼanin kyten xjal tuʼn Juan tuʼntzun tkʼmet Qajaw kyuʼn ok tul». Toj juntl yol, onin Juan kyiʼj xjal judiy tuʼn tbʼaj kybʼinchaʼn kyten tuʼntzun tok kybʼiʼn tbʼanel tqanil tuʼn Jesús, aju xjal mas nim toklen tzaj tsamaʼn Jehová (Lucas 1:17).
Tuʼnju bʼant tuʼn toj tanqʼibʼil: Tqʼama Jesús jlu: «Mintiʼ jun mas maʼ toklen ik tzaʼn te Juan aju in che bʼyan xjal tuʼn; ex aju mas tal chʼin tuj kawbʼil in tzaj tuj kyaʼj, mas maʼ toklen twitz Juan» (Mateo 11:11). Mintiʼ juntl tmajen Jehová ok qʼoʼn mas toklen ik tzeʼn te Juan, tuʼnju nya oʼkx ok qʼoʼn toklen te jun profeta, sino ax ikx kyaj tqʼamaʼn Biblia qa tuʼn tok te jun xjal qʼol tqanil. Ex tuʼnju tqʼama Jesús, in nel qnikʼ tiʼj qa mlay ten Juan kyxol qeju che kawil toj kyaʼj. b ¿Tiquʼn? Tuʼnju otoq kyim Juan tej naʼmxtoq tjaqet bʼe tuʼn Jesús tuʼn kyanqʼin xjal toj kyaʼj (Hebreos 10:19, 20). Pero kjawil anqʼin profeta lu tzalu twitz Txʼotxʼ tjaqʼ Tkawbʼil Dios ex kxel qʼoʼn ambʼil te tuʼn tanqʼin te jumajx toj jun Paraíso (Salmo 37:29; Lucas 23:43).
¿Alkye e ok te tman Juan el Bautista?
Zacarías ex Elisabet kybʼi tman Juan. Judiytoq Zacarías ex ajbʼen te pal. Jun milagr titzʼjlen Juan tuʼnju mintiʼtoq in nok ten tal Elisabet. Nya oʼkxju, ax ik tuʼnju «otoq che tijin» (Lucas 1:5-7, 13).
¿Alkye kubʼ bʼyonte Juan el Bautista?
A rey Herodes Antipas. ¿Tiquʼn? Tuʼnju xi tqʼamaʼn Herodías te tal tuʼn t-xi tqʼamaʼn te Herodes tuʼn tel qʼiʼn twiʼ Juan. Ikʼuntoq twitz Juan tuʼn Herodías tuʼnju otoq txi tqʼamaʼn Juan te Herodes qa nya bʼaʼn otoq bʼant tuʼn tej tkubʼ mojeʼ tukʼil t-xuʼjil titzʼin ex nyatoq qʼoʼn ambʼil tuʼn Ley (Mateo 14:1-12; Marcos 6:16-19).
¿Kyaj qʼojpe kyibʼ Juan el Bautista tukʼil Jesús?
Mintiʼ in tzaj qʼamaʼn toj Biblia qa kyaj qʼoj kyibʼ Juan el Bautista tukʼil Jesús (Juan 3:25-30). El tnikʼ Juan tiʼj qa tzaj qʼoʼn toklen tuʼn tbʼaj tbʼinchaʼn bʼe akux in nul Mesías ex nya tuʼn tok tmojbʼan taqʼun tukʼil. Tqʼama Juan jlu: «Noq tuʼn tel kynikʼ aj Israel tiʼj, kyjaʼtzun ẍin tzaje tuʼn kybʼyan xjal wuʼne tuʼn aʼ». Ex tqʼamatl: «Ate jlu Tkʼwaʼl Dios» (Juan 1:26-34). Tuʼntzunju, nim jaw tzalaj Juan tiʼj Jesús tej tok tkeʼyin qa tbʼanel ok tpakbʼabʼil.
a «Mintiʼ jun il o tbʼincha [Jesús]» (1 Pedro 2:21, 22). Mintiʼ bautisarin Jesús tuʼn tajtz tiʼj tanmi, sino bʼant jlu tuʼn tuʼn tkubʼ tyekʼin qa tajtoq tuʼn tkubʼ tbʼinchaʼn tajbʼil Ttat ex tuʼn tkyim tuʼn qpaj (Hebreos 10:7-10).
b Qʼonka twitza tiʼj xnaqʼtzbʼil «¿Alkyeqe che xeʼl toj kyaʼj?».
Bʼalo ax ikx tgana jlu
JUNJUNTL XNAQʼTZBʼIL
¿Axpe tok anqʼin Juan el Bautista?
Anqʼin Flavio Josefo toj tnejel syent abʼqʼi ex ok qeʼ tkʼuʼj tiʼj qa ax tok anqʼin Juan el Bautista. Ax ikx qe, jaku tzʼok qeʼ qkʼuʼj tiʼj jlu.
QE XNAQʼTZBʼIL TOJ TYOL DIOS
Qaninxa jun t-xnaqʼtzbʼila tiʼj Biblia
Kʼamonxa jun t-xnaqʼtzbʼila tiʼj Tyol Dios noq kukx tukʼil jun testigo de Jehová.