In tzaj t-xnaqʼtzaʼn Tyol Dios qa mintiʼ tuʼn qnaʼn Dios kywitz sant moqa tuʼn qresarin kywitz. Oʼkx qo naʼl Dios te Jehová ex kbʼantel quʼn toj tbʼi Jesús. Xi tqʼamaʼn Jesús jlu kye t-xnaqʼtzbʼen: «Che naʼne Dios kyjaʼ: A Qman ata tuj kyaʼj, tenwt tchiylal tbʼiya qeye» (Mateo 6:9). Mintiʼ tqʼama Jesús qa bʼaʼn tuʼn qnaʼn Dios te jun sant, te jun anjel moqa te jun xjal, sino oʼkx te Jehová.

 Ax ikx tqʼama Jesús jlu: «Aqine ju bʼe, aqine ju yol axix tok, ex aqine qʼol chwinqlal; mi aʼl jun xjal jaku pon tukʼil Dios Mambʼaj, qa mya wuʼne» (Juan 14:6). Oʼkx Jesús at toklen tuʼn tyolin qiʼj twitz Dios (Hebreos 7:25).

¿Jakupe qo naʼn Dios te Jehová ex kywitz sant?

 «Xitzun tmaʼn Jesús te: —Txiʼya Satanás, tuʼnju at jun yol in tmaʼn tuj Tuʼjil: Twitz Qman tuʼn kykʼulune, aju Kydiose, ex oʼkx te tuʼn kyajbʼene» (Mateo 4:10). Taj Jehová tuʼn qajbʼen ex tuʼn qnaʼn Dios oʼkx te (Isaías 48:11).

 Qa ma qo naʼn Dios te jun tilbʼilal moqa te jun anjel, tzul tqʼoj Dios qiʼj. In tzaj tqʼamaʼn uʼj te Apocalipsis qa tej tkubʼ ẍmejeʼ Juan twitz jun anjel tuʼn tkʼulin twitz, xi tqʼamaʼn anjel jlu te: «Miʼn tbʼinchaya ikju; ax tmajen Dios qine ik tzaʼn teya ex ik tzaʼn kye termaniya kukx in xi kychikʼbʼaʼn aju ax tok tiʼj Jesús. Kʼuluna twitz Dios» (Apocalipsis 19:10).