Jaku tzʼok tqʼoʼn Dios twitz tiʼj tkyaqil ex jaku tzʼajbʼen tipumal tuʼn jaxku tumel (Proverbios 15:3; Hebreos 4:13). Noqtzun tuʼnj, mintiʼ in tzaj tyekʼin Xjan Uʼj qa at Dios toj tkyaqil lugar, sino at jun lugar jatumel in nanqʼin.

•   ¿Tzeʼn Dios? Jun xewbʼaj te Dios (Juan 4:​24). Tuʼntzunju, ni jun xjal jaku tzʼok tqʼoʼn twitz tiʼj (Juan 1:​18). Kyoj witzikʼ tzaj tyekʼin Dios kye tmajen, oʼkx attoq toj jun lugar. Mintiʼ tzaj yekʼin qa at Dios toj tkyaqil lugar (Isaías 6:1, 2; Apocalipsis 4:2, 3, 8).

•   ¿Jatumel in nanqʼin Dios? In tzaj tqʼamaʼn Xjan Uʼj qa in nanqʼin «max tuj kyaʼj» (1 Reyes 8:30). A t-xilen jlu qa mintiʼ in nanqʼin Dios twitz Txʼotxʼ. In tzaj tqʼamaʼn Xjan Uʼj qa at jun qʼij, pon «qe anjel twitz [Jehová] Dios». a In tzaj tyekʼin jlu qa at jun lugar jatumel in nanqʼin (Job 1:6).

Qa mintiʼ Dios toj tkyaqil lugar, ¿jakupe xqʼuqin wiʼje?

 Jaku. Maske mintiʼ in nanqʼin Dios twitz Txʼotxʼ, in ximen tiʼj teyele junjun qe. In nok tqʼoʼn twitz kyiʼj qeju in nok tilil kyuʼn tuʼn kynimen te ex in nonin kyiʼj (1 Reyes 8:39; 2 Crónicas 16:9). ¿Tzeʼn in kubʼ tyekʼin Dios qa in ximen ex qa in xqʼuqin qiʼj?

•   Aj qnaʼn Dios te: Akux in qo naʼn Dios te, in qo tzaj tbʼiʼn (2 Crónicas 18:31).

•   Aj ttzaj qbʼis: «Niqayin taʼ Qman tuʼn kyklet qe xjal ma tzʼok taʼw bʼis tiʼj kykʼuʼj ex mintiʼtl jatum tuʼn tok qeʼ kykʼuʼj» (Salmo 34:18).

•   Aj ttzaj qʼoʼn jun qconsej: In najbʼen Xjan Uʼj tuʼn Jehová tuʼn ttzaj tqʼoʼn qnabʼil ex tuʼn ttzaj tyekʼin qe alkye bʼe tuʼn t-xi qiʼn (Salmo 32:8).

Aju nya ax tok xnaqʼtzbʼil nimen kyuʼn junjun xjal

 Aju nimen kyuʼn junjun xjal: In tzaj tyekʼin Salmo 139:8 qa at Dios toj tkyaqil lugar, chi: «Qa ma chin jaxe max twitz kyaʼj, atzun taʼya ma chixin, ex qa ma chin kuʼxe t-xeʼpun txʼotxʼ jatum taʼ kynajbʼil kyimni, ex axtzun taʼya ma chixin».

 Aju axix tok: Mintiʼ in tzaj tyekʼin taqikʼ Tyol Dios lu qa at Dios toj tkyaqil lugar toj ax ambʼil, sino in tzaj tyekʼin qa jaku tzʼonin qiʼj jaxku tumel atoʼ.