Junx maj in yolin Tyol Dios kyiʼj tatuaje moqa kyiʼj tilbʼilal tiʼj kychibʼjal xjal. Aju in tzaj qʼamaʼn toj Levítico 19:28: «Miʼn tzʼok kyqʼoʼne jun tilbʼilal tiʼj kychibʼjale». Xi tqʼamaʼn Dios jlu kye aj Israel tuʼnju nyatoq taj tuʼn kyok ik tzeʼn qe tnam ateʼtoq kytxlaj, aqeju ok kyqʼoʼn tilbʼilal moqa tbʼi kydios tiʼj kychibʼjal (Deuteronomio 14:2). Ya mintiʼ ateʼ okslal tjaqʼ Ley xi tqʼoʼn Dios kye aj Israel, pero nim toklen tuʼn tel qnikʼ tiʼj tiʼ kyxilen yol lu.

¿Bʼaʼnpe tuʼn tok tqʼoʼn jun okslal jun tatuaje tiʼj?

 Qo xnaqʼtzan kyiʼj junjun texto aʼyeju jaku che onin qiʼj tuʼn tel qnikʼ tiʼj jlu.

•   «Ikx qe xuʼj, [...] bʼaʼn tuʼn tbʼaj kybʼinchan kyibʼ, ex miʼn che ikʼ tibʼaj» (1 Timoteo 2:9). Ax ikx at toklen consej lu kye xinaq moqa ichan. Mintiʼ tuʼn tok bʼaj kywitz xjal tiʼj jun okslal noq tuʼnju alkye tten in bʼaj tbʼinchan tibʼ ex mintiʼ tuʼn tkubʼ kynaʼn txqantl nya bʼaʼn tuʼn.

•   Ateʼ junjun xjal in nok kyqʼoʼn tatuaje tiʼj kyxmilal tuʼn tkubʼ kyyekʼin alkyeqe, tuʼn tkubʼ kyyekʼin qa mi aʼl jun kawil kyibʼaj ex qa aqe tajaw kyxmilal. Noqtzun tuʼnj, in tzaj tqʼamaʼn Tyol Dios jlu kye okslal: «Chin kubʼsale kywitze tuʼn t-xi kyqʼoʼne kyximlale te Dios ik tzaʼn jun oyaj itzʼ, tekuxix Dios ex bʼaʼn nneʼla tuj twitz, atzun kykʼulbʼile axix tok twitz Dios [ex tuʼn tajbʼen kynabʼile tiʼj, TNM]» (Romanos 12:1). Jaku tzʼonin tnabʼil jun xjal tuʼn tel qnikʼ tiʼj tiquʼn taj tuʼn tok tqʼoʼn jun tatuaje tiʼj. Jun techel, bʼalo taj tuʼn tok lepeʼ tiʼj moda at kyxol xjal moqa taj tuʼn tkubʼ tyekʼin qa at toj jun kʼloj xjal. Qa ikju, bʼaʼn tuʼn tkubʼ qxjelin jlu: «¿Tiʼ kbʼantel wuʼne qa ma tzikʼ tatuaje de moda moqa ma bʼaj ngane tiʼj?». Qa ma qo ximen tiʼj jlu, jaku kubʼ qbʼinchaʼn aju mas bʼaʼn (Proverbios 4:7).

•   «Aju xjal nej in kubʼ ten ximal tiʼj alkye tuʼn tbʼant tuʼn, bʼaʼn nneʼl te te, atzunju xjal noq t-xoʼn tibʼ tiʼj jun tiʼxti ex mintiʼ in kubʼ ten ximal tiʼj qa bʼaʼn, ktzajel mebʼayil tiʼj» (Proverbios 21:5). Chʼixme tkyaqil maj mintiʼ in kubʼ ten jun xjal ximel tiʼj aj tok tqʼoʼn jun tatuaje tiʼj, noqtzun tuʼnj, aj tbʼet ambʼil jaku tzaj nya bʼaʼn tiʼj toj aqʼuntl moqa kyukʼil txqantl tuʼn jlu. Nya oʼkxju, ax ikx kwest tuʼn tel jun tatuaje ex in xi tiʼn nim pwaq. Ateʼ nim xjal in bʼaj kygan kyiʼj tatuaje ex in nel kyiʼn. In xi qqʼamaʼn jlu tuʼnju kukx in chʼiy kybʼet lugar jatumel in nel kyiʼn xjal tatuaje.