¿Axpe tok at Tajaw il?

TUʼN TOK QBʼIʼN TOJ

Aju in tzaj ttzaqʼweʼn Tyol Dios

Ikju. Ax tok at Tajaw il. Jun xewbʼaj te, ok te nya bʼaʼn ex el tpan tibʼ tiʼj Dios. Axpe ikx in tzaj tqʼamaʼn Tyol Dios qa in «kawin kyibʼaj kykyaqil xjal twitz txʼotxʼ» (Juan 14:30; Efesios 6:11, 12). In tzaj tqʼamaʼn Tyol Dios junxichaq tbʼi Satanás tuʼntzun tel qnikʼ tiʼj tzeʼnxix tmod. Qqʼonk qwitz tiʼj junjun:

Satanás, aju a t-xilen «aj Qʼoj» (Job 1:6).
Tajaw il, aju a t-xilen «Siʼmil yol» (Apocalipsis 12:9).
Kan, ax ikx in nok tqʼoʼn Tyol Dios tbʼi te sbʼul (2 Corintios 11:3).
In che ok txqantl toj joybʼil tuʼn (Mateo 4:3).
Nikʼal yol (Juan 8:44).

Mintiʼ in nok Satanás te techel nya bʼaʼn

In kubʼ kyximen junjun xjal qa in nok Satanás te jun techel nya bʼaʼn in bʼant kyuʼn txqantl, axpe ikx tuʼn Dios. Noqtzun tuʼnj, in tzaj tqʼamaʼn Xjan Uʼj qa yolin Dios jun maj tukʼil Tajaw il. Tuʼnju tzʼaqli te Dios, in nel qnikʼ tiʼj qa mlayx bʼant jun nya bʼaʼn tuʼn (Deuteronomio 32:4; Job 2:1-6). Ax ikx bʼaʼn tuʼn ttzaj qnaʼn qa ok Jesús toj joybʼil tuʼn Tajaw il (Mateo 4:8-10; 1 Juan 3:5). Chikʼlixix taʼ qa ax tok at Satanás ik tzeʼn in tzaj tqʼamaʼn Tyol Dios ex nya noq jun techel tiʼj nya bʼaʼn.

Nim xjal in kubʼ kyximen qa nya ax tok at Tajaw il. Mintiʼ tuʼn qjaw labʼin tiʼj jlu. In tzaj tqʼamaʼn Xjan Uʼj qa in nok tilil tuʼn Tajaw il tuʼn tajbʼen alkyexku sbʼubʼil tuʼn tuʼntzun miʼn tel kynikʼ xjal tiʼj (2 Tesalonicenses 2:9, 10). Jun kyxol jlu, aju tuʼn tkubʼ kyximen qa nya ax tok at (2 Corintios 4:4).

Junjun nya ax tok xnaqʼtzbʼil in tzaj qʼamaʼn tiʼj Satanás

Aju nya axix tok: Lucifer juntl tbʼi Tajaw il.

Aju axix tok: Aju yol hebreo «Lucifer» in najbʼen kyoj junjuntl Tyol Dios, a t-xilen «cheʼw jaqol t-xe kyaʼj» (Isaías 14:12). Aj tok qqʼoʼn qwitz tiʼj contexto tiʼj taqikʼ Tyol Dios lu, in nel qnikʼ tiʼj qa atz in yolin kyiʼj aj kawil te tnam Babilonia, aqeju el qʼiʼn kyoklen tuʼn Dios tuʼnju jaw kynimsan kyibʼ (Isaías 14:4, 13-20). Tej tkubʼ kyiʼj aj kawil te tnam Babilonia, ajbʼen txol yol «cheʼw jaqol t-xe kyaʼj» kyuʼn xjal tuʼn kyxmayin kyiʼj.

Aju nya axix tok: In nonin Tajaw il tiʼj Dios.

Aju axix tok: Jun aj qʼoj te Satanás tiʼj Dios ex nya jun tmajen. Ax ikx in nok te aj qʼoj kyiʼj tmajen Dios, tuʼntzunju in nok tilil tuʼn tuʼn kybʼaj tyajlaʼn ex in xi tqʼamaʼn nya ax tok yol kyiʼj (1 Pedro 5:8; Apocalipsis 12:10).