¿Alkye tten in qo klet tuʼn Jesús?
Aju in tzaj ttzaqʼweʼn Tyol Dios
E klet qe tbʼanel xjal tuʼn Jesús tej t-xi tqʼoʼn tchwinqlal te chojbʼil kyiʼj (Mateo 20:28). Tuʼntzunju in tzaj tqʼamaʼn Tyol Dios qa a Jesús ok te «Kolol kye xjal» (1 Juan 4:14). Ax ikx in tzaj tqʼamaʼn jlu: «Mi aʼl juntl klol qe; porke tuj tkyaqil twitz txʼotxʼ mintiʼ ma tzaj tmaʼn Dios qa at juntl tuʼn qklet tuʼn» (Hechos 4:12).
Kyim Jesús kyiʼj kykyaqil xjal in nok qeʼ kykʼuʼj tiʼj (Hebreos 2:9; Juan 3:16). Yajxitl, jaw anqʼin Jesús kyxol kyimni ex aj meltzʼaj juntl maj toj kyaʼj ik tzeʼn jun xewbʼaj (Hechos 3:15). Ex tzmax toj kyaʼj at tipumal Jesús tuʼn kyklet qeju «in che pon laqʼeʼ ttxlaj Dios [...], porke itzʼ te Jesús te jumajx tuʼn tkubʼsan twitz Dios kyiʼj» (Hebreos 7:25).
¿Tiquʼn qaj tuʼn tyolin Jesús te qxel tukʼil Dios?
Qkyaqilx aj il qoʼ (Romanos 3:23). Tuʼn tpaj il, in qo kyim ex mlay bʼant tuʼn qok laqʼeʼ ttxlaj Dios (Romanos 6:23). Pero jaku tzʼok Jesús te «jun yolil qʼij tukʼil Qman Dios» qa ma tzʼok qe qkʼuʼj tiʼj chojbʼil bʼant tuʼn (1 Juan 2:1). Tuʼnju kyim Jesús tuʼn qpaj, jaku yolin te qxel tuʼn ttzaj tbʼiʼn Dios qe qnaʼj Dios ex tuʼn tkubʼ tnajsaʼn qil (Mateo 1:21; Romanos 8:34). In tzaj ttzaqʼweʼn Dios aju in xi qqanin te toj tbʼi Jesús tuʼnju at toklen tukʼil tajbʼil. Ax ikx, tzaj tsamaʼn Jesús twitz txʼotxʼ «tuʼn kyklet xjal» tuʼn (Juan 3:17).
¿Oʼkxpe tuʼn tok qeʼ qkʼuʼj tiʼj Jesús tuʼn qklet?
Miʼn. Nya oʼkx tuʼn tok qeʼ qkʼuʼj tiʼj chojbʼil bʼant tuʼn Jesús, sino il tiʼj tuʼn tbʼant junjuntl tiʼchaq quʼn (Hechos 16:30, 31). In tzaj tqʼamaʼn Tyol Dios jlu: «Porke ik tzaʼn tten qximlal, qa mintiʼ qanmi, kyimni ju qximlal; ikxtzun tten qokslabʼlju; qa mintiʼ ma txi qyekʼun qa at qokslabʼl tuʼnju bʼaʼn in qbʼinchaʼn, tuʼn jlu mintiʼ tajbʼen qokslabʼl» (Santiago 2:26). Tuʼn qklet, il tiʼj tuʼn tbʼant jlu quʼn:
Tuʼn tok qojtzqiʼn Jesús ex Ttat (Juan 17:3).
Tuʼn tok qeʼ qkʼuʼj kyiʼj (Juan 12:44; 14:1).
Tuʼn tkubʼ qyekʼin qʼuqbʼil qkʼuʼj aj qnimen kye (Lucas 6:46; 1 Juan 2:17). Tqʼama Jesús qa nya kykyaqil qeju in xi kyqʼamaʼn «Tat» te che kletel, sino oʼkx qeju kbʼel kybʼinchaʼn tajbʼil Dios (Mateo 7:21).
Tuʼn tkubʼ qyekʼin qʼuqbʼil qkʼuʼj maske in qo ok weʼ twitz nya bʼaʼn. Tqʼama Jesús jlu: «Alkye kukx ma tzikʼx tuʼn ex mintiʼ ma kubʼ numj, atzunju ok kletel» (Mateo 24:13).
Bʼalo ax ikx tgana jlu
QE XJEL TIʼJ TYOL DIOS
¿Oʼkxpe tuʼn qokslaʼn tiʼj Jesús tuʼntzun qklet?
In tzaj tqʼamaʼn Biblia qa ateʼ junjun xjal in nok qeʼ kykʼuʼj tiʼj Jesús, pero mlay che klet. ¿Tiquʼn kbʼajel jlu?
QE XNAQʼTZBʼIL NIM KYOKLEN TOJ TYOL DIOS
¿Tiquʼn kyim Jesús?
B’alo jaku tzʼel ik’un aju kyim tuʼn tchjet qil. Pero ¿jakupe tzʼonin oʼkx jun chojbʼil kyiʼj nim millón xjal?
AJU XQʼUQIL
Jaku ten jun tbʼanel tanqʼibʼila
Aqeju kʼujlaʼn Dios kyuʼn ex in che bʼet toj bʼe te chwinqlal ok che tzalajel tiʼj anqʼibʼil ximen tuʼn Dios tuʼn ttzaj tqʼoʼn kye.
QE XNAQʼTZBʼIL TOJ TYOL DIOS
Qaninxa jun t-xnaqʼtzbʼila tiʼj Biblia
Kʼamonxa jun t-xnaqʼtzbʼila tiʼj Tyol Dios noq kukx tukʼil jun testigo de Jehová.